Homeຂ່າວເຫດການກອງປະຊຸມສຸດຍອດ ເອຊີດີ ຄັ້ງທີ 2 ໄດ້ສຳເລັດລົງ ດ້ວຍຜົນສຳເລັດສະຫງ່າງາມ

ກອງປະຊຸມສຸດຍອດ ເອຊີດີ ຄັ້ງທີ 2 ໄດ້ສຳເລັດລົງ ດ້ວຍຜົນສຳເລັດສະຫງ່າງາມ

Published on

ໃນໂອກາດທີ່ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມສຸດຍອດ ເອຊີດີ ຄັ້ງທີ 2 ເຊິ່ງຈັດຂຶ້ນທີ່ບາງກອກ ປະເທດໄທ ລະຫວ່າງ ວັນທີ 9-10 ຕຸລາ 2016 ນີ້, ມີຜູ້ນຳ ແລະ ຄະນະຜູ້ແທນຈາກ 34 ປະເທດ ເຂົ້າຮ່ວມພາຍໃຕ້ການ ເປັນປະທານ ຂອງທ່ານ ນາຍົກລັດຖະມົນຕີ ແຫ່ງ ຣາຊະອານາຈັກໄທ.
ກອງປະຊຸມສຸດຍອດຄັ້ງນີ້, ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນ ກ່ຽວກັບທິດທາງ ການເສີມຂະຫຍາຍ ການຮ່ວມມືດ້ານເສດຖະກິດ ລະຫວ່າງ ປະເທດສະມາຊິກ ແລະ ໄດ້ຮັບຮອງເອົາ 3 ເອກະສານ ຄື: ວິໄສທັດ ເອຊີດີ ເພື່ອການຮ່ວມມືອາຊີ 2030. ຖະແຫລງການບາງກອກ ແລະ ຖະແຫລງການວ່າດ້ວຍການເຕີບໂຕໂດຍຜ່ານການຮ່ວມມືໃນການເຊື່ອມຈອດ. ບັນດາເອກະສານດັ່ງ ກ່າວ, ຈະວາງພື້ນຖານອັນໜັກແໜ້ນ ເພື່ອເຮັດໃຫ້ອາຊີກາຍເປັນທະວີບ ແຫ່ງສັນຕິພາບ ມີຄວາມກ້າວໜ້າ, ຄວາມສະຫງົບສຸກ, ມີສະຖຽນລະພາບ ແລະ ຄວາມຈະເລີນຮຸ່ງເຮືອງພັດທະນາ ແບບຍືນຍົງ.
ໃນໂອກາດນີ້, ທ່ານ ທອງລຸນ ສີສຸລິດ ໄດ້ກ່າວຄຳເຫັນຕໍ່ກອງປະຊຸມ ເຊິ່ງໄດ້ເນັ້ນໜັກບາງບັນຫາທີ່ສຳຄັນວ່າ: ເອຊີດີ ເປັນອົງການໜຶ່ງດຽວ ຂອງທະວີບອາຊີ ທີ່ເປັນເວທີປຶກສາຫາລືການຮ່ວມ ມືດ້ານເສດຖະກິດ ແນ່ໃສ່ນຳຜົນປະໂຫຍດໃນດ້ານຕ່າງໆມາສູ່ ປະເທດສະມາຊິກ ແລະ ສະໜັບສະໜູນຢ່າງສຸດຂີດ ຕໍ່ການຮ່ວມມື ໃນຂອບ ເອຊີດີ ໂດຍສະເພາະການຮ່ວມມືໃນ 6 ຂົງເຂດວຽກງານ ທີ່ ໄດ້ກຳນົດໄວ້ໃນ ວິໄສທັດ ເອຊີດີ 2030 ກໍຄືຖະແຫລງການບາງກອກ.
ທ່ານ ນາຍົກລັດຖະມົນຕີ ກ່າວຕື່ມວ່າ: ປັດຈຸບັນ, ລັດຖະບານ ສປປ ລາວ ກໍາລັງດຳເນີນ ການຈັດຕັ້ງປະຕິບັດຍຸດທະສາດ ການພັດທະນາແບບຍືນຍົງຕາມທິດສີຂຽວ ໂດຍອີງໃສ່ທ່າແຮງດ້ານ ການພັດທະນາຂອງຕົນ. ໃນນີ້ ການພັດທະນາພະລັງງານໄຟຟ້າ ແມ່ນໜຶ່ງໃນທ່າແຮງ ບົ່ມຊ້ອນ ທີ່ຈະ ເປັນບ່ອນອີງອັນສຳຄັນ ໃຫ້ແກ່ການຂະຫຍາຍຕົວທາງດ້ານເສດຖະກິດ, ການເຊື່ອມຈອດ ກໍແມ່ນອີກ ຂົງເຂດໜຶ່ງ ທີ່ລັດຖະບານລາວໃຫ້ຄວາມສຳຄັນ ແລະ ໃຫ້ການສົ່ງເສີມດ້ວຍການສຸມໃສ່ ການພັດທະນາພື້ນຖານໂຄ່ງລ່າງ ເປັນຕົ້ນ ລະບົບຄົມມະນາຄົມ-ຂົນສົ່ງ, ທັງນີ້ກໍ່ເນື່ອງຈາກວ່າສປປ ລາວ ແມ່ນ ປະເທດທີ່ບໍ່ມີຊາຍແດນຕິດກັບທະເລ. ສະນັ້ນ, ການເຊື່ອມຈອດຈະມີບົດບາດສຳຄັນ ຕໍ່ການພັດທະນາ ເສດຖະກິດ-ສັງຄົມ ຢູ່ ສປປ ລາວ ດ້ວຍເຫດນີ້ ລັດຖະບານ ສປປ ລາວ ຈຶ່ງມີນະໂຍບາຍ ຫັນປະເທດ ທີ່ບໍ່ມີຊາຍແດນຕິດກັບທະເລ ໃຫ້ກາຍເປັນປະເທດເຊື່ອມຈອດ ເຊິ່ງຈະສ້າງເງື່ອນໄຂສະດວກ ບໍ່ພຽງແຕ່ໃຫ້ແກ່ສປປ ລາວ ຍັງຈະເປັນຂົວຕໍ່ ລະຫວ່າງປະເທດໃກ້ຄຽງ ກໍຄື ໃນອະນຸພາກພື້ນນີ້. ນອກ ຈາກນີ້ ສປປ ລາວ ຍັງໄດ້ເອົາໃຈໃສ່ ໃນການສົ່ງເສີມອຸດສາຫະກຳການທ່ອງທ່ຽວ ທີ່ເປັນໜຶ່ງໃນ 6 ຂົງເຂດການຮ່ວມມືໃນຂອບ ເອຊີດີ ເປັນຕົ້ນ ແມ່ນການທ່ອງທຽວວັດທະນະທຳ ແລະ ການທ່ອງທ່ຽວ ທຳມະຊາດ ເຊິ່ງຈະນຳຜົນປະໂຫຍດດ້ານເສດຖະກິດ ກໍຄື ເປີດໂອກາດ ໃຫ້ມີການແລກປ່ຽນ ວັດທະນະທຳທີ່ຫລາກຫລາຍ ຂອງພາກພື້ນອາຊີ. ທ່ານ ໄດ້ສະເໜີຕໍ່ກອງປະຊຸມຕື່ມວ່າ: ເອຊີດີ ຄວນມີກົນໄກ ຕິດຕາມການຈັດຕັ້ງປະຕິບັດບັນ ວຽກງານການຮ່ວມມືຕ່າງໆ ແລະ ເຫັນດີໃຫ້ມີການສ້າງຕັ້ງກອງເລ ຂາຖາວອນ ເພື່ອເປັນເສນາທິການ ໃນການຕິດຕາມສະຫລຸບ ແລະ ຕີລາຄາການຮ່ວມມື ເອຊີດີ ໃນ ແຕ່ລະໄລຍະ, ໃຫ້ມີການສືບຕໍ່ຊຸກຍູ້ ການມີສ່ວນຮ່ວມ ຂອງພາກທຸລະກິດ ເຂົ້າໃນຂະບວນລວມຂອງ ການຮ່ວມມືໃນຂະແໜງການຕ່າງໆ ໃນຂອບ ເອຊີດີ ແນ່ໃສ່ນຳໃຊ້ທ່າແຮງບົ່ມຊ້ອນ ອັນຫລວງຫລາຍ ຂອງພາກເອກະຊົນ ເພື່ອສົ່ງເສີມການຄ້າ, ການລົງທືນແລະ ການທ່ອງທ່ຽວລະຫວ່າງປະເທດສະ ມາຊີກເອຊີດີ.
ໃນຕອນທ້າຍ ທ່ານ ທອງລຸນ ສີສຸລິດ ຍັງໄດ້ສະເໜີໃຫ້ຖືເອົາຂອບການຮ່ວມມື ເອຊີດີ ເປັນ ບ່ອນອີງ ໃນການເສີມຂະຫຍາຍການຮ່ວມມືໃນລະບົບສອງຝ່າຍ,ເພາະເຫັນວ່າຜົນສຳເລັດຂອງການ ພົວພັນສອງຝ່າຍ ກໍຈະເປັນການປະກອບສ່ວນ ໃຫ້ແກ່ການຮ່ວມມືຂອບ ເອຊີດີ ໂດຍລວມ.
ກອງປະຊຸມສຸດຍອດ ເອຊີດີ ຄັ້ງທີ 2 ໄດ້ສຳເລັດລົງດ້ວຍຜົນສຳເລັດສະຫງ່າງາມ ເຊິ່ງໄດ້ວາງພຶ້ນຖານອັນໜັກແໜ້ນ ໃຫ້ແກ່ການຮ່ວມມື ທາງດ້ານເສດຖະກິດລະຫວ່າງປະເທດສະມາຊິກ ໃນ ອະນາຄົດ ແລະ ຈາກນີ້ໄປ ສະຫະລັດອາຣັບເອມິເລດສ ຈະເປັນປະເທດປະທານ ເອຊີດີ ຕໍ່ຈາກ ຣາຊະອານາຈັກໄທ.

