ສຳນັກຂ່າວຕ່າງປະເທດ ລາຍງານໃນວັນທີ 18 ຕຸລານີ້ວ່າ ກອງທັບຣັດເຊຍ ແລະ ກອງທັບລັດຖະບານຊີຣີ ປະກາດຈະຢຸດຕິການໂຈມຕີຢູ່ເມືອງອະເລບໂປ ໃນປະເທດຊີຣີ ເປັນເວລາ 8 ຊົ່ວໂມງ ໃນວັນພະຫັດທີ 20 ຕຸລາທີ່ຈະມາເຖິງນີ້ ເພື່ອເປີດທາງໃຫ້ພົນລະເຮືອນ ແລະ ກຸ່ມກະບົດ ອົບພະຍົບອອກຈາກເມືອງ ພາຍຫລັງທີ່ເຮືອບິນຂອງກອງທັບອາກາດຣັດເຊຍ ແລະ ກອງກຳລັງລັດຖະບານຊີຣີ ໄດ້ເປີດສາກໂຈມຕີເມືອງດັ່ງກ່າວ ຊຶ່ງເປັນພື້ນທີ່ຍຶດຄອງຂອງກຸ່ມກະບົດ ນັບຕັ້ງແຕ່ຂໍ້ຕົກລົງຢຸດຍິງຢູ່ຊີຣີ ຖືກລະເມີດເມື່ອເດືອນກ່ອນໜ້ານີ້.
ດ້ານສະຫະລັດອາເມຣິກາ ແລະ ຊາດສະມາຊິກເອີຣົບບາງສ່ວນ ໄດ້ກ່າວຫາຣັດເຊຍ ແລະ ຊີຣີ ກໍ່ອາຊະຍາກຳສົງຄາມຢູ່ເມືອງອະເລບໂປ, ແຕ່ຝ່າຍຣັດເຊຍໄດ້ປະຕິເສດ ພ້ອມກ່າວຫາຊາດຕາເວັນຕົກຄືນວ່າ ກຳລັງຊ່ວຍເຫລືອພວກກໍ່ການຮ້າຍ. ທ່ານ ພົນໂທ ເຊີເກ ຣຸດສະຄອບ ເຈົ້າໜ້າທີ່ລະດັບສູງ ກະຊວງປ້ອງກັນປະເທດຣັດເຊຍ ໄດ້ລະບຸວ່າ ກຸ່ມກະບົດຢູ່ເມືອງອະເລບໂປ ກຳລັງເຂັ່ນຂ້າພົນລະເຮືອນຊາວຊີຣີຢ່າງປ່າເຖື່ອນ ຂະນະທີ່ລັດຖະບານບັນດາຊາດຕາເວັນຕົກ ກຳລັງເຮັດທຳທ່າບໍ່ຮູ້ບໍ່ເຫັນ, ສະນັ້ນ ສະຖານະການຢຸດຍິງຝ່າຍດຽວຈິ່ງບໍ່ສົມເຫດສົມຜົນ ເນື່ອງຈາກຈະເຮັດໃຫ້ກຸ່ມກໍ່ການຮ້າຍ ຈະມີໂອກາດຫາຍໃຈອີກເທື່ອໜື່ງ ແລ້ວລວມກຸ່ມກັນໃໝ່ ຟື້ນຟູສັກກະຍະພາບທາງທະຫານຂອງພວກເຂົາ.
ຕິດຕາມເຮົາທາງFacebook ກົດຖືກໃຈເລີຍ!