ສຳນັກຂ່າວຕ່າງປະເທດ ລາຍງານໃນວັນທີ 19 ຕຸລາຜ່ານມານີ້ວ່າ ພົນໂທ ເຊີເກ ຣຸດສະຄອບ ໂຄສົກກະຊວງປ້ອງກັນປະເທດຣັດເຊຍ ໄດ້ຖະແຫລງວ່າ ການຢຸດຍິງເພື່ອມະນຸດສະທຳ ຢູ່ເມືອງອະເລບໂປ ປະເທດຊີຣີ ຈະຖືກຂະຫຍາຍອອກໄປອີກ 3 ຊົ່ວໂມງ ຈາກເດີມ 8 ຊົ່ວໂມງ ກຳນົດແຕ່ 08:00-16:00 ໂມງ ໄປເປັນ 11 ຊົ່ວໂມງແທນ ເລີ່ມແຕ່ 08:00-19:00 ໂມງ ຂອງວັນພະຫັດທີ 20 ຕຸລານີ້ ເພື່ອເປີດທາງໃຫ້ແກ່ພົນລະເຮືອນ ແລະ ກຸ່ມກະບົດ ເດີນທາງອອກຈາກເຂດຝັ່ງຕາເວັນອອກ ຂອງເມືອງອະເລບໂປ ຊຶ່ງຖືກກຸ່ມກະບົດຕໍ່ຕ້ານລັດຖະບານຊີຣີຍຶດຄອງໄວ້.
ໂຄສົກກະຊວງປ້ອງກັນປະເທດຣັດເຊຍ ໄດ້ກ່າວວ່າ ການຂະຫຍາຍເວລາຢຸດຍິງດັ່ງກ່າວນີ້ ເປັນໄປຕາມສຽງຮຽກຮ້ອງ ຈາກຕົວແທນອົງການບັນເທົາທຸກຕ່າງໆ ໂດຍເວລາພິເສດດັ່ງກ່າວ ຈະເປີດທາງໃຫ້ແກ່ຕົວແທນຂອງ ອົງການສະຫະປະຊາຊາດ ແລະ ສະພາຊີກວົງເດືອນແດງຊີຣີ ເຂົ້າປະຕິບັດພາລະກິດອົບພະຍົບຄົນເຈັບ ແລະ ເປີດທາງໃຫ້ພົນລະເຮືອນຊາວຊີຣີ ເດີນທາງອອກຈາກເມືອງ ຢ່າງສັນຕິ.
ຕິດຕາມເຮົາທາງFacebook ກົດຖືກໃຈເລີຍ!