ເຈົ້າໜ້າທີ່ພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ໄດ້ລົງກວດຄືນບໍລິມາດການຈ່າຍ
ນ້ຳມັນບັນດາປ້ຳນ້ຳມັນຢູ່ນະຄອນຫຼວງວຽງຈັນ ທີ່ໄດ້ມີການກວດບໍລິມາດປະຈຳປີໄປແລ້ວ ໃນໄລຍະຜ່ານມາ
ເພື່ອເປັນການສ້າງຄວາມໝັ້ນໃຈ ໃຫ້ປະຊາຊົນລາວບັນດາເຜົ່າຜູ້ຊົມໃຊ້ນ້ຳມັນ ວ່າໄດ້ບໍລິມາດທີ່ເຕັມສ່ວນ
ແລະ ຢູ່ໃນເກນມາດຕະຖານທີ່ໄດ້ຮັບຮອງໄວ້ຫຼືບໍ່.
ທ່ານ ຈັນມາລາ ກຸສົນ ຫົວໜ້າຂະແໜງຊັບສິນທາງປັນຍາມາດຕະຖານ ແລະ ວັດແທກ ພະແນກວິທະຍາ
ສາດ ແລະ ເຕັກໂນໂລຊີນະຄອນຫຼວງວຽງຈັນ ໄດ້ກ່າວໃນໂອກາດລົງກວດບໍລິມາດນ້ຳມັນ ຢູ່ປ້ຳນ້ຳມັນວຽງ
ຈະເລີນບໍລິການ ໃນວັນທີ 15 ກໍລະກົດ 2014 ວ່າ: ການກວດບໍລິມາດປະຈຳປີພວກເຮົາ ໄດ້ເລີ່ມແຕ່ເດືອນ
ເມສາ ແລະ ສຳເລັດໃນເດືອນມິຖຸນາ 2014 ຈາກນັ້ນ 2 ເດືອນຖັດມາ ຈະໄດ້ລົງກວດຄືນອີກ ເພື່ອຢັ້ງຢືນບໍລິ
ມາດນ້ຳມັນແຕ່ລະປ້ຳຍັງຄືເກົ່າບໍ່ ເພາະວ່າວັດຖຸທຸກຢ່າງທີ່ນຳໃຊ້ ມັນກໍ່ຕ້ອງມີການຫຼຸ້ຍຫ້ຽນ ນອກນີ້ພວກ
ເຮົາຍັງລົງກວດສຸກເສີນຕື່ມ ອີງຕາມການຮ້ອງຂໍຂອງປະຊາຊົນ ທີ່ໄດ້ຕິດຕໍ່ມາຫາພວກເຮົາທາງເບີ 021
260480 ໃນນີ້ ການກວດປະຈຳປີພວກເຮົາ ໄດ້ຕັ້ງຄ່າໄວ້ບວກ ຫຼື ລົບ 0,2 ຖ້າກວດຄືນພົບວ່າຄ່າບໍ່ເກີນບວກ
ຫຼື ລົບ 0,5 ກໍ່ຖືວ່າປ້ຳນ້ຳມັນປ້ຳນັ້ນໄດ້ມາດຕະຖານ ແຕ່ຖ້າຄ່າເກີນ 0,5 ພວກເຮົາກໍ່ຈະໄດ້ກວດເບິ່ງຫົວຈ່າຍ
ນ້ຳມັນວ່າມີການປ່ຽນແປງ ເຮັດໃຫ້ນ້ຳມັນບໍ່ໄດ້ບໍລິມາດ ພ້ອມທັງເຮັດບົດບັນທຶກໄວ້ ແລະ ຖ້າພົບເຫັນວ່າ
ມີການຈົງໃຈດັດປັບ ກໍ່ຈະໄດ້ປັບໄໝຕາມລະບຽບ ແລະ ໃຫ້ຢຸດກິດຈະການຖາວອນ.
ຜ່ານການກວດກາຢູ່ຂອບເຂດນະຄອນຫຼວງວຽງຈັນ ໃນຈຳນວນ 16 ບໍລິສັດ ປ້ຳ ລວມທັງປ້ຳໃຫຍ່ ປ້ຳ
ນ້ອຍ ໃນໄລຍະຜ່ານມາ ແມ່ນບໍ່ພົບເຫັນປ້ຳໃດທີ່ມີການດັດປັບແຕ່ຢ່າງໃດ ມີແຕ່ບາງປ້ຳຕູ້ຈ່າຍເກົ່າແລ້ວ
ພວກເຮົາກໍ່ໄດ້ແນະນຳໃຫ້ປ່ຽນຕູ້ຈ່າຍໃໝ່ ແລະ ຈະໄດ້ລົງກວດກາຄືນອີກ ນອກຈາກການກວດດ້ານບໍລິ
ມາດແລ້ວ ໃນຕໍ່ໜ້າພວກເຮົາຍັງຈະໄດ້ກວດຄຸນນະພາບຂອງນ້ຳມັນຕື່ມອີກ.
ແຫຼ່ງຂ່າວ: Vientiane Mai Online