ໂຈ້ ກັບ ນ້ອຍ ເປັນໝູ່ກັນຕັ້ງແຕ່ຕອນຮຽນຢູ່ມະຫາວິທະຍາໄລ ວິທະຍາສາດສຸຂະພາບ ນັບຕັ້ງແຕ່ປີໜຶ່ງ ຈົບຮອດປີສຸດທ້າຍ ເມື່ອຮຽນຈົບມາທັງສອງກໍ່ໄດ້ເປັນແພດຢູ່ໃນ ພະແນກປະດຸງຄັນ ທີ່ໂຮງໝໍແຫ່ງໜຶ່ງ ທັງສອງເປັນເພື່ອນສະໜິດກັບແບບສຸດໆ ແບບບໍ່ມີຄວາມລັບຕໍ່ກັນ…ບາງເລື່ອງ ໂຈ້ ເປັນໜຸ່ມເຈົ້າສະເໜ່ທີ່ມີສາວໆມາສົນໃຈຢູ່ຕະຫຼອດເວລາ ສ່ວນນ້ອຍກໍ່ເປັນສາວແສນດີສົດໃສໜ້າຮັກ ແລະ ມີໃຈຮັກດຽວໃຈດຽວ ເຖິງຈະມີຊາຍໜຸ່ມເຂົ້າມາຢອດຄຳຫວານໃຫ້ຕະຫຼອດແຕ່ນາງກໍ່ບໍ່ເຄີຍສົນໃຈຜູ້ຊາຍຄົນໃດເລີຍ ເພາະຄວາມສະໜິດກັນນິເອງເຮັດໃຫ້ ໂຈ້ ເບິ່ງຂ້າມຄວາມຮັກທີ່ນ້ອຍຄອຍສົ່ງໃຫ້ຕະຫຼອດເວລາ ແລະ ຍາມໃດກໍ່ຄອຍຫຼິ້ນເກມຄວາມຮັກກັບສາວໆຄົນອື່ນ ແລະ ໂຈ້ກໍ່ມັກເລົ່າເລື່ອງຊູ້ສາວ ຄົບກັບຄົນນັ້ນ ກິກກັບຄົນນີ້ໃຫ້ນ້ອຍຟັງເປັນປະຈຳ ເຖິງວ່ານ້ອຍຈະຮູ້ສຶກຫງຸດງິດເມື່ອໄດ້ຟັງແຕ່ກໍ່ຕ້ອງເກັບອາລົມໄວ້ແລະ ກໍ່ຮັບຟັງຈົນຈົບເລື່ອງທຸກເທື່ອ

ແຕ່ເພາະຄວາມໃກ້ຊິດ ດ້ວຍໃຈຂອງນ້ອຍທີ່ແພ້ໃຫ້ຄວາມຫຼໍ່, ຄວາມອົບອຸ່ນເມື່ອເວລາທີ່ນາງຢູ່ໃຫ້ກັບໂຈ້ ເປັນເວລາຫຼາຍປີແລ້ວທີ່ນາງຕ້ອງເກັບຄວາມຮູ້ສຶກຮັກຂ້າງດຽວເອົາໄວ້ຈົນຫົວໃຈແທບລະເບີດ ນາງຈິ່ງຄິດວ່າມັນເຖິງເວລາແລ້ວທີ່ຕ້ອງສາລະພາບຄວາມໃນໃຈອອກໄປໃຫ້ໂຈ້ໄດ້ຮູ້

ໃນຄ່ຳຄືນທີ່ຝົນຕົກໂປຍປາຍລົງມາຈາກທ້ອງຟ້າພ້ອມສຽງຟ້າຮ້ອງ ແສງຟ້າເມບ ຫຼັງເລີກຈາກການເຮັດປະສູດ (ເອົາລູກອອກໃຫ້ຄົນເຈັບທ້ອງເກີດລູກ) ນ້ອຍຈິ່ງຊວນໂຈ້ ໄປທີ່ແຈໂຮງໝໍບ່ອນປອດຄົນ ເບື້ອງຕົນໂຈ້ກໍ່ຮູ້ສຶກແປກໃຈວ່ານ້ອຍນັດຕົວເອງມາບ່ອນນີ້ເຮັດຫຍັງ ນ້ອຍໄດ້ແນມເບິ່ງໜ້າໂຈ້ດ້ວຍສີໜ້າຄິດໜັກ ໂຈ້ກໍ່ແນມເບິ່ງໜ້ານ້ອຍດ້ວຍສີໜ້າສົງໃສ ທັງສອງແນມເບິ່ງໜ້າກັນປະມານ 10 ວິນາທີ ນ້ອຍໄດ້ຮວບ ຮວມຄວາມກ້າທັງໝົດແລ້ວສາລະພາບຄວາມໃນໃຈ ໃຫ້ໂຈ້ໄດ້ຮັບຮູ້ ເມື່ອນ້ອຍເວົ້າສຸດໂຈ້ເຮັດສີໜ້າຕົກໃຈ ແລະ ທັງສອງກໍ່ມິດຫງຽບໄປດົນເຕີບ ນ້ອຍຮູ້ສຶກອາຍແຮງເລີຍຟ້າວແລ່ນໜີ ສ່ວນໂຈ້ບໍ່ມີຄຳເວົ້າໃດໆອອກມາຈາກປາກໄດ້ແຕ່ຢືນອຶ້ງໄປດົນເຕີບຈິ່ງຄ່ອຍຍ່າງມາທີ່ຫ້ອງພັກແພດ ທັງນ້ອຍ ແລະ ໂຈ້ທັງສອງເລີ່ມຄິດໜັກ ສຳລັບຄວາມຮູ້ສຶກຂອງນ້ອຍທັງຮູ້ສຶກອາຍ, ຮູ້ສຶກຂາຍໜ້າແບບສຸດໆ ແລະ ໂທດຕົວເອງວ່າເຮັດບ້າຫຍັງລົງໄປ?

ຍ້ອນການສາລະພາບຄວາມໃນໃຈຂອງນ້ອຍໃນຄັ້ງນີ້ຈິ່ງເຮັດໃຫ້ຄວາມສຳພັນຂອງທັງສອງປ່ຽນໄປ ທຸກຢ່າງບໍ່ຄືເກົ່າ ຈາກທີ່ເຄີຍໄປໃສໄປກັນຍ່າງຕາມກັນຄືເງົາກໍ່ກາຍເປັນໄປໃຜໄປມັນ ເບິ່ງໜ້າກັນລຳບາກ ໃນເວລາປະຕິບັດໜ້າທີ່ກໍ່ເກືອບຈະບໍ່ເວົ້າ ບໍ່ເບິ່ງໜ້າກັນ ຈົນແພດທັງຫຼາຍໃນໜ່ວຍງານຄິດວ່າທັງສອງແຕກຫັກຄວາມສຳພັນກັນແລ້ວ ທັງໂຈ້ ແລະ ນ້ອຍ ຮູ້ສຶກອຶດອັດໃຈເໝືອນກັບຄວາມຮູ້ສຶກມັນມີຫຍັງຄ້າງຄາ ແຕ່ສຳລັບນ້ອຍກໍ່ໄດ້ຄຳຕອບແລ້ວວ່າໂຈ້ຄິດແນວໃດກັບຕົນເອງ ນ້ອຍຈິ່ງພະຍາຍາມຕັດໃຈ ແລະ ເປີດໃຈຍອມຮັບຄົນທີ່ເຂົ້າມາໃນຊີວິດຕົວເອງ ມີແພດຊາຍຫຼາຍຄົນເຂົ້າມາຈີບນ້ອຍ ເມື່ອເວລາຜ່ານໄປປະມານ 2 ອາທິດນ້ອຍກໍ່ເລີ່ມຄົບກັບແກ້ວແພດໜຸ່ມຮູບງາມໃນພະແນກລັງສີ ແກ້ວ ໄດ້ໝັ່ນທຽວມາຫາສູ່ ນ້ອຍ ເປັນປະຈຳ ເໝືອນກັບຄວາມສຳພັນຂອງທັງສອງມີການພັດທະນາໄປໃນທາງທີ່ດີຂຶ້ນ ມື້ທຳອິດໂຈ້ກໍ່ບໍ່ໄດ້ຄິດຫຍັງຫຼາຍກ່ຽວກັບຄວາມສຳພັນຂອງ ແກ້ວ ກັບ ນ້ອຍ ເພາະໂຈ້ເອງກໍ່ມີສາວໆຫຼາຍຄົນ ແຕ່ພໍເຫັນແກ້ວທຽວມາຫານ້ອຍຕະຫຼອດ ຫຼາຍມື້ຜ່ານໄປ ໂຈ້ກໍ່ຮູ້ສຶກຫງຸດງິດ, ຮູ້ສຶກຫຶງນ້ອຍແບບບໍ່ມີເຫດຜົນເມື່ອເຫັນແກ້ວມາຫານ້ອຍ ຫຼາຍເທື່ອທີ່ໂຈ້ແອບສະກົດຮອຍຕິດຕາມທັງສອງຄົນນັ້ນໄປ ເພາະດ້ວຍຄວາມເປັນຫ່ວງຢ້ານ ແກ້ວ ເຮັດແນວບໍ່ດີກັບນ້ອຍ ໂຈ້ເລີ່ມມີຄວາມຮູ້ສຶກຄິດຮອດນ້ອຍຫຼາຍຂຶ້ນ ຄວາມຮູ້ສຶກນັ້ນໄດ້ເພີ່ມຂຶ້ນທຸກມື້ ໄປທາງໃດໂຈ້ກໍ່ແນມເຫັນແຕ່ຮ່ອງຮອຍອະດີດທີ່ຕົນເອງກັບນ້ອຍເຄີຍຜ່ານ ແລະ ຮູ້ສຶກເຫງົາ,ຮູ້ສຶກຫງຸດງິດ, ປວດໃຈທຸກຄັ້ງທີ່ເຫັນນ້ອຍໄປກັບຊາຍຄົນອື່ນ ໂຈ້ບໍ່ສາມາດໃຊ້ຊີວິດຢ່າງມີຄວາມສຸກໄດ້ຄືກັບເມື່ອກ່ອນ ຫຼາຍມື້ຫຼາຍຄືນໂຈ້ໄດ້ພະຍາຍາມຄິດທົບທວນເລື່ອງລາວທັງໝົດ ແລະ ຖາມໃຈຕົວເອງຊ້ຳໆຫຼາຍຮອບ ຈິ່ງໄດ້ຄຳຕອບວ່າ ຄວາມຈິງແລ້ວຕົນເອງກໍ່ມີໃຈໃຫ້ກັບນ້ອຍເຊັ່ນດຽວກັນ ແລະ ກໍ່ຮູ້ສຶກຜິດທີ່ເຄີຍທຳຮ້າຍຈິດໃຈນ້ອຍ

ໂຈ້ພະຍາຍາມເຂົ້າຫານ້ອຍເພື່ອຫາໂອກາດຂໍໂທດ ແລະ ສາລະພາບຄວາມໃນໃຈກັບນ້ອຍ ແຕ່ນ້ອຍບໍ່ເປີດໂອກາດ ເພາະຍັງຮູ້ສຶກຄຽດໃຫ້ໂຈ້ຢູ່ ເຖິງໃນໃຈເລິກໆຍັງຮູ້ສຶກຮັກໂຈ້ຢູ່ກໍ່ຕາມ ແຕ່ໂຈ້ກໍ່ພະຍາຍາມຕື້ ພະຍາຍາມໄປຂັດຂວາງຄວາມຮັກຂອງແກ້ວ ແລະ ນ້ອຍສະເໝີ ບໍ່ວ່າສອງຄົນນັ້ນຈະໄປທາງໃດ ໂຈ້ກໍ່ຈະຕາມໄປເກືອບທຸກຄັ້ງ ຫາກຍາມໃດຕິດພາລະກິດທີ່ໂຮງໝໍເມື່ອຮູ້ຂ່າວວ່າສອງຄົນນັ້ນໄປໃສຈິດໃຈຂອງໂຈ້ຈະກະວົນກະວາຍຮ້ອນຮົນເປັນຫ່ວງນ້ອຍຢ້ານແກ້ວເຮັດບໍ່ດີກັບນ້ອຍ ເພາະໂຈ້ກໍ່ຮູ້ດີວ່າແກ້ວກໍ່ເປັນຄົນທີ່ບໍ່ຫນ້າໄວ້ໃຈ (ຜີເຫັນຜີ) ໂຈ້ຮູ້ດີວ່າແກ້ວເປັນເສືອຜູ້ຍິງພຽງໃດ ເຖິງຈະເຄີຍເຕືອນນ້ອຍແລ້ວ ແຕ່ນ້ອຍກໍ່ບໍ່ຍອມຮັບຟັງຍັງໄປຄົບກັບແກ້ວຄືເກົ່າ ເຖິງໂຕຈະຕິດຕາມໄປບໍ່ໄດ້ໂຈ້ກໍ່ໝັ່ນໂທ ໝັ່ນສົ່ງຂໍ້ຄວາມຫານ້ອຍຢູ່ຕະຫຼອດ ໂຈ້ຄິດໃນໃຈຖ້າຈະບອກເຫດຜົນວ່າເປັນຫຍັງຈິ່ງຫ້າມໃຫ້ນ້ອຍເລີກຄົບກັບແກ້ວ ນ້ອຍຄົງຈະບໍ່ເຊື່ອງ່າຍໆຄືແຕ່ກ່ອນ ສະນັ້ນ ເບື້ອງຕົ້ນໂຈ້ຈິ່ງໄດ້ໄປນັດເຈລະຈາກັບແກ້ວແບບສ່ວນຕົວ ແລະ ຂໍໃຫ້ແກ້ວເລີກພົວພັນກັບນ້ອຍ ແຕ່ບໍ່ໄດ້ຜົນ ເພາະແກ້ວກໍ່ຫວັງຈະເອົາຊະນະພະນັນເພື່ອນທີ່ພະແນກລັງສີ ທີ່ເຄີຍມາຈີບນ້ອຍແຕ່ບໍ່ສຳເລັດ (ແກ້ວໄດ້ພະນັນກັບເພື່ອນທີ່ເປັນແພດນຳກັນປະມານ 3-4 ຄົນວ່າຖ້າແກ້ວສາມາດເຮັດໃຫ້ນ້ອຍຫຼົງຮັກແກ້ວຈົນໝົດໃຈພາຍໃນໜຶ່ງເດືອນໄດ້ ໝູ່ຈະຍອມປັນເງິນເດືອນໃຫ້ຄົນລະເຄິ່ງເດືອນ) ເຊິ່ງເລື່ອງນີ້ນ້ອຍເອງກໍ່ບໍ່ເຄີຍຮູ້ ເມື່ອການເຈລະຈາລົ້ມເຫລວໂຈ້ຈິ່ງວາງແຜນຮອບຄອບຮ່ວມກັບເພື່ອນຊາຍຄົນທີ່ສະໜິດ ແລະ ໄວ້ໃຈໄດ້ຄອຍຕິດຕາມສອດຊ່ອງສືບຂ່າວຂອງແກ້ວຢູ່ແບບລັບໆ

ດ້ວຍຄວາມຫຼໍ່ ແລະ ຄວາມເອົາໃຈເກັ່ງຂອງແກ້ວ ຈິ່ງເຮັດໃຫ້ໃຈຂອງນ້ອຍກໍ່ເກີດຄວາມສັບສົນ ນ້ອຍຮູ້ສຶກວ່າເລີ່ມມີຄວາມຮູ້ສຶກດີໆໃຫ້ກັບແກ້ວແລ້ວ ຖ້າຈະກັບໃຈຕອນນີ້ກໍ່ຢ້ານກັບບໍ່ທັນ ເຖິງວ່າໃນໃຈເລິກໆຍັງຄົງຄິດຮອດໂຈ້ໃນບາງເວລາກໍ່ຕາມ ແຕ່ນ້ອຍຄິດວ່າຊີວິດມັນຕ້ອງເດີນຕໍ່ໄປຈະຈົມປັກກັບການຮັກເຂົາຂ້າງດຽວຄືແຕ່ກ່ອນຕໍ່ໄປອີກບໍ່ໄດ້ແລ້ວ ຄົບກຳນົດໜຶ່ງເດືອນ ຫຼັງຈາກເລີກວຽກມື້ນີ້ນ້ອຍບໍ່ມີຍາມທີ່ໂຮງໝໍ ແກ້ວໄດ້ແຕ່ງຕົວຫຼໍ່ຂັບລົດເກັງສີຂາວມາຮັບນ້ອຍເພື່ອໄປກິນອາຫານຄ່ຳ ແລ້ວເອົາຄຳຕອບຈາກນ້ອຍ ໃນຮ້ານອາຫານຊື່ດັງແຫ່ງໜຶ່ງຄືນນີ້ທີ່ຮ້ານອາຫານຄົນບໍ່ຫຼາຍເຊິ່ງກໍ່ເປັນໂອກາດດີຂອງທັງຄູ່ທີ່ຈະໄດ້ລົມກັນແບບສະດວກ ທ່າມກາງບັນຍາກາດທີ່ແສນໂຣແມນຕິກ ໃນຂະນະທີ່ພວກເຂົາກຳລັງກິນອາຫານດ້ວຍຄວາມແຊ໊ບຊ້ອຍ ທັງສອງກໍ່ໄດ້ມີການລົມກັນເຖິງເລື່ອງຄວາມສຳພັນຂອງທັງຄູ່ ແລ້ວນ້ອຍກໍ່ຕອບຕົກລົງທີ່ຈະຄົບກັບແກ້ວໃນຖານະແຟນຕົວຈິງ ເຊິ່ງມັນໄດ້ສ້າງຄວາມພໍໃຈໃຫ້ແກ້ວເປັນຢ່າງຍິ່ງ ຫຼັງຈາກທີ່ໄດ້ຄຳຕອບຈາກນ້ອຍແລ້ວດ້ວຍຄວາມດີໃຈແຮງ ລາວຈິ່ງຟ້າວລຸກໄປຫ້ອງນ້ຳຊາຍ ເພື່ອໂທລະສັບແຈ້ງຂ່າວຄວາມສຳເລັດໃຫ້ໝູ່ລາວໄດ້ຮູ້ ໃນຂະນະທີ່ນ້ອຍກຳລັງນັ່ງກິນອາຫານຄົນດຽວກໍ່ຮູ້ສຶກເຈັບທ້ອງະທັນຫັນ ຈິ່ງຟ້າວລຸກໄປເຂົ້າກ້ອງນ້ຳຍິງທີ່ຢູ່ຂ້າງກັບຫ້ອງນ້ຳຊາຍ ຍ້ອນມື້ນີ້ຄົນບໍ່ຫລາຍ ບັນຍາກາດທີ່ຫ້ອງນ້ຳຈິ່ງມິດຫງຽບ ໃນຂະນະທີ່ນ້ອຍກຳລັງຍ່າງຜ່ານຫ້ອງນ້ຳຊາຍ ນ້ອຍໄດ້ຍິນແກ້ວລົມໂທລະສັບກັບໝູ່ດ້ວຍຄວາມສຸກໃຈສຽງຫົວອິອັກ ເລື່ອງກ່ຽວກັບການພະນັນຮັກຄັ້ງນີ້ ນ້ອຍຈິ່ງໄດ້ແອບຟັງເລື່ອງລາວທັງໝົດ ດ້ວຍຄວາມໝຶນສຸດຂີດພໍຢາກໂດດເຂົ້າໄປຕົບໜ້າແກ້ວທັນທີແຕ່ກໍ່ເກັບອາລົມໄວ້ແລ້ວຟ້າວຍ່າງເຂົ້າຫ້ອງນ້ຳຍິງກ່ອນທີ່ແກ້ວຈະເຫັນ ສ່ວນແກ້ວຫຼັງຈາກເຮັດທຸລະໃນຫ້ອງນ້ຳສຳເລັດແລ້ວກໍ່ຟ້າວຍ່າງກັບໄປທີ່ໂຕະອາຫານ ເມື່ອບໍ່ເຫັນນ້ອຍລາວຈິ່ງໄດ້ຖາມພະນັກງານເສີບທີ່ຮ້ານເມື່ອຮູ້ວ່ານ້ອຍໄປເຂົ້າຫ້ອງນ້ຳແກ້ວເລີຍນັ່ງຖ້ານ້ອຍທີ່ໂຕະດ້ວຍສີໜ້າຍິ້ມແຍ້ມ

