ສະໜາມກິລາເປີດ-ປິດ ງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າພາບ ໃນປີ 2018 ຫຼື “ຊຽງຂວາງ ເກມ 2018” ນັບມາຮອດປັດຈຸບັນ ຄືບໜ້າແລ້ວເກືອບ 50 ເປີເຊັນ ແລະ ຄາດວ່າຈະໃຫ້ສຳເລັດ 100 ເປີເຊັນ ກ່ອນມື້ເປີດງານ 3 ເດືອນ.

ທ່ານ ບົວສອນ ສີນວນທອງ ຮອງເຈົ້າແຂວງຊຽງຂວາງ ທັງເປັນຮອງປະທານຈັດງານ ລາຍງານ ຕໍ່ກອງປະຊຸມ ຄະນະຮັບຜິດຊອບລະດັບຊາດ ຄັ້ງທີ 1 ຂອງງານ ມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເມື່ອບໍ່ດົນມານີ້ວ່າ: ພາຍຫຼັງທີ່ໄດ້ຮັບແຈ້ງການ ສະບັບເລກທີ 479/ຫລບ.ກລຂ ລົງວັນທີ 01/04/2013 ແຂວງຊຽງຂວາງ ແລະ ກະຊວງສຶກສາທິການ ແລະ ກິລາ ໄດ້ດຳເນີນຕາມບາດກ້າວ, ຂັ້ນຕອນຂອງໂຄງການກໍ່ສ້າງເຊັ່ນ: ການອອກແບບ, ມາດຖານເນັກນິກ, ການຈັດຊື້-ຈັດຈ້າງ ຕາມລະບຽບການ, ມາເຖິງວັນທີ 23 ພະຈິກ 2013 ໄດ້ຈັດພິທີວາງສີລາລຶກ ແລະ ດຳເນີນການກໍ່ສ້າງ ຢ່າງເປັນທາງການ ແຕ່ມາຮອດເດືອນກຸມພາ 2014 ເຫັນວ່າ ລັດຖະບານ ພົບຄວາມຫຍຸ້ງຍາກ ທາງດ້ານເສດຖະກິດ ຈຶ່ງໄດ້ໂຈະການກໍ່ສ້າງໄວ້ຊົ່ວຄາວ ແລະ ມາຮອດວັນທີ 7 ເມສາ 2015 ຈຶ່ງໄດ້ຮັບແຈ້ງການຂອງລັດຖະບານ ເລກທີ 590/ຫລບ.ກລຂ ໃຫ້ແຂວງຊຽງຂວາງ ສືບຕໍ່ ການກໍ່ສ້າງ ສະໜາມກິລາເປີດ-ປິດ ທີ່ຄັງໜອງຫຼວງ ເມືອງແປກ ນັບມາຮອດປັດຈຸບັນ ການກໍ່ສ້າງສະໜາມດັ່ງກ່າວມີຄວາມຄືບໜ້າແລ້ວ 45 ເປີເຊັນ ແລະ ຄາດວ່າຈະໃຫ້ສຳເລັດ 100 ເປີເຊັນ ກ່ອນມື້ເປີດງານ 3 ເດືອນ. ສ່ວນບັນດາ ສະໜາມກິລາແຂ່ງຂັນຕ່າງໆ ທີ່ມອບໝາຍໃຫ້ ເອກະຊົນຮັບຜິດຊອບກໍ່ສ້າງນັ້ນ ກໍ່ຖືວ່າມີຄວາມຄືບໜ້າ ແລະ ສຳເລັດໄປແລ້ວບາງສະໜາມ ເປັນຕົ້ນແມ່ນສະໜາມກິລາໂບລິ້ງ ສຳເລັດແລ້ວ 100 ເປີເຊັນ, ສະໜາມກ໊ອຟ (ບ້ານນາເທົາ) ສຳເລັດ 90 ເປີເຊັນ, ສະໜາມກ໊ອຟ (ບ້ານນາຄອນ) ສຳເລັດໄປແລ້ວ 60 ເປີເຊັນ, ສະໜາມຍິງປືນ ເລືອກສະຖານທີ່ກໍ່ສ້າງໃໝ່, ສະໜາມກິລາບານສົ່ງ ແລະ ສະໜາມກິລາເປຕັງ (ບ້ານໂງຍ) ພວມດຳເນີນການປັບໜ້າດິນ, ອອກແບບ ແລະ ສັ່ງໂຄງເຫຼັກ ເຂົ້າມາສະຖານທີ່ກໍ່ສ້າງ ຄືບໜ້າແລ້ວ 15 ເປີເຊັນ ແລະ ສະລອຍນ້ຳ (ບ້ານນ້ຳຮົ່ມ) ປັດຈຸບັນກຳລັງສຳຫຼວດ-ອອກແບບ.