ສຳນັກຂ່າວຕ່າງປະເທດ ລາຍງານໃນວັນທີ 14 ຕຸລານີ້ວ່າ ເກີດເຫດລົດເມນຳທ່ຽວ ຕຳຮາວເຫລັກຂອບທາງແລ້ວໄຟໄໝ້ ຢູ່ທາງດ່ວນພິເສດ Gyeongbu ໃກ້ກັບເມືອງ Ulsan ທາງພາກຕາເວັນອອກສຽງເໜືອ ປະເທດເກົາຫລີໃຕ້ ສົ່ງຜົນເຮັດໃຫ້ມີຜູ້ເສຍຊີວິດ 10 ຄົນ ແລະ ບາດເຈັບ 9 ຄົນ ໃນຄືນວັນພະຫັດທີ 13 ຕຸລາທີ່ຜ່ານມານີ້.

ເຈົ້າໜ້າທີ່ໃນທ້ອງຖິ່ນໄດ້ລະບຸວ່າ ພາຍໃນລົດເມຄັນດັ່ງກ່າວ ມີຜູ້ໂດຍສານມາທັງໝົດ 21 ຄົນ ຊຶ່ງເປັນພະນັກງານບຳນານຂອງ ບໍລິສັດນ້ຳມັນເຊື້ອໄຟແຫ່ງໜຶ່ງ ພ້ອມດ້ວຍພັນລະຍາ ໃນລະຫວ່າງເດີນທາງກັບມາຈາກທ່ອງທ່ຽວຢູ່ປະເທດຈີນ ໂດຍສາເຫດນັ້ນ ເຈົ້າໜ້າທີ່ຕັ້ງຂໍ້ສັນນິຖານວ່າ ອາດເກີດຈາກຢາງຕີນລົດຮົ່ວ ແລະ ເຮັດໃຫ້ລົດເສຍຫລັກ ຕຳເຂົ້າກັບຮາວເຫລັກຂ້າງທາງ ແລ້ວເມື່ອລົດໄຫລສຽດສີໄປໄດ້ໄລຍະໜຶ່ງ ຈຶ່ງກໍ່ໃຫ້ເກີດປະກາຍໄຟ ແລະ ໄຟລຸກໄໝ້ຂຶ້ນ.

 
ຕິດຕາມເຮົາທາງFacebook ກົດຖືກໃຈເລີຍ!