ພາຍຫລັງສູນບໍລິການຈັດຫາງານ ກະຊວງແຮງງານ ແລະ ສະຫວັດດີການສັງຄົມ ແລະ ອົງການບໍລິການ ພັດທະນາຊັບພະຍາກອນມະນຸດ ສ.ເກົາຫລີ ໄດ້ຮ່ວມລົງນາມ ໃນວັນທີ 17 ຕຸລານີ້ ທີ່ນະຄອນຫລວງວຽງຈັນ ເພື່ອກະກຽມໃນການຮັບເອົາ ແລະ ສົ່ງແຮງງານລາວໄປຍັງ ສ.ເກົາຫລີ ໂດຍຝ່າຍລາວ ຈະເລີ່ມໂຄສະນາປະຊາສຳພັນ, ຕິດຕັ້ງອຸປະກອນການສອບເສັງ, ແຕ່ງຕັ້ງຄະນະກຳມະການສອບເສັງ ແລະ ອື່ນໆ ເພື່ອຮີບຮ້ອນເອົາແຮງງານລາວ ປີລະ 500 ຄົນ ໄປເຮັດວຽກຢູ່ ສ.ເກົາຫລີ ນັບແຕ່ທ້າຍປີ 2017 ເປັນຕົ້ນໄປ.
ຜູ້ອຳນວຍການສູນບໍລິການຈັດຫາງານ ກະຊວງແຮງງານ ແລະ ສະຫວັດດີການ ສັງຄົມ ແລະ ປະທານອົງການບໍລິການພັດທະນາຊັບພະຍາກອນມະນຸດ ແຫ່ງ ສ.ເກົາຫລີ ໄດ້ຮ່ວມຖະແຫລງຂ່າວໃນວັນ 18 ຕຸລານີ້ວ່າ: ສ.ເກົາຫລີ ອະນຸຍາດການຮັບເອົາແຮງງານຕ່າງຊາດ ເຂົ້າມາເຮັດວຽກໃນປະເທດຂອງຕົນ ໂດຍເລັ່ງໃສ່ກຸ່ມແຮງງານ ທີ່ບໍ່ມີການພັດທະນາສີມືແຮງງານ ພາຍໃຕ້ລະບົບ EPS ໃນຂະແໜງກະສິກຳ ເຊິ່ງເປັນຂະແໜງທີ່ຂາດເຂີນດ້ານແຮງງານ ຍ້ອນຄົນໃນທ້ອງຖິ່ນ ບໍ່ນິຍົມເຮັດວຽກໃນຂະແໜງດັ່ງກ່າວ. ສຳລັບການຈັດສົ່ງແຮງງານລາວ ໄປເຮັດວຽກຢູ່ ສ.ເກົາຫລີ ນີ້ ຈະໄດ້ເລີ່ມຈັດຕັ້ງປະຕິບັດແຕ່ນີ້ເປັນຕົ້ນໄປ ຈະໄດ້ມີການລົງທະບຽນຮັບສະໝັກ ແລະ ລົງທະບຽນຢູ່ ສູນບໍລິການຈັດຫາງານ ທີ່ບ້ານນາຄຳ ເມືອງສີໂຄດຕະບອງ ນະຄອນຫລວງວຽງຈັນ, ສ່ວນລາຍລະອຽດ ຈະມີພະນັກງານຂອງສູນ ຄອຍແນະນຳທຸກຂັ້ນຕອນ ແລະ ຈະຈັດສົ່ງແຮງງານລາວ ໃຫ້ໄປເຖິງ ສ.ເກົາຫລີ ໃນທ້າຍປີ 2017 ຢ່າງແນ່ນອນ.
ລັດຖະບານເກົາຫລີ ໄດ້ກຳນົດໃຫ້ມີກົດໝາຍ ເພື່ອການຈ້າງແຮງງານຕ່າງຊາດ ແລະ ຕົກລົງເຮັດສັນຍາ ລະຫວ່າງປະເທດ ທີ່ຈະສົ່ງອອກ ແລະ ນຳເຂົ້າແຮງງານກັບປະເທດເກົາຫລີ ພາຍໃຕ້ບົດບັນທຶກຄວາມເຂົ້າໃຈ, ໂດຍຫວັງວ່າ ລະບົບການຈ້າງງານນີ້ ຈະຊ່ວຍແກ້ໄຂບັນຫາການເອົາປຽບ ຂອງບັນດານາຍໜ້າຄ້າແຮງງານອີກດ້ວຍ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!