ນັບແຕ່ວັນທີ 1 ພຶດສະພາ ຫາ 11 ກໍລະກົດ 2014 ມີນັກສຶກສາທີ່ຈົບຈາກສະຖາບັນການສຶກສາຕ່າງໆ
ລວມທັງນັກສຶກສາທີ່ຈົບຈາກມະຫາວິທະຍາໄລແຫ່ງຊາດ (ມຊ) ໄດ້ທະຍອຍເຂົ້າມາລົງທະບຽນສອບ
ເສັງລັດຖະກອນໃໝ່ ຮອບທີ 1 (ພາກຄວາມຮູ້ທົ່ວໄປ) ໃນນະຄອນຫຼວງວຽງຈັນຢ່າງຄຶກຄື້ນ ມີຈຳ
ນວນທັງໝົດ 11.614 ຄົນ ເຊິ່ງປີນີ້ໄດ້ກຳນົດເອົາ ມຊ ແລະ ມສ ວຽງຈັນ ເປັນບ່ອນສອບເສັງ.
ກອງປະຊຸມວິຊາການ ແນະນຳຂັ້ນຕອນການສອບເສັງ ສຳລັບຜູ້ຮັບຜິດຊອບການສອບເສັງໃນນະຄອນ
ຫຼວງວຽງຈັນ ໄດ້ຈັດຂຶ້ນວັນທີ 15 ກໍລະກົດ 2014 ນີ້ ທີ່ຫ້ອງວ່າການນະຄອນຫຼວງ ໂດຍເປັນປະທານຂອງ
ທ່ານ ສົມວັນດີ ນາຖາວົງ ຮັກສາການເຈົ້າຄອງນະຄອນຫຼວງວຽງຈັນ ຫົວໜ້າຄະນະຊີ້ນຳສອບເສັງນະ
ຄອນຫຼວງວຽງຈັນ ທ່ານ ວິໄຊ ພັນດານຸວົງ ຫົວໜ້າກົມຄຸ້ມຄອງລັດຖະກອນ ກະຊວງພາຍໃນ ພ້ອມ
ດ້ວຍຄະນະຊີ້ນຳອະນຸກຳມະການ ກໍ່ຄືພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ບຸນໜາ ຜາທຸມມະວົງ ຫົວໜ້າພະແນກພາຍໃນ ຄະນະຮັບຜິດຊອບການສອບເສັງລັດຖະກອນ
ຮອບທີ 1 ພາກຄວາມຮູ້ທົ່ວໄປ ໃຫ້ຮູ້ວ່າ: ນັບແຕ່ຕົ້ນເດືອນພຶດສະພາຜ່ານມາເຖິງວັນທີ 11 ກໍລະກົດ
2014 ໄດ້ມີນັກສຶກສາເຂົ້າມາລົງທະບຽນສອບເສັງລັດຖະກອນຮອບທຳອິດແລ້ວ ໃນນະຄອນຫຼວງ ມີ
ປະມານ 11 ພັນກວ່າຄົນ ກ່ອນຈະເຖິງກຳນົດວັນເສັງຄືວັນທີ 19 ກໍລະກົດ 2014 ທີ່ຈະມາເຖິງນີ້ ໂດຍ
ການສອບເສັງດັ່ງກ່າວ ແມ່ນໄດ້ເລືອກເອົາ 2 ສູນໃຫຍ່ມີຄວາມແຕກຕ່າງກັນຄື: ສູນ ມຊ ມີ 10 ຈຸດ
ໄດ້ກຳນົດເອົານັກສຶກສາຊັ້ນສູງຂຶ້ນໄປ ສ່ວນສູນ ມສ ວຽງຈັນ ແມ່ນກຳນົດເອົານັກສຶກສາຊັ້ນກາງລົງມາ.
ເພື່ອເລືອກໄດ້ບຸກຄະລາກອນທີ່ມີຄຸນສົມບັດ ຄວາມຮູ້ ຄວາມສາມາດ ທາງຄະນະຮັບຜິດຊອບສອບເສັງ
ຈະປະຕິບັດແຕກຕ່າງກັບປີຜ່ານມາ 2 ຢ່າງເຊັ່ນ: ການພິມຫົວບົດສອບເສັງທ້ອງຖິ່ນ ຈະບໍ່ໄດ້ພິມຫົວ
ບົດສອບເສັງ ກະຊວງພາຍໃນເປັນຜູ້ຮັບຜິດຊອບພິມ ຕາມຈຳນວນຫ້ອງສອບເສັງ ທີ່ທ້ອງຖິ່ນແຈ້ງໃຫ້
ແລະ ຈັດສົ່ງໃຫ້ເຖິງ ສະເພາະນະຄອນຫຼວງ ຈະໄດ້ປັບຫົວບົດສອບເສັງຢູ່ກະຊວງພາຍໃນຂອງຕອນເຊົ້າ
ວັນສອບເສັງ ແລະ ການກວດຫົວບົດສອບເສັງ ແມ່ນຈະໃຊ້ລະບົບສະແກນ ແລະ ດຳເນີນການກວດ
ສອບຢູ່ກະຊວງພາຍໃນບ່ອນດຽວ ກ່ອນຈະປະກາດຜົນຕາມຫຼັງ.
ແຫຼ່ງຂ່າວ: Vientiane Mai Online