ເສັ້ນທາງຈາກສາມແຍກວັງຊາຍ – ຊຳເຄ້ - ບ້ານໂຊກນ້ອຍ ເປັນໂຄງການໜຶ່ງທີ່ແກ່ຍາວເວລາການກໍ່ສ້າງ
ດົນພໍສົມຄວນ ແລະ ກາຍເປັນທີ່ຈົ່ມວ່າບໍ່ໜ້ອຍຈາກປະຊາຊົນຜູ້ທຽວທາງ ພາຍຫຼັງມີບໍລິສັດເຊັນ ສັນຍາຮັບ
ເໝົາມາ 4 ປີກວ່າ ຮອດຂະນະນີ້ ຄືບໜ້າບໍ່ເຖິງ 30% ຍ້ອນຄວາມຫຍຸ້ງຍາກທາງດ້ານການເງິນ.
ທ່ານ ນາງ ວິໄລຄຳ ໂພສາລາດ ລັດຖະມົນຕີຊ່ວຍວ່າການກະຊວງໂຍທາທິການ ແລະ ຂົນສົ່ງ ໄດ້ໃຫ້ຮູ້ໃນວັນທີ 16
ກໍລະກົດນີ້ວ່າ: ໄລຍະທາງດັ່ງກ່າວ ເບື້ອງຕົ້ນແມ່ນມີກຳນົດແຕ່ສາມແຍກວັງຊາຍ – ຊຳເຄ້ – ບ້ານໂຊກນ້ອຍ –
ທາງ 450 ປີ – ທາງຫຼັກ 21 ລວມຄວາມຍາວ 7,73 ກິໂລແມັດ ໂດຍແມ່ນບໍລິສັດສາມປະສານເປັນຜູ້ຮັບເໝົາໃນ
ມູນຄ່າກໍ່ສ້າງລວມ 93,7 ຕື້ກີບ ຊຶ່ງໄດ້ເຊັນສັນຍາກັບພາກລັດໃນວັນທີ 20 ເມສາ 2011 ຮອດປະຈຸບັນລວມແລ້ວ
4 ປີກວ່າ ໂຄງການນີ້ ທຳອິດອອກແບບເປັນທາງປູຢາງສອງຊັ້ນ ແຕ່ປ່ຽນມາເປັນທາງເບຕົງເສີມເຫຼັກ ຍ້ອນເປັນ
ທາງເວັ້ນຕົວເມືອງ, ເສັ້ນທາງຕັດຜ່ານທົ່ງນາ, ເປັນໜອງບຶງ ແລະ ຈະມີລົດບັນທຸກແລ່ນຜ່ານຫຼາຍ. ແນວໃດກໍ
ຕາມ ຍ້ອນບໍລິສັດບໍ່ສາມາດຈັດຕັ້ງປະຕິບັດໂຄງການໄດ້ ເພື່ອແກ້ໄຂບັນຫາ ຄະນະຊີ້ນຳໂຄງການກໍຄືພະແນກໂຍ
ທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ຄົ້ນຄວ້າເປັນເອກະພາບແບ່ງເສັ້ນທາງນີ້ ອອກເປັນສອງຊ່ວງ
ເພື່ອເລືອກເອົາບໍລິສັດທີ່ມີຄຸນສົມບັດ ແລະ ມີຄວາມພ້ອມເຂົ້າມາຊ່ວຍ.
ໃນນີ້ຊ່ວງທີ 1 ແມ່ນເລີ່ມແຕ່ 3 ແຍກວັງຊາຍ - ຊຳເຄ້ - ບ້ານໂຊກນ້ອຍ ຍາວ 4 ກິໂລແມັດ ກວ້າງ 12 ແມັດ, ມີລະບົບ
ລະບາຍນ້ຳ, ໄຟເຍືອງທາງ ແລະ ສິ່ງປະກອບຂອງທາງຄົບຊຸດ ມອບໃຫ້ບໍລິສັດສຸກສະດາ ກໍ່ສ້າງເປັນຜູ້ຮັບເໝົາ ນັບ
ແຕ່ວັນທີ 20 ທັນວາ 2012 ຈາກນັ້ນ ໄດ້ມອບໃຫ້ບໍລິສັດ SM ແສງຕາເວັນກໍ່ສ້າງຂົວທາງຮັບຊ່ວງຕໍ່ ແນວໃດກໍດີ ຈົນ
ເຖິງປະຈຸບັນໄລຍະທາງດັ່ງກ່າວຄວາມຄືບໜ້າໂດຍລວມ ຢູ່ທີ່ 27,99% ພາຍຫຼັງບໍລິສັດໄດ້ຢຸດການກໍ່ສ້າງໄວ້ແຕ່ເດືອນ
ສິງຫາ 2013 ຜ່ານມາ ຊຶ່ງຊ້າກວ່າແຜນການ 65%.
ທ່ານລັດຖະມົນຕີຊ່ວຍວ່າການກ່າວອີກວ່າ: ທຸກວັນນີ້ ສະພາບເສັ້ນທາງແຕ່ 3 ແຍກວັງຊາຍ – ຊຳເຄ້ ຍັງເລນໜຶ່ງບໍ
ທັນກໍ່ສ້າງ ແລະ ແຕ່ຊຳເຄ້ – ໂຊກນ້ອຍ ລວມທັງຂົວເບຕົງໜຶ່ງແຫ່ງຍາວ 70 ແມັດຍັງບໍ່ທັນໄດ້ປະຕິບັດ ຍ້ອນຂາດ
ທຶນໝຸນວຽນ ເຊິ່ງບໍລິສັດກຳລັງຊອກແຫຼ່ງທຶນຢູ່.
ສຳລັບຊ່ວງທີ 2 ໄດ້ເຊັນສັນຍາຕົ້ນເດືອນສິງຫາ 2012 ມີກຳນົດກໍ່ສ້າງ 15 ເດືອນ ເສັ້ນທາງ ເລີ່ມແຕ່ບ້ານໂຊກນ້ອຍຫາ
ທາງ 450 ປີອອກສູ່ທາງຫຼັກ 21 ຍາວ 3,73 ກິໂລແມັດ ທີ່ບໍລິສັດສາມປະສານເປັນຜູ້ຮັບເໝົາ ແລະ ມອບຕໍ່ໃຫ້ບໍລິສັດຊີ
ເອຟໂຊລູເຊັນ ຈຳກັດ ດຳເນີນການມາຮອດປະຈຸບັນສຳເລັດແລ້ວ 88,43% ເຮັດໃຫ້ການໄປມາຜ່ານທາງຍ່ານນີ້ມີຄວາມ
ສະດວກດີ ຍັງແຕ່ການປະດັບປະດາ, ທ່ານ ນາງ ວິໄລຄຳ ໂພສາລາດ ກ່າວ.
ແຫຼ່ງຂ່າວ: ໜັງສືພິມເສດຖະກິດ – ສັງຄົມ