ແຫຼ່ງຂ່າວຈາກເວັບໄຊຂອງໜັງສືພິມໄຊງ່ອນເສດຖະກິດທາມສ໌ຂອງຫວຽດນາມ ໃຫ້ຮູ້ວ່າ: ທ່ານຈິງດິງຢຸງ ຮອງນາຍົກລັດຖະມົນຕີຫວຽດນາມໄດ້ລົງນາມໃນເອກະສານຫວ່າງມໍ່ໆນີ້ ໂດຍຮຽກຮ້ອງໃຫ້ກະຊວງຄົມມະນາຄົມແລະຂົນສົ່ງ ພ້ອມດ້ວຍຂະແໜງການທີ່ກ່ຽວຂ້ອງເຮັດບົດລາຍງານການສຶກສາຄວາມເປັນໄປໄດ້ຂອງໂຄງການທາງລົດໄຟຄວາມໄວສູງເໜືອ-ໃຕ້ ແລະຍື່ນໃຫ້ລັດຖະບານໃນປີ 2017 ເພື່ອຈະສະເໜີໃຫ້ສະພາແຫ່ງຊາດພິຈາລະນາໃນປີ 2018. ຂະນະທີ່ປັດຈຸບັນໃຫ້ພິຈາລະນາແຫຼ່ງທຶນກໍ່ສ້າງຕອນນະຄອນຫຼວງຮ່າໂນຍ-ວິງ ແລະ ໂຮຈິມິງ-ຍາຈາງ ກ່ອນ.
ຫ້ອງວ່າການລັດຖະບານຫວຽດນາມເຫັນວ່າ: ລະບຽບການລົງທຶນໂຄງການດັ່ງກ່າວຈະຕ້ອງການເວລາດົນສົມຄວນ, ໃຊ້ທຶນຈຳນວນຫຼາຍແຕ່ຈະມີຄວາມຫຍຸ້ງຍາກໃນການເກັບ ຕົ້ນທຶນຄືນ ໂດຍສະເພາະໂຄງການພື້ນຖານໂຄງລ່າງທາງລົດໄຟຕ້ອງໃຫ້ລັດເປັນຜູ້ລົງທຶນ ຈຶ່ງຈະເຮັດໃຫ້ລັດຜະເຊີນບັນຫາໜີ້ສິນ. ສະນັ້ນ, ການໄລ່ລຽງການລົງທຶນໂດຍແບ່ງເປັນໄລຍະຈະຕ້ອງໃຫ້ໄດ້ຕົວເລກທີ່ເໝາະສົມທີ່ສຸດ.
ໂຄງການທາງລົດໄຟຄວາມໄວສູງເໜືອ-ໃຕ້ຫວຽດນາມ ໄດ້ສະເໜີໃນປີ 2010 ໂດຍໃຊ້ງົບປະມານກໍ່ສ້າງ 56 ຕື້ໂດລາສະຫະລັດ, ແຕ່ສະພາແຫ່ງຊາດບໍ່ຮັບຮອງໂດຍອ້າງວ່າຍອດການລົງທຶນຫຼາຍໂພດທັງຂາດຫຼັກອ້າງອີງທີ່ເຊື່ອຖືໄດ້ ໃນປີດຽວກັນ.
ຂ່າວຈາກ: ສຳນັກຂ່າວເອບີຊີລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!