ອີງຕາມການລາຍງານຂ່າວຂອງ ເວັບໄຊມິເຣີ ໃນວັນທີ 1 ພະຈິກຜ່ານມາ ໄດ້ເປີດເຜີຍພາບຂອງ ມັມມີ່ ຊິນຄໍໂຣ (Chinchorro) ເຊິ່ງເປັນມັມມີ່ທີ່ໄດ້ຊື່ວ່າ ເກົ່າແກ່ທີ່ສຸດໃນໂລກ ມີອາຍຸ 1.500-5.000 ປີກ່ອນ ຄ.ສ ລວມອາຍຸໄດ້ປະມານ 7.000 ປີແລ້ວ ໂດຍໄດ້ມີການຄົ້ນພົບ ມັມມີ່ຊິນຄໍໂຣ ປະມານ 300 ກວ່າຮ່າງ ທີ່ຝັງຢູ່ໃຕ້ທະເລຊາຍ ອາຕາກາມາ ໃກ້ກັບແດນປະເທດ ຊິລີ ແລະເປຣູ ເຊິ່ງເປັນທະເລຊາຍທີ່ແຫ້ງແລ້ງທີ່ສຸດຂອງໂລກ
ຈາກການລາຍງານເວົ້າວ່າ ຍ້ອນອາກາດຮ້ອນແຫ້ງແລ້ງໃນທະເລຊາຍ ເປັນສາເຫດທີ່ຊ່ວຍຮັກສາສະພາບສົບ ໂດຍທຳມະຊາດ, ແຕ່ເມື່ອມີມີການຄົ້ນພົບແລ້ວໄດ້ເອົາອອກມາຈາກທະເລຊາຍ ແລ້ວມາພົບກັບຄວາມຊື້ນ ແລະອຸນຫະພູມທີ່ປ່ຽນແປງ ເຮັດໃຫ້ແບັກທີເລຍເລີ່ມກັດກິນຮ່າງຂອງມັມມີ່ ຈົນລະລາຍກາຍເປັນເມືອກສີດຳ ເຮັດໃຫ້ເປັນຕາຢ້ານ.
ນັກວິທະຍາສາດ ໄດ້ຫາວິທີປ້ອງກັນ ການເສື່ອມສະພາບຂອງສະພາບມັມມີ່ເຫຼົ່ານັ້ນ ໂດຍຄິດວ່າຫາກມີການຄວບຄຸມຄວາມຊື້ນ ແລະອຸນຫະພູມແວດລ້ອມ ຈະຊ່ວຍຮັກສາສະພາບຂອງມັມມີ່ ຊິນຄໍໂຣ ໄວ້ໄດ້
ໃນປັດຈຸບັນ ມັມມີ່ ຊິນຄໍໂຣ ຖືກເກັບຮັກສາໄວ້ທີ່ ພິພິທະພັນ ອະຊາປັດ ຊານ ມິເກວ ຢູ່ເມືອງອາຣິກາ ພາກເໜືອຂອງປະເທດ ຊິລີ ແລະມີການຍື່ນສະເໜີ ໃຫ້ມັມມີ ຊິນຄໍໂຣ ຂຶ້ນທະບຽນເປັນມໍລະດົກຂອງໂລກ ທາງອົງການຢູເນດໂກ