ຫົວໜ້າຂະແໜງລະບາດວິທະຍາ ພະແນກສາທາລະນະສຸກ ນະຄອນ ຫຼວງວຽງຈັນ ໄດ້ໃຫ້ຮູ້ວ່າ: ກໍດັ່ງທຸກໆປີຜ່ານມາພໍໃກ້ຈະຮອດງານບຸນປະເພນີສຳຄັນຕ່າງໆ, ໂດຍສະເພາະແມ່ນບຸນພະທາດຫຼວງ ຊຶ່ງເປັນປາງບຸນໃຫຍ່ຂອງປວງຊົນລາວທັງຊາດ, ຊຶ່ງຈະຈັດຂື້ນໃນກາງເດືອນພະຈິກນີ້ ແລະ ເພື່ອຮັບປະກັນໃຫ້ງານບຸນໃຫຍ່ດັ່ງກ່າວ ໄດ້ດຳເນີນໄປຢ່າງເບີກບານມ່ວນຊື່ນ ແລະ ປອດໄພນັ້ນ, ໜຶ່ງໃນບັນຫາທີ່ຈະຕ້ອງໄດ້ເອົາໃຈໃສ່ ຄືຄວາມປອດໄພທາງດ້ານສຸຂະນາໄມ ຊຶ່ງທາງພະແນກສາທານະຄອນຫຼວງວຽງຈັນ ຈະໄດ້ເລັ່ງໃສ່ປ້ອງກັນພະຍາດຕິດແປດຕ່າງໆທີ່ອາດຈະເກີດຂຶ້ນ, ໂດຍໄດ້ຈັດຕັ້ງໜ່ວຍບໍລິການດ້ານສຸຂະພາບມວນຊົນ ຜູ້ມາທ່ຽວຊົມງານບຸນ ແລະ ຊາວຄ້າຂາຍ, ຊຶ່ງປັດຈຸບັນຂະແໜງການກ່ຽວຂ້ອງ ກໍໄດ້ໂຄສະນາໃຫ້ມວນຊົນ ເອົາໃຈໃສ່ປະຕິບັດຫຼັກການອະນາໄມ 3 ສະອາດດີຂຶ້ນ ແລະ ເຮັດໜ້າທີ່ກວດກາສິນຄ້າເຄື່ຶອງອຸປະໂພກຕ່າງໆ ທີ່ນຳເຂົ້າມາຈຳໜ່າຍໃນງານບຸນ ໃຫ້ມີຄວາມປອດໄພ, ໂດຍສະເພາະແມ່ນອາຫານ, ເຄື່ອງດື່ມ ແລະ ໝາກໄມ້ປະເພດຕ່າງໆ, ເນື່ອງຈາກວ່າໃນງານບຸນປີຜ່ານມາເຫັນວ່າ ຍັງມີການຈຳໜ່າຍອາຫານການກິນຈຳນວນໜຶ່ງ ທີ່ບໍ່ຖືກຕາມຫຼັກອະນາໄມເຊັ່ນ: ການວາງຂາຍອາຫານ ຕ້ອງສູງຈາກໜ້າດິນຢ່າງໜ້ອຍ 60 ຊັງຕີແມັດເພື່ອຫຼີກເວັ້ນສະພາບຂີ້ຝຸ່ນ, ຫ້າມນຳເອົາເຈ້ຍທີ່ໃຊ້ງານແລ້ວມາຫໍ່ອາຫານ ແລະ ການນຳໃຊ້ສານກັນບູດໃນອາຫານ, ບາງຮ້ານຍັງນຳເອົາສິນຄ້າລອກຮຽນແບບ, ສິນຄ້າໝົດອາຍຸການໃຊ້ງານເສຍຄຸນ ມາຈຳໜ່າຍໃນງານບຸນກໍມີ ໂດຍສະເພາະແມ່ນອາຫານ ແລະ ເຄື່ອງດື່ມບາງຊະນິດ, ດັ່ງນັ້ນຈຶ່ງເຕືອນມາຍັງມວນຊົນ ແລະ ຜູ້ບໍລິໂພກທັງຫຼາຍ ຈົ່ງມີສະຕິລະວັງຕົວໃນການເລືອກຊື້, ເລືອກບໍລິໂພກອາຫານ ແລະ ເຄື່ອງດຶ່ມຕ່າງໆ ເພື່ອຄວາມປອດໄພດ້ານສຸຂະພາບ, ສຳລັບຊາວຄ້າ-ຂາຍເອງ ກໍໃຫ້ປະຕິບັດຕາມລະບຽບ ແລະ ຫຼັກການອະນາໄມຢ່າງເຂັ້ມງວດ, ຖ້າໜ່ວຍງານກ່ຽວຂ້ອງກວດພົບເຫັນ ການລະເມີດດັ່ງກ່າວຈະຖືກດຳເນີນມາດຕະການຕາມລະບຽບ.

ແຫລ່ງຂ່າວ:

ຕິດຕາມເຮົາທາງFacebook ກົດຖືກໃຈເລີຍ!