ມື້ວານນີ້ (ວັນທີ 2 ພະຈິກ 2016) ມີການລາຍງານຂ່າວ ຜ່ານສື່ອອນລາຍວ່າ ຢູ່ແຂວງອັດຕະປືມີການຂົນໄມ້ອອກຕ່າງປະເທດ ເຮັດໃຫ້ມີຜູ້ອ່ານວິພາກວິຈານຫຼາຍພໍສົມຄວນ. ຕໍ່ຂ່າວດັ່ງກ່າວນັ້ນ, ພາກສ່ວນທີ່ກ່ຽວຂ້ອງຂອງແຂວງອັດຕະປື ຈຶ່ງໄດ້ຊີ້ແຈງຜ່ານສຳນັກຂ່າວລາວໂພສຕ໌ ພ້ອມທັງເອກະສານຢືນຢັນຢ່າງເປັນທາງການ ຊີ້ແຈງວ່າ: ແຂວງອັດຕະປືບໍ່ໄດ້ຂາຍໄມ້ທ່ອນອອກຕ່າງປະເທດ ພຽງເຄື່ອນຍ້າຍໄມ້ເກົ່າທີ່ຕົກຄ້າງຢູ່ພາຍໃນແຂວງ ທີ່ໄດ້ຂຶ້ນບັນຊີໄວ້ແລ້ວນັ້ນຊື່ໆ ດັ່ງຄຳຊີ້ແຈງມີດັ່ງນີ້:
“ອີງຕາມຫາງສຽງວິພາກວິຈານໄປຕ່າງໆນານາ ຈາກຂ່າວສັງຄົມອອນລາຍ ທີ່ວ່າແຂວງອັດຕະປືມີການລັກລອບສົ່ງໄມ້ທ່ອນອອກໄປຕ່າງປະເທດ ໃນວັນທີ 2/11/2016 ແມ່ນບໍ່ເປັນຄວາມຈິງ.
ຕໍ່ບັນຫາດັ່ງກ່າວ ແຂວງອັດຕະປືຂໍຊີ້ແຈງຕໍ່ສັງຄົມວ່າ ໄມ້ດັ່ງກ່າວ ເປັນໄມ້ທ້ອນໂຮມ ຕົກຄ້າງຈາກເຂື່ອນນໍ້າກົງ ມີຈຳນວນຫລາຍສົມຄວນ ໄດ້ມີການຂື້ນບັນຊີໄມ້ລະອຽດ ແລະ ຜ່ານການກວດກາຈາກຄະນະສະເພາະກິດຂອງແຂວງ ແລະ ສູນກາງ ພ້ອມທັງມີການເສຍພັນທະເຂົ້າງົບປະມານຄົບຖ້ວນ ແລະ ຂໍອະນຸຍາດເຄື່ອນຍ້າຍໄມ້ ຖືກຕ້ອງຕາມລະບຽບກົດຫມາຍ ເພື່ອປ້ອນເຂົ້າໂຮງງານພາຍໃນແຂວງ ແລະ ຕ່າງແຂວງ ປຸງແຕ່ງເປັນໄມ້ແປຮູບ ຕາມຄວາມຕ້ອງການຂອງຕະຫລາດ ບໍ່ແມ່ນສົ່ງໄມ້ທ່ອນອອກໄປຕາງປະເທດຕາມການວິພາກວິຈານ ແລະ ຍັງຈະສືບຕໍ່ເຄື່ອນຍ້າຍໄປແຕ່ລະໂຮງງານ ທັງພາຍໃນແຂວງແລະຕ່າງແຂວງຕື່ມອີກ ຈົນກວ່າຈະຫມົດໄມ້ທີ່ໄດ້ຂື້ນບັນຊີໄວ້.
ດັ່ງນັ້ນ ຈື່ງຂໍສ້າງຄວາມເຂົ້າໃຈຕໍ່ສັງຄົມ ແລະ ສະແດງຄວາມຂອບໃຈ ຕໍ່ການກວດສອບຂອງພົນລະເມືອງດີ ທີ່ຊ່ວຍກັນເປັນຫູເປັນຕາ ແລະ ຫວັງວ່າຄຳຊີ້ແຈງນີ້ຈະຊ່ວຍສ້າງຄວາມເຂົ້າໃຈແກ່ສັງຄົມ ໃນການຮັບຮູ້ຂໍ້ມູນຂ່າວສານທີ່ຖືກຕ້ອງ ເປັນຄວາມຈິງ ເພື່ອບໍ່ໃຫ້ແຂວງອັດຕະປື ຕົກເປັນຈຳເລີຍຂອງສັງຄົມ. ຂໍຂອບໃຈ “
