ລັດຖະບານມຽນມາໄດ້ອອກມາດຕະການສົ່ງເສີມໃຫ້ປະຊາຊົນລາຍງານໃນກໍລະນີທີ່ພົບເຫັນເຈົ້າໜ້າທີ່ລັດ ສໍ້ລາດບັງຫຼວງໃນວັນທີ 2 ພະຈິກນີ້ ເພື່ອເພີ່ມທະວີການຕ້ານການຮັບສິນບົນແລະບັນຫາສໍ້ລາດບັງຫຼວງ.
ຫ້ອງການທີ່ປຶກສາແຫ່ງລັດມຽນມາເປີດເຜີຍໃນມື້ດັ່ງກ່າວວ່າ: ຈະຮັບການລາຍງານແລະຮັກສາຄວາມລັບ ເພື່ອປົກປ້ອງຄວາມປອດໄພຂອງຜູ້ລາຍງານ. ຂະນະດຽວກັນກໍເປີດເຜີຍວ່າ: ປະຊາຊົນທຸກຄົນລ້ວນແຕ່ມີສິດລາຍງານໂດຍການສົ່ງຈົດໝາຍຫຼືອີເມວ; ສຳລັບກໍລະນີທີ່ເຈົ້າໜ້າທີ່ລັດຖະບານສ້າງຜົນກະທົບຕໍ່ປະຊາຊົນຢ່າງໜັກໜ່ວງນັ້ນຈະໄດ້ຮັບບຸລິມະສິດແກ້ໄຂກ່ອນ.
ຫຼັງລັດຖະບານມຽນມາຊຸດໃໝ່ຂຶ້ນກຳອຳນາດກໍສຸມໃສ່ຕ້ານບັນຫາສໍ້ລາດບັງຫຼວງລວມທັງການຫ້າມບໍ່ໃຫ້ເຈົ້າໜ້າທີ່ໃນຄະນະລັດຖະບານ, ເຈົ້າໜ້າທີ່ແລະພະນັກງານສັນຍາຈ້າງຂອງພາກສ່ວນລັດຖະບານຮັບສິນບົນ. ຂະນະທີ່ທຳນຽບປະທານາທິບໍດີມຽນມາເປີດເຜີຍໃນວັນທີ 1 ເມສາຜ່ານມາໂດຍຫ້າມບໍ່ໃຫ້ເຈົ້າໜ້າທີ່ລັດຖະບານຮັບສິນບົນທີ່ມີມູນຄ່າຫຼາຍກວ່າ 25,000 ຈາດ (ປະມານ 19 ໂດລາສະຫະລັດ) ຢ່າງເດັດຂາດ.
ຂ່າວຈາກ: ສຳນັກຂ່າວ ເອບີຊີ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!