ສຳນັກຂ່າວຕ່າງປະເທດ ລາຍງານໃນວັນທີ 12 ຕຸລາຜ່ານມານີ້ວ່າ ກະຊວງການຕ່າງປະເທດຣັດເຊຍໄດ້ຖະແຫລງວ່າ ທ່ານ ເຊີເກ ລາບຣອບ ລັດຖະມົນຕີການຕ່າງປະເທດຣັດເຊຍ ພ້ອມດ້ວຍ ທ່ານ ຈອນ ແຄຣີ ລັດຖະມົນຕີການຕ່າງປະເທດ ສະຫະລັດອາເມຣິກາ ເຫັນດີຈະຈັດກອງປະຊຸມຫາລືກັນ ເພື່ອຫາທາງອອກໃຫ້ແກ່ວິກິດການຢູ່ປະເທດຊີຣີ ຊຶ່ງຈະຈັດຂຶ້ນໃນວັນທີ 15 ຕຸລາທີ່ຈະມາເຖິງນີ້ ທີ່ເມືອງໂລຊານ ປະເທດສະວິດ ໂດຍການປະຊຸມຄັ້ງນີ້ ຈະມີການເຊີນຄະນະທູດລະດັບສູງ ຈາກບັນດາປະເທດທີ່ກ່ຽວຂ້ອງສຳຄັນ ໃນພາກພື້ນດັ່ງກ່າວເຂົ້າຮ່ວມອີກດ້ວຍ.

ການຈັດກອງປະຊຸມທີ່ຈະມີຂຶ້ນນີ້ ຖືເປັນກອງປະຊຸມກ່ຽວກັບວິກິດການຊີຣີຄັ້ງທຳອິດ ພາຍຫລັງສະຫະລັດອາເມຣິກາ ລະງັບການເຈລະຈາ ຂໍ້ຕົກລົງຢຸດຍິງ ແບບທະວິພາຄີກັບຣັດເຊຍ ເມື່ອວັນທີ 3 ຕຸລາທີ່ຜ່ານມາ ໂດຍໄດ້ກ່າວຫາຣັດເຊຍ ແລະ ລັດຖະບານຊີຣີວ່າ ອາດກຳລັງກໍ່ອາຊະຍາກຳສົງຄາມ ຈາກການທີ່ກອງກຳລັງຂອງພວກເຂົາ ປະຕິບັດການໂຈມຕີເມືອງອະເລບໂປ ຊຶ່ງຢູ່ພາຍໃຕ້ການຍຶດຄອງຂອງ ກຸ່ມຕໍ່ຕ້ານລັດຖະບານຊີຣີ.

 
ຕິດຕາມເຮົາທາງFacebook ກົດຖືກໃຈເລີຍ!