ສຳນັກຂ່າວຕ່າງປະເທດ ລາຍງານໃນວັນທີ 3 ພະຈິກຜ່ານມານີ້ວ່າ ຈີນ ແລະ ຣັດເຊຍ ໄດ້ເສີມຂະຫຍາຍການຮ່ວມມືດ້ານການບິນ ລະຫວ່າງສອງປະເທດ ໂດຍບໍລິສັດ Commercial Aircraft Corporation of China ຫລື COMAC ຊຶ່ງເປັນລັດວິສາຫະກິດຂອງຈີນ ໄດ້ຮ່ວມມືກັນກັບ ບໍລິສັດ United Aircraft Corporation ຫລື UAC ຂອງຣັດເຊຍ ທຳການເປີດແບບສະແດງຈຳລອງ ເຮືອບິນໄອພົ່ນລຳຕົວກວ້າງ ເດີນທາງໄລຍະໄກ ໂດຍທີ່ຍັງບໍ່ທັນໄດ້ມີການຕັ້ງຊື່ເຮືອບິນລຸ້ນນີ້ເທື່ອ ໃນງານວາງສະແດງອາກາດສະຍານຈີນ ທີ່ເມືອງຈູໄຫ່ ທາງພາກໃຕ້ຂອງປະເທດ ໃນວັນທີ 2 ພະຈິກທີ່ຜ່ານມາ ໂດຍທັງສອງໄດ້ປະກາດວ່າ ກຳລັງເລີ່ມຄັດເລືອກບັນດາບໍລິສັດຜະລິດຊິ້ນສ່ວນຕ່າງໆ ຂອງເຮືອບິນລຸ້ນດັ່ງກ່າວນີ້ແລ້ວ.

ໃນຄຳຖະແຫລງຂອງ ບໍລິສັດ COMAC ໄດ້ລະບຸວ່າ ກິດຈະການຮ່ວມທຶນຂອງສອງປະເທດ ຈະຈັດຕັ້ງຂຶ້ນໃນນະຄອນຊຽງໄຮ້ ພາຍໃນປີນີ້ ໂດຍຈະພັດທະນາເຮືອບິນລຳຕົວກວ້າງ ຂະໜາດ 280 ບ່ອນນັ່ງ ຊຶ່ງສາມາດບິນໃນໄລຍະທາງໄກ 12,000​ ກິໂລແມັດ ທຽບເທົ່າກາຍເປັນຄູ່ແຂ່ງໂດຍກົງກັບ ເຮືອບິນໂບອິ້ງ 787 ແລະ ແອບັສ A350. ໂຄງການດັ່ງກ່າວນີ້ ຈະມີມູນຄ່າລົງທຶນລະຫວ່າງ 13-20 ຕື້ໂດລາ ໂດຍແຕ່ລະຝ່າຍ ຈະອອກທຶນກັນຄົນລະເຄິ່ງ.

 
ຕິດຕາມເຮົາທາງFacebook ກົດຖືກໃຈເລີຍ!