ການແຂ່ງຂັນບານເຕະລາຍການ ” AFC SOLIDARITY CUP MALAYSIA 2016 ເຊິ່ງໄດ້ຈັດຂຶ້ນຢູ່ທີ່ປະເທດມາເລເຊຍ ໃນລະຫວ່າງວັນທີ 02-15 / 11 / 2016 ໂດຍມີ 6 ປະເທດ ແລະ 1 ເຂດປົກຄອງພິເສດ ມາເກົ້າ ເຂົ້າຮ່ວມແຂ່ງຂັນ ແບ່ງອອກເປັນ 2 ກຸ່ມ ໂດຍຄັດເອົາອັນດັບ 1 ແລະ ອັນດັບ 2 ຜ່ານເຂົ້າຮອບຮອງຊະນະເລີດ. ໃນວັນພະຫັດ ວັນທີ 03/11/2016 ເວລາ 16:30 ທີມຊາດລາວ ພົບ ສີລັງກາ ເຊິ່ງແຂ່ງຂັນຢູ່ທີ່ສະຫນາມ Negeri Stadium, Kuching
ຈາກຜົນຂອງແຂ່ງປາກົດວ່າທີມຊາດລາວ ສາມາດເຮັດໄດ້ດີກວ່າ ສາມາດເອົາຊະນະ ສີລັງກາ ໄປໄດ້ແບບວຸດຫວິດ 2-1 ໂດຍການຍິງຂອງ ມຸກດາ ສຸກສະຫວັດ (ເບີ 20) ຈາກສະໂມສອນ ລາວໂຕໂຢຕ້າ ແລະ ເບີ 3 ຄຳພັນ ສົນທະນາໄລ ຈາກສະໂມສອນ ຊີເອັສຊີ ຈໍາປາ ຍິງຄົນລະປະຕູພາທີຊາດລາວ ປະເດີມສະຫນາມນັດທຳອິດ ເອົາ ຊະນະ ທີມຊາດ ສີລັງກາ 2-1 ເກັບ 3 ຄະແນນ. ສ່ວນຕາຕະລາງການແຂ່ງຂັນຂອງທີມຊາດລາວ ນັດທີ 2 ວັນທີລົງທຳການແຂ່ງຂັນໃນວັນທີ 06/11/2016 ເວລາ 16:30 ລາວ ພົບ ເຂດປົກຄອງພິເສດ ມາເກົ້າ ແຂ່ງຂັນຢູ່ທີ່ສະຫນາມ STADIUM SARAWAK ແລະ ນັດທີ 3 ແຂ່ງໃນວັນທີ 09/11/2016 ເວລາ 19:30 ມົງໂກລີ ພົບ ລາວ ແຂ່ງຂັນຢູ່ທີ່ສະຫນາມ STADIUM SARAWAK.