ເນື່ອງຈາກມີຜົນກະທົບ ຫຼາຍດ້ານເປັນຕົ້ນແມ່ນສະພາບອາກາດທີ່ໜາວຈັດຢູ່ພາກເໜືອໃນຕົ້ນປີນີ້, ເກີດໄພນ້ຳຖ້ວມ ແລະຍັງມີການລະບາດຂອງສັດຕູພືດ ເຮັດໃຫ້ຜົນຜະລິດກະສິກຳໄດ້ຮັບຄວາມເສຍຫາຍ ໂດຍສະເພາະບັນດາແຂວງພາກເໜືອ ຊຶ່ງໄດ້ກາຍເປັນສາເຫດໜຶ່ງທີ່ເຮັດໃຫ້ເສດຖະກິດຂະຫຍາຍຕົວ ຫຼຸດແຜນການທີ່ສະພາແຫ່ງຊາດຮັບຮອງ 0,6% ໃນປີນີ້.
ຕາມຂໍ້ມູນຂອງກະຊວງແຜນການ ແລະການລົງທຶນທີ່ລາຍງານໃນກອງປະຊຸມສະພາໃຫ້ຮູ້ວ່າ: ການຂະຫຍາຍຕົວຂອງເສດຖະກິດໝົດປີນີ້ຈະຢູ່ໃນລະດັບ 6,9% ຊຶ່ງເຫັນວ່າຫຼຸດແຜນການທີ່ສະພາແຫ່ງຊາດຮັບຮອງ 0,6% (ສະພາແຫ່ງຊາດຮັບຮອງ7,5%) ເນື່ອງຈາກຂະແໜງກະສິກຳ, ບໍລິການ ແລະພາສີນຳເຂົ້າບໍ່ໄດ້ຕາມແຜນ, ຍ້ອນສະພາບອາກາດມີການປ່ຽນແປງຢ່າງກະທັນຫັນ ແລະມີການລະບາດຂອງສັດຕູ ພືດຢູ່ບາງຂົງເຂດສົ່ງຜົນໃຫ້ການ ຜະລິດເຂົ້າ ແລະພືດສະບຽງອາຫານບໍ່ໄດ້ຕາມແຜນການປີ, ລາຄານ້ຳມັນຫຼຸດລົງສົ່ງຜົນໃຫ້ເກັບພາສີຫຼຸດລົງບວກກັບບາງໂຄງການກໍ່ສ້າງໃຫຍ່ໄດ້ສຳເລັດ ຈຶ່ງເຮັດໃຫ້ການນຳເຂົ້າຫຼຸດລົງ.
ສ່ວນທາງດ້ານລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນບັນລຸໄດ້ 16,21 ລ້ານກີບ ຫຼື ປະມານ 2.027 ໂດລາ, ໃນນັ້ນ ອັດຕາການຂະຫຍາຍຕົວຂອງຂະແໜງກະສິກຳເພີ່ມຂຶ້ນ 3% ກວມເອົາ 23,3%, ອຸດສາຫະກຳເພີ່ມ ຂຶ້ນ 9% ກວມ 28,8%, ບໍລິການເພີ່ມຂຶ້ນ 8,5% ກວມເອົາ 39,8% ແລະພາສີອາກອນຜະລິດຕະພັນ ແລະການນຳເຂົ້າເພີ່ມຂຶ້ນ 3,8% ກວມ 8,1% ແຜນການວາງໄວ້ ເພີ່ມຂຶ້ນ 8,1% ກວມ 8,4%.
ນອກນີ້ ການເກັບລາຍຮັບເຂົ້າງົບປະມານໃນ 10 ເດືອນຜ່ານມາສາມາດປະຕິບັດໄດ້ 66,55% ຂອງແຜນດັດແກ້, ຄາດໝົດປີຈະໄດ້ 95,17% ຂອງແຜນດັດແກ້ໃນນັ້ນລາຍຮັບພາຍໃນປະຕິບັດໄດ້ 66,11% ໝົດປີຈະໄດ້ 94,56%, ສ່ວນລາຍຈ່າຍປະຕິ ໄດ້ 78,06% ຂອງແຜນດັດແກ້, ຄາດໝົດປີຈະໄດ້ 96,82% ຂອງແຜນດັດແກ້, ການຂາດດຸນງົບປະມານເທົ່າກັບ 6,97% ຂອງ GDP, ອັດຕາເງິນເຟີ້ສະເລ່ຍຢູ່ໃນລະດັບ 1,25%, ເງິນຝາກທະນາ ຄານທຸລະກິດເພີ່ມຂຶ້ນໃນລະດັບ 59.377 ຕື້ກີບ ເທົ່າກັບ 54,64% ຂອງເຈດີພີໃນເດືອນມິຖຸນາ 2016 ມາຮອດເດືອນສິງຫາຢູ່ໃນລະດັບ 60.616 ຕື້ກີບ ເທົ່າກັບ 55,76% ຂອງເຈດີພີ.
