ສຳນັກຂ່າວຕ່າງປະເທດ ລາຍງານໃນວັນທີ 1 ພະຈິກນີ້ວ່າ ນາງ ຊອຍ ຊຸນຊິນ ໝູ່ສະໜິດຂອງ ປະທານາທິບໍດີ ປັກ ກຶນເຮ ແຫ່ງ ສ.ເກົາຫລີ ຫລື ເກົາຫລ່ີໃຕ້ ໄດ້ຖືກເຈົ້າໜ້າທີ່ໄອຍະການ ອອກຄຳສັ່ງກັກຕົວເພື່ອສືບສວນ-ສອບສວນ ພາຍຫລັງທີ່ສ່ຽວຮັກຂອງຜູ້ນຳເກົາຫລີໃຕ້ຄົນນີ້ ໄດ້ຕົກເປັນຂ່າວຫາງສຽງຂອງສັງຄົມ ກ່ຽວກັບການໃຊ້ອິດທິພົນ ແຊກແຊງທາງການເມືອງ.
ທ່ານ ນາງ ປັກ ກຶນເຮ ແລະ ນາງ ຊອຍ ຊຸນຊິນ ເປັນໝູ່ສະໜິດກັນມາດົນນານເຖິງ 40 ປີ ແລະ ມີຄວາມສຳພັນທີ່ໃກ້ຊິດ ສົ່ງຜົນເຮັດໃຫ້ເກີດມີພຶດຕິກຳທີ່ເປັນຫາງສຽງສັງຄົມ ໂດຍກະແສຂ່າວໄດ້ກ່າວຫາວ່າ ນາງ ຊອຍ ເປັນຜູ້ກວດຜ່ານຮ່າງປະກອບຄຳເຫັນຕ່າງໆ ຂອງປະທານາທິບໍດີເກົາຫລີໃຕ້ ແລະ ຍັງສາມາດເຂົ້າເຖິງເອກະສານລັບຂອງລັດຖະບານ ທັງໆທີ່ບໍ່ໄດ້ມີຕຳແໜ່ງໃດໆໃນລັດຖະບານເລີຍ ສົ່ງຜົນເຮັດໃຫ້ ທ່ານ ນາງ ປັກ ກຶນເຮ ຖືກສັງຄົມຕຳໜິຢ່າງຮຸນແຮງ ແລະ ຄະແນນນິຍົມຂອງທ່ານ ຕົກຕ່ຳລົງໃນໄລຍະປີສຸດທ້າຍຂອງການບໍລິຫານປະເທດ.
ນອກຈາກນີ້, ນາງ ຊອຍ ຍັງຖືກກ່າວຫາອີກວ່າ ໄດ້ໃຊ້ອິດທິພົນຂອງຕົນ ທີ່ມີຄວາມໃກ້ຊິດສະໜິດສະໜົມກັບ ປະທານາທິບໍດີ ໄປຂົ່ມຂູ່ບໍລິສັດໃຫຍ່ໆພາຍໃນປະເທດ ໃຫ້ບໍລິຈາກເງິນເຂົ້າມູນນິທິທີ່ບໍ່ຫຍັງຜົນກຳໄລ 2 ແຫ່ງ, ຈາກນັ້ນກໍທຳການຍັກຍອກເງິນດັ່ງກ່າວ ອອກໄປນຳໃຊ້ສ່ວນຕົວ.
ດ້ານປະທານາທິບໍດີ ປັກ ກຶນເຮ ໄດ້ອອກມາຖະແຫລງຂ່າວຂໍອະໄພຕໍ່ປະຊາຊົນ ໃນທ້າຍອາທິດທີ່ຜ່ານມາ ແລະ ຍອມຮັບວ່າ ໃນໄລຍະຜ່ານມາ ຕົນເອງໄດ້ຮ້ອງຂໍໃຫ້ ນາງ ຊອຍ ເປັນຜູ້ໃຫ້ຄຳແນະນຳເປັນບາງຄັ້ງຄາວ ໃນເວລາຮ່າງບົດປະກອບຄຳເຫັນ, ແນວໃດກໍຕາມ ການອອກມາຖະແຫລງດັ່ງກ່າວ ບໍ່ໄດ້ເຮັດໃຫ້ຄວາມບໍ່ໄວ້ວາງໃຈຂອງສັງຄົມ ຫລຸດໜ້ອຍຖອຍລົງ ສົ່ງຜົນເຮັດໃຫ້ປັດຈຸບັນ ມີປະຊາຊົນຊາວເກົາຫລີໃຕ້ ຈຳນວນຫລາຍໝື່ນຄົນ ອອກມາປະທ້ວງກົດດັນໃຫ້ທ່ານລາອອກ ທັງຢູ່ນະຄອນຫລວງເຊອູນ ແລະ ເມືອງອື່ນໆອີກ.
ຕິດຕາມເຮົາທາງFacebook ກົດຖືກໃຈເລີຍ!