ຂປລ. ປັດຈຸບັນຄະດີແພ່ງມີອັດຕາເພີ່ມຂຶ້ນ ເປັນຕົ້ນຄອບຄົວຂໍຢ່າຮ້າງ ໄດ້ມີອັນຕາເພີ່ມຂຶ້ນກວມ 90,66%, ຮອງລົງມາ ແມ່ນຄະດີການກູ້ຢືມເງິນນໍາທະນາຄານກວມ 52,99% ແລະ ຄະດີເດັກ ຂໍ້ຫາລັກຊັບພົນລະເມືອງກວມ 31,72% ຖ້າທຽບໃສ່ກັບຄະດີອື່ນໆ ທີ່ສານປະຊາຊົນໄດ້ຮັບການພິຈາລະນາຕັດສິນ ແລະ ພິພາກສາຄະດີ.
ທ່ານ ຄໍາພັນ ສິດທິດໍາພາ ປະທານສານປະຊາຊົນສູງສຸດ ໄດ້ລາຍງານການເຄື່ອນໄຫວວຽກງານ 5 ປີ 2011-2015, ການເຄື່ອນໄຫວວຽກງານ ສົກປີ 2015-2016 ແລະ ທິດທາງແຜນການ 5 ປີ 2016-2020 ພ້ອມວາງທິດທາງແຜນການ ປະຈໍາ 2017 ຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດຊຸດທີ VIII ໃນວັນທີ 1 ພະຈິກ ນີ້ວ່າ: 5 ປີຜ່ານມາ ຄະດີຢູ່ສານທຸກຂັ້ນ (ຂັ້ນຕົ້ນ, ຂັ້ນອຸທອນ ແລະ ຂັ້ນລົບລ້າງ) ມີທັງໝົດ 37.840 ກວ່າເລື່ອງ ທຽບໃສ່ປີຜ່ານມາເພີ່ມຂຶ້ນ 9,81%, ແກ້ໄຂແລ້ວ 36.070 ກວ່າເລື່ອງ ເທົ່າກັບ 95,32% ລື່ນແຜນການວາງໄວ້ 10,32%. ຜ່ານການກວດກາ ແລະ ຄົ້ນຄວ້າວິໄຈຕໍ່ຜົນການຕັດສິນ ແລະ ພິພາກສາຄະດີຂອງສານແຕ່ລະຂັ້ນ ເຫັນວ່າມີປະສິດທິພາບດີຂຶ້ນ, ຄູ່ຄວາມພໍໃຈ, ຍອມຮັບ ແລະ ເຫັນດີນໍາໄປຈັດຕັ້ງປະຕິບັດຕາມຄໍາຕັດສິນຂອງສານຂັ້ນຕົ້ນ ກວມ 81,08%, ຂໍອຸທອນກວມ 18,92%. ສານຂັ້ນອຸທອນ ໄດ້ພິພາກສາແລ້ວຄູ່ຄວາມພໍໃຈ ແລະ ເຫັນດີນໍາໄປຈັດຕັ້ງປະຕິບັດກວມ 45,86% ຂອງຈໍານວນຄະດີທີ່ອຸທອນ ແລະ ຂໍລົບລ້າງກວມ 44,14%. ສານຂັ້ນລົບລ້າງພິພາກສາ ສ່ວນຫລາຍແມ່ນຢັ້ງຢືນ, ປ່ຽນແປງບາງສ່ວນ ແລະ ລົບລ້າງສົ່ງຄືນມີຈໍານວນໜຶ່ງ, ໃນນັ້ນ ມີການສະເໜີຮື້ຟື້ນມາຫາສານປະຊາຊົນ 120 ກວ່າເລື່ອງ ກວມ 0,42%. ໃນຈໍານວນຄະດີເຂົ້າມາສານຂັ້ນຕົ້ນຫລາຍກວ່າໝູ່. ຄະດີອາຍາ ແມ່ນຂໍ້ຫາຢາເສບຕິດກວມ 28,09% ຂອງຈໍານວນຄະດີ ທີ່ເຂົ້າມາສານຂັ້ນຕົ້ນແຂວງ, ນະຄອນ, ຄະດີແພ່ງ ແມ່ນສັນຍາກູ້ຢືມກວມ 22,17%. ຄະດີຄອບຄົວແມ່ນ ການຂໍຢ່າງຮ້າງ ກວມ 90,66%, ຄະດີການຄ້າ ແມ່ນການກູ້ຢືມເງິນນໍາທະນາຄານກວມ 52,99%, ຄະດີລັກຊັບພົນລະເມືອງ ກວມ 31,72% ຂອງຈໍານວນຄະດີ ແຕ່ລະປະເພດທີ່ເຂົ້າມາສານຂັ້ນຕົ້ນແຂວງ, ນະຄອນ. ສະເພາະສົກປີ 2015-2016 ນີ້ ຄະດີທັງໝົດຢູ່ສານທຸກຂັ້ນມີ 10.500 ກວ່າເລື່ອງ, ແກ້ໄຂແລ້ວ 8.320 ກວ່າເລື່ອງກວມ 79,19%, ຄະດີເຂົ້າມາໃໝ່ ຢູ່ສານຂັ້ນຕົ້ນເຂດ, ແຂວງ, ນະຄອນທັງໝົດ 7.300 ກວ່າເລື່ອງ ທຽບໃສ່ໄລຍະດຽວຂອງປີຜ່ານມາເພີ່ມຂຶ້ນ 12,15% ແລະ ຍັງຄ້າງມາແຕ່ສົກປີກ່ອນ 1.300 ກວ່າເລື່ອງ ລວມທັງໝົດ 8.600 ກວ່າເລື່ອງແກ້ໄຂແລ້ວ 6,890 ກວ່າເລື່ອງ ກວມ 80,06%.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!