ໂດຍອີງໃສ່ແຈ້ງການຂອງ ພະແນກອຸດສາຫະກຳແລະການຄ້ານະຄອນຫຼວງວຽງຈັນ ສະບັບເລກທີ 1878/ອຄ.ນວ.ອຫ ລົງວັນທີ 9 ກັນຍາ 2016 ທີ່ຜ່ານມາ ເລື່ອງໃຫ້ໂຮງງານອົບຂີ້ເບຍ ບອນທູບີ ຂອງບໍລິສັດ ບອນທູບີອີອາກີເທັກທີ່ຕັ້ງຢູ່ບ້ານດຸງ ເມືອງໄຊເສດຖາ ນະຄອນຫຼວງວຽງຈັນ ຢຸດການດຳເນີນການ ເນື່ອງຈາກມີບັນຫາເລື່ອງສິ່ງແວດລ້ອມ.
ມື້ນີ້ວັນທີ 11 ຕຸລາ 2016 ທ່ານຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ໂຄສົກລັດຖະບານ ພ້ອມດ້ວຍພາກສ່ວນທີ່ກ່ຽວຂ້ອງໄດ້ເດິນທາງລົງໄປພົບປະເຈົ້າຂອງໂຮງງານ ແລະຕິດຕາມການດຳເນີນຂອງໂຮງງານດັ່ງກ່າວ ຕາມການຮຽກຮ້ອງຂອງຜູ້ໄດ້ຮັບຜົນກະທົບທາງດ້ານສິ່ງແວດລ້ອມ.
ພາຍຫຼັງການຢ້ຽມຢາມ ແລະໄດ້ຮັບຟັງການລາຍງານຈາກເຈົ້າຂອງໂຮງງານດັ່ງກ່າວແລ້ວ, ທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ໂຄສົກລັດຖະບານໄດ້ແນະນຳໃຫ້ ທາງບໍລິສັດຢຸດຕິການດຳເນີນງານທັນທີ ຕາມການແຈ້ງການຂອງພະແນກອຸດສະຫະກຳແລະການຄ້ານະຄອນຫຼວງສະບັບເລກທີ 1878/ອຄ.ນວ.ອຫ ລົງວັນທີ 9 ກັນຍາ 2016 ແລະຫ້າມຮັບເອົາຂີ້ເບຍເຂົ້າມາໃນໂຮງງານອີກ, ສ່ວນສັນຍາທີ່ຍັງຄ້າງຄາລະຫວ່າງຜູ້ສະໜອງຂີ້ເບຍກັບທາງໂຮງງານ ແມ່ນໃຫ້ຄົ້ນຄວ້າຄືນໃໝ່ໂດຍອີງໃສ່ລະບຽບກົດໝາຍ.
