ຍ້ອນຄວາມເອົາໃຈໃສ່ຕໍ່ ວຽກງານຂະແໜງການຄ້າສາມາດເຮັດໃຫ້ແຂວງຫຼວງພະບາງ ໃນໄລຍະ 1 ປີຜ່ານມາ ມີອັດຕາມູນຄ່າການສົ່ງອອກ 344,44 ຕື້ກວ່າກີບ ທຽບໃສ່ແຜນການປີ ປະຕິບັດໄດ້ 50,07%.
ອີງຕາມຂໍ້ມູນພະແນກອຸດສາຫະກຳ ແລະການຄ້າແຂວງຫຼວງ ພະບາງໄດ້ໃຫ້ຮູ້ວ່າ: ການຈັດຕັ້ງປະຕິບັດວຽກງານຂອງຂະແໜງ ອຸດສາຫະກຳ ແລະການຄ້າໃນໄລຍະ 1 ປີຜ່ານມາ ຊຶ່ງເປັນໄລຍະຕົ້ນຂອງແຜນພັດທະນາເສດຖະກິດ-ສັງຄົມຄັ້ງທີ VIII (2016- 2020) ແລະແຜນວຽກງານຈຸດສຸມສົກປີ 2015-2016 ສາມາດຈັດຕັ້ງປະຕິບັດຕົວເລກຄາດໝາຍສູ້ຊົນດ້ານວຽກງານອຸດສາຫະກຳ ແລະການຄ້າໄດ້ຄືດ້ານມູນຄ່າການສົ່ງອອກສາມາດປະຕິບັດໄດ້ 344,44 ຕື້ກວ່າກີບ ທຽບໃສ່ແຜນການປີປະຕິບັດໄດ້ 50,07% ທຽບໃສ່ໄລຍະດຽວກັນຂອງສົກ ປີ 2014-2015 ແມ່ນຫຼຸດລົງ 42,40% ໃນນັ້ນເຄື່ອງປ່າຂອງດົງ 44,25%; ຜະລິດຕະພັນກະສິກຳ 25,56%; ຜະລິດຕະພັນ ໄມ້ 24,30% ແລະສິນຄ້າປະເພດອື່ນໆ 5,89% ສິນຄ້າສ່ວນໃຫຍ່ແມ່ນສົ່ງອອກໄປປະເທດຈີນ ກວມ 74,22%, ໄທ 12,34%; ຫວຽດນາມ 6,70% ແລະປະ ເທດອື່ນໆກວມ 6,74%.

ສຳລັບມູນຄ່າການນຳເຂົ້າປະ ຕິບັດໄດ້ 119,88 ຕື້ກວ່າກີບ ທຽບໃສ່ຕົວເລກແຜນການປີປະຕິບັດໄດ້ 135,13% ທຽບໃສ່ໄລຍະດຽວກັນຂອງສົກປີ 2014-2015 ເພີ່ມຂຶ້ນ 72,40% ໃນນັ້ນ ປະກອບມີເຄື່ອງກໍ່ສ້າງ ແລະເຄື່ອງໄຟຟ້າ 82,33% ເຄື່ອງຮັບໃຊ້ການຜະລິດ ແລະຫາປາ 16,28% ແຜ່ນແພເຄື່ອງນຸ່ງຫົ່ມ ແລະເຄື່ອງ ໃຊ້ສອຍປະຈຳວັນ 1,12% ສິນຄ້າສ່ວນໃຫຍ່ແມ່ນນຳເຂົ້າມາຈາກປະເທດໄທກວມ 59,37% ຈີນ  38,15% ແລະປະເທດຫວຽດ ນາມກວມ 2,49%.

ຂະນະທີ່ມູນຄ່າການຄ້າຂາຍ ສິນຄ້າກັບຕ່າງປະເທດລວມທັງໝົດ 464,33 ຕື້ກວ່າກີບ ທຽບໃສ່ໄລຍະດຽວກັນຂອງສົກປີ 2014-2015 ຫຼຸດລົງ 27,74% ມີຍອດມູນຄ່າການຜະລິດຂອງຜະລິດຕະພັນອຸດສາຫະກຳປະຕິບັດໄດ້ 333,83 ຕື້ກວ່າກີບ ທຽບໃສ່ແຜນການປີແມ່ນປະຕິບັດໄດ້ 73,80% ແລະທຽບໃສ່ໄລຍະດຽວກັນປີຜ່ານມາແມ່ນເພີ່ມຂຶ້ນ 72,38% ສ່ວນຍອດມູນຄ່າການຈຳໜ່າຍຂອງຜະລິດຕະພັນອຸດສາຫະກຳແມ່ນປະຕິບັດໄດ້ 397,35 ຕື້ກວ່າກີບ ທຽບໃສ່ແຜນການປີແມ່ນປະຕິບັດໄດ້ 71,51% ແລະທຽບໃສ່ໄລຍະດຽວກັນຂອງປີຜ່ານມາແມ່ນເພີ່ມຂຶ້ນ 48,73%.

ຂໍ້ມູນແຂວງຍັງໃຫ້ຮູ້ຕື່ມອີກວ່າ: ລວມມູນຄ່າຈໍລະຈອນສິນຄ້າຂາຍຍ່ອຍ 6,265 ຕື້ກວ່າກີບ ທຽບໃສ່ໄລຍະດຽວກັນຂອງ ປີຜ່ານມາແມ່ນເພີ່ມຂຶ້ນເກືອບ 10 ເທົ່າຕົວສາເຫດກໍ່ຍ້ອນຕະ ຫຼາດພາຍໃນແມ່ນມີການຂະຫຍາຍຕົວ, ການບໍລິໂພກສິນຄ້າ ປະເພດຕ່າງໆແມ່ນເພີ່ມຂຶ້ນ, ລາຄາສິນຄ້າບາງສະນິດກໍ່ເພີ່ມຂຶ້ນ ໂດຍສະເພາະສີນຄ້າປະເພດ ເຄື່ອງໃຊ້ສອຍ; ເຄື່ອງໃຊ້ຟຸມເຟືອຍ; ເຄື່ອງໄຟຟ້າ ແລະອື່ນໆ.
ຂ່າວ: ໜັງສືພິມ ເສດຖະກິດ-ສັງຄົມ