ພ້ອມດຽວກັນນີ້ ການສົ່ງອອກ ສິນຄ້າໃນ 9 ເດືອນຜ່ານມາ ປະຕິບັດໄດ້ 25.256 ຕື້ກີບ ຫຼື ປະມານ 3.157 ລ້ານໂດລາ ເພີ່ມຂຶ້ນ 23,1% ຜະລິດຕະພັນສົ່ງອອກ ຕົ້ນຕໍແມ່ນໄຟຟ້າເພີ່ມຂຶ້ນ 65,8% ອຸປະກອນເຄື່ອງໃຊ້ໄຟຟ້າເພີ່ມຂຶ້ນ 38,1% ແຮ່ທອງເພີ່ມຂຶ້ນ 37,1% ແລະຜະລິດຕະພັນກະສິກຳເຊັ່ນ: ສາລີ, ຢາສູບ, ກ້ວຍ, ເຂົ້າ, ສັດໃຫຍ່ ແລະອື່ນໆສ່ວນການນຳເຂົ້າແມ່ນ ຫຼຸດລົງ 12,3% ມີມູນຄ່າ 24.328 ຕື້ກີບ ຫຼື ປະມານ 3.041 ລ້ານໂດລາ, ການຄ້າເກີນດຸນປະມານ 920 ຕື້ກີບ ປະມານ 115 ລ້ານໂດລາ ເນື່ອງຈາກມູນຄ່າສົ່ງອອກສິນຄ້າເພີ່ມຂຶ້ນ.
ສຳລັບທາງດ້ານການລົງທຶນ ໃນໄລຍະ 10 ເດືອນຂອງສົກປີ 2015-2016 ການລົງທຶນລວມ ທົ່ວສັງຄົມປະຕິບັດໄດ້ 41.825 ຕື້ກີບ ເພີ່ມຂຶ້ນ 21,2% ທຽບໃສ່ ແຜນການ (ແຜນການ 34,5 ພັນຕື້ກີບ), ກວມເອົາ 38% ຂອງ GDP ຊຶ່ງປະກອບດ້ວຍ 4 ແຫຼ່ງ ທຶນສໍາຄັນຄື: ໂຄງການລົງທຶນຂອງລັດສະເພາະທຶນພາຍໃນປະຕິບັດໄດ້ 2.941 ຕື້ກີບ ເທົ່າກັບ 89% ຂອງແຜນການ (3,3 ພັນຕື້ກີບ), ການລົງທຶນເອກະຊົນພາຍໃນ ແລະຕ່າງ ປະເທດໃນສົກປີນີ້ອະນຸມັດທັງໝົດ 1.222 ໂຄງການ ມູນຄ່າ 3,1 ພັນລ້ານກວ່າໂດລາ ເທົ່າກັບ 25,5 ຕື້ກວ່າກີບ (ທຶນຈົດທະບຽນທັງ ໝົດ) ລື່ນແຜນ 36% (ແຜນການ 2.305 ລ້ານໂດລາ) ແຕ່ການນໍາ ທຶນເຂົ້າຕົວຈິງ ໂດຍຜ່ານລະບົບທະນາຄານມີພຽງແຕ່ 883,7 ລ້ານໂດລາ, ທຶນຊ່ວຍເຫຼືອເພື່ອການພັດທະນາ ODA ປະຕິບັດໄດ້ທັງໝົດ 351 ໂຄງການ ເທົ່າກັບ 688,10 ລ້ານໂດລາ ຫຼື ເທົ່າກັບ 5,6 ພັນຕື້ກວ່າກີບ ເທົ່າກັບ 99% ຂອງແຜນການປີ (695 ລ້ານໂດລາ) ແລະແຫຼ່ງທຶນຈາກລະບົບເງິນຕາມາຮອດເດືອນມິຖຸນາ 2016 ສິນເຊື່ອທົ່ວລະບົບທະນາຄານບັນລຸ 7.728 ຕື້ກີບ, ສະພາບການເຄື່ອນໄຫວຂອງຕະຫຼາດຫຼັກຊັບລາວເຫັນວ່າມີບໍລິສັດເຂົ້າຈົດທະບຽນເພີ່ມຈາກ 4 ເປັນ 5 ບໍລິສັດ.
ຂ່າວ: ເສດຖະກິດ-ສັງຄົມ