ພິທີປະກາດການຈັດຕັ້ງຄະນະບໍລິຫານງານ ສະຫະພັນກີລາດຶງເຊືອກແຫ່ງຊາດລາວຊຸດໃໝ່ ຈັດຂຶ້ນວັນທີ 18 ຕຸລາ 2016 ທີ່ຄະນະກຳມະການໂອແລມປິກລາວ (ຄອລ) ມີທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງສຶກສາທິການ ແລະ ກີລາ ຮອງປະທານ ແລະ ເລຂາທິການ ຄອລ ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ພ້ອມດ້ວຍຄະນະບໍລິຫານງານສະຫະພັນ ຄູເຝິກ ນັກກີລາ ຕະຫຼອດຮອດຜູ້ໃຫ້ການສະໜັບສະໜູນກີລາດຶງເຊືອກ ແລະ ແຂກຖືກເຊີນເຂົ້າຮ່ວມ.
ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ປະທານຄະນະບໍລິຫານງານສະຫະພັນກີລາດຶງເຊືອກແຫ່ງຊາດລາວ ຜູ້ໃໝ່ກ່າວວ່າ: ຕະຫຼອດໄລຍະ 9 ປີ (2007-2015) ສະຫະພັນໄດ້ເຄື່ອນໄຫວ ແລະ ມີຫຼາຍດ້ານທີ່ພົ້ນເດັ່ນ ໄດ້ຮັບການສະໜັບສະໜູນຈາກບຸກຄົນ ບໍລິສັດຕ່າງໆຢູ່ພາຍໃນ ແລະ ຕ່າງປະເທດ ເປັນວັດຖຸ ແລະ ເງິນ ເພື່ອສ້າງສະໜາມກີລາໃນຮົ່ມ 3 ແຫ່ງ ຊື້ອຸປະກອນກີລາ ການເຝິກຊ້ອມ ແລະ ຊຸກຍູ້ການເຄື່ອນໄຫວແຂ່ງຂັນທັງພາຍໃນ ແລະ ຕ່າງປະເທດ ນອກນັ້ນການເຄື່ອນໄຫວຂອງສະຫະພັນກີລາດຶງເຊືອກແຫ່ງຊາດ ຍັງໄດ້ຊ່ວຍພັດທະນາຂະແໜງການສຶກສາ ແລະ ກີລາ ໂດຍມີການສະໜັບສະໜູນໂຮງຮຽນສາມັນໄດ້ຫຼາຍ 10 ແຫ່ງ ຮັກສາໄດ້ຄວາມສາມັກຄີໃນການເຄື່ອນໄຫວ ແລະ ມີບົດບາດສຳຄັນໃນການແຂ່ງຂັນເພື່ອສຸຂະພາບ ຢູ່ທັງພາຍໃນ ແລະ ຕ່າງປະເທດ.
ສຳລັບແຜນການເຄື່ອນໄຫວໃນຕໍ່ໜ້າ ກໍ່ຄືເດືອນພະຈິກ 2016 ກຽມຈັດແຂ່ງຂັນກີລາດຶງເຊືອກ ແລະ ກະກຽມຄວາມພ້ອມຂອງແຕ່ລະພາກສ່ວນ ເພື່ອຈັດຕັ້ງແຂ່ງຂັນກີລາດຶງເຊືອກນາໆຊາດຢູ່ນະຄອນຫຼວງວຽງຈັນ ໃນລະຫວ່າງທ້າຍເດືອນທັນວາ 2016 ຫາຕົ້ນປີ 2017 ແລະ ກະກຽມເຂົ້າຮ່ວມແຂ່ງຂັນກີລາດຶງເຊືອກຂັ້ນພາກພື້ນ ເປັນຕົ້ນແມ່ນງານກີລາດຶງເຊືອກຊິງແຊັມອາຊີ ໃນຕົ້ນເດືອນທັນວາ 2016 ທີ່ປະເທດສິງກະໂປ ແລະ ງານມະຫະກຳກີລາຊີເກມ ຄັ້ງທີ 29 ກາງປີ 2017 ທີ່ປະເທດມາເລເຊຍ.
ສ່ວນຄະນະບໍລິຫານງານສະຫະພັນກີລາດຶງເຊືອກແຫ່ງຊາດລາວຊຸດໃໝ່ ປະກອບມີ: ທ່ານ ເອກະພັນ ພະພິທັກ ປະທານທີ່ປຶກສາກິດຕິມະສັກ ທ່ານ ໜູພັນ ອຸດສາ ເປັນປະທານ ທ່ານ ອຸໄທ ບັນນາວົງ ທ່ານ ຫຸມແພງ ເມກຄະລິນ ແລະ ທ່ານ ໄຕລັດ ເປັນຮອງປະທານ ສ່ວນທ່ານ ແພງທະວີ ສີໂພໄຊ ເປັນເລຂາທິການ ແລະ ປະກອບມີຄະນະກຳມະການອີກ 8 ທ່ານ.
ຂ່າວຈາກ: 
ຕິດຕາມຂ່າວເສດຖະກິດລາວ ກົດໄລຄ໌ເລີຍ!