ໃນຫ້ອງນ້ຳຍິງນ້ອຍຮູ້ເຈັບໃຈ, ຮູ້ສຶກຄຽດ, ຮູ້ສຶກເສຍສັກສີແບບສຸດໆ ນາງໄດ້ນັ່ງກຳກ່ຳປັ້ນຢູ່ໃນຫ້ອງນ້ຳຄົນດຽວ ບຶດໜຶ່ງສຽງໂທລະສັບໃນກະເປົາກໍ່ດັງຂຶ້ນ ນ້ອຍຟ້າວຈົກໂທລະສັບອອກຈາກກະເປົາມາເບິ່ງເຫັນເປັນໂຈ້ໂທມານ້ອຍກໍ່ຟ້າວຮັບສາຍທັງເວົ້າດ້ວຍນ້ຳສຽງສັ່ນໆພ້ອມນ້ຳຕາ ເມື່ອໂຈ້ໄດ້ຍິນວ່ານ້ອຍກຳລັງຮ້ອງໄຫ້ໂຈ້ຈິ່ງຟ້າວນຳມາທີ່ຮ້ານອາຫານທັນທີ ເພື່ອຮັບຕົວນ້ອຍກັບເຮືອນ ເມື່ອໄປຮອດຮ້ານອາຫານໂຈ້ກໍ່ຟ້າວມຸ້ງໜ້າໄປຫານ້ອຍທີ່ໜ້າຫ້ອງນ້ຳຍິງ ເມື່ອແກ້ວເຫັນໂຈ້ເຂົ້າມາໃນຮ້ານອາຫານທຳອິດກໍ່ຮູ້ສຶກແປກໃຈວ່າໂຈ້ເຂົ້າມາເຮັດຫຍັງ ເມື່ອເຫັນໂຈ້ຍ່າງໄປທີ່ຫ້ອງນ້ຳ ແກ້ວຈິ່ງຄິດອອກວ່ານ້ອຍກໍ່ຢູ່ທີ່ຫ້ອງນ້ຳ ລາວຈິ່ງຟ້າວລຸກອອກຈາກໂຕະອາຫານແລະຟ້າວຍ່າງກ້າວຍາວໆນຳຫຼັງໂຈ້ໄປ ແກ້ວເຫັນໂຈ້ເອົາມືໂອບກອບນ້ອຍຍ່າງມາຈາກຫ້ອງນ້ຳ ແກ້ຈິ່ງຟ້າວໄປຢູ້ໂຈ້ອອກຈາກຕົວນ້ອຍແລ້ວດຶງແຂນນ້ອຍມາຫາຕົນເອງ ທັງສອງເກີດການຜິດຖຽງກັນຈົນສິຕີກັນ ຈົນເດັກເສີບໃນຮ້ານມາຫ້າມໄວ້ ນ້ອຍໄດ້ແນມເບິ່ງໜ້າແກ້ວດ້ວຍນ້ຳຕາໄຫລນອງທັງສອງຂ້າງ ແລ້ວໃຊ້ມືເບື້ອງຊ້າຍຕົບໄປທີ່ໜ້າຂອງແກ້ວບາດໜຶ່ງແລ້ວຈິ່ງເວົ້າຄວາມຈິງທີ່ຕົນເອງໄດ້ຍິນຕອນທີ່ແກ້ວລົມໂທລະສັບກັບເພື່ອນຂອງລາວ ແລະ ຂໍຕັດຂາດຄວາມສຳພັນຕັ້ງແຕ່ວິນາທີນັ້ນ ຫຼັງຈາກນັ້ນນ້ອຍກໍ່ໄດ້ກັບເມືອເຮືອນກັບໂຈ້

ຫຼັງຈາກວັນນັ້ນມາທັງໂຈ້ ແລະ ນ້ອຍກໍ່ໄດ້ປັບຄວາມເຂົ້າໃຈກັນ ແລະ ເລີ່ມຄົບກັນແບບໃນຖານະແຟນ ຜ່ານໄປ 2 ປີທັງສອງກໍ່ໄດ້ແຕ່ງງານແລ້ວຢູ່ນຳກັນຢ່າງມີຄວາມສຸກ

ແຕ່ງໂດຍ: ແອັດມິນ ປັອກເລັກ ລາວໂພສຕ໌
ຕິດຕາມເລື່ອງດີດີເພຈຊີວິດແລະຄວາມຮັກ ກົດໄລຄ໌ເລີຍ!