ຂປລ. ທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ ໄດ້ລາຍງານຕໍ່ ອະດີດປະທານປະເທດ ໂອກາດລົງເຄື່ອນໄຫວ້ຢ້ຽມຢາມ ແລະ ເຮັດວຽກຢູ່ແຂວງເຊກອງ ໃນທ້າຍອາທິດຜ່ານມານີ້ວ່າ: ຄະນະພັກແຂວງເຊກອງ ໄດ້ວາງທິດທາງແຜນການໃນຊຸມປີຕໍ່ໜ້າ ໂດຍສຸມໃສ່ 4 ແຜນງານໃຫຍ່ທີ່ເປັນບູລິມະສິດຂອງແຂວງ ແລະ ໜຶ່ງວຽກປິ່ນອ້ອມ ໃນການພັດທະນາເສດຖະກິດ-ສັງຄົມ ທັງແກ້ໄຂຄວາມທຸກຍາກຂອງປະຊາຊົນໃນ ສົກປີ 2016-2017 ກໍຄືຍຸດທະສາດແຕ່ນີ້ຮອດ 2020 ດັ່ງນີ້.
ສືບຕໍ່ແກ້ໄຂຄວາມທຸກຍາກ ຕ້ອງໄດ້ສຸມທຶນຮອນ, ແຜນງານ, ແຜນຄົນ, ແຜນງົບປະມານໃສ່ ເຂດຫ່າງໄກສອກຫລີກ ທຸລະກັນດານ, ເຂດພື້ນຖານການປະຕິວັດ ຂອງສອງເມືອງພູດອຍ (ກະລຶມ ແລະ ດາກຈຶງ) ເປັນຕົ້ນ ທີ່ຢູ່ອາໄສບ່ອນທຳມາຫາກິນ, ສ້າງໂຄງການຂະໜາດນ້ອຍ ແລະ ກາງ, ທັງສົ່ງເສີມ ການປູກ-ການລ້ຽງ ເພື່ອໃຫ້ສາມາດເພິ່ງຕົນເອງ, ກຸ້ມຕົນເອງດ້ານສະບຽງອາຫານ ໃຫ້ພຽງພໍຕະຫລອດປີ, ເຮັດໃຫ້ລູກຫລານ ໄດ້ເຂົ້າເຖິງການສຶກສາ, ສາທາລະນະສຸກ ເພື່ອສ້າງພື້ນຖານການດຳລົງຊີວິດທີ່ດີ ແລະ ກ້າວໄປເຖິງການຜະລິດເປັນສິນຄ້າ; ຍົກສູງສະມັດຕະພາບຂອງການຜະລິດ ຕິດພັນກັບຂະບວນການຜະລິດເປັນສິນຄ້າ ເພື່ອຮັບປະກັນໃນການທຳມາຫາກິນ ແລະ ມີອາຊີບທີ່ໝັ້ນຄົງ ໂດຍການສະໜອງແນວພັນ ແລະ ເຕັກນິກວິທະຍາສາດ ເຂົ້າໃນການປູກ-ການລ້ຽງ, ການປັບປຸງ ແລະ ຈັດສັນດິນ ການຜະລິດຄືນໃໝ່ ຕິດພັນກັບການປົກປັກຮັກສາສິ່ງແວດລ້ອມ, ສ້າງນັກວິຊາການ ທີ່ມີບົດຮຽນ- ປະສົບການ ນຳພາປະຊາຊົນເຮັດຕົວຈິງ, ທັງຮັບປະກັນລາຄາ ແລະ ການຕະຫລາດ; ສົ່ງເສີມການທ່ອງທ່ຽວກະສິກຳ, ວັດທະນະທຳ, ປະຫວັດສາດ ແລະ ທ່ອງທ່ຽວທຳມະຊາດ ຕາມແລວສາຍທາງຕາເວັນອອກ-ຕາເວັນຕົກ ຕາມເສັ້ນທາງຫລວງແຫ່ງຊາດ ອອກສູ່ທະເລດາໜັງ ສສ ຫວຽດນາມ ເພື່ອສ້າງຜົນປະໂຫຍດສູງສຸດແກ່ປະຊາຊົນ.
ຕິດຕາມເຮົາທາງFacebook ກົດຖືກໃຈເລີຍ!