ຂ່າວ: ສຳນັກຂ່າວສານປະເທດລາວ

ບົດຄວາມຫຼ້າສຸດ

ຂ່າວດີ! ພົບຊ້າງປ່າ ເຈົ້າໜ້າທີ່ປ່າສະຫງວນແຫ່ງຊາດນໍ້າປຸຍ  ແຂວງໄຊຍະບູລີ ພົບເຫັນ ແລະ ຖ່າຍຮູບພາບຊ້າງປ່າ ໃນຂະນະລົງປະຕິບັດກິດຈະກໍາໂຄງການ

ພາບຊ້າງປ່າທີ່ປ່າສະຫງວນແຫ່ງຊາດນໍ້າປຸຍ ແຂວງໄຊຍະບູລີ ເຊິ່ງຖ່າຍໄດ້ຈາກທີມງານໂຄງການ ແລະ ເຈົ້າໜ້າທີ່ປ່າສະຫງວນ ໃນຂະນະລົງປະຕິບັດກິດຈະກໍາໂຄງການ ໃນວັນທີ 10/06/2026 ທີ່ຜ່ານມາ. ປ່າສະຫງວນແຫ່ງຊາດນໍ້າປຸຍ ແຂວງໄຊຍະບູລີ ເປັນຖິ່ນອາໄສອັນດັບຕົ້ນໆຂອງປະເທດລາວ ທີ່ມີຊ້າງປ່າອາຊີ ອາໄສຢູ່, ແລະ...

ວາງແຜນຮັບມືໄພນໍ້າຖ້ວມ ຄຄນຊ ກຽມພ້ອມການຄຸ້ມຄອງບໍລິຫານຈັດການນໍ້າ ເພື່ອຮັບປະກັນການປ້ອງກັນ ແລະ ຫຼຸດຜ່ອນຜົນກະທົບຈາກໄພນໍ້າຖ້ວມໃນປີ 2026

ກອງປະຊຸມຄະນະກຳມະການຄຸ້ມຄອງນໍ້າແຫ່ງຊາດ (ຄຄນຊ) ຄັ້ງທີ II ຈັດຂຶ້ນໃນວັນທີ 11 ມິຖຸນາ 2026 ຜ່ານມາ, ຢູ່ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ລິນຄຳ ດວງສະຫວັນ...

ເຊື່ອມຕໍ່ເສັ້ນທາງລົດໄຟເຂົ້າກັບແລວສາກົນ ກະຊວງ ຍທຂ ຮ່ວມລົງນາມເປັນສະມາຊິກ ແລວທາງລົດໄຟໝາຍເລກທີ 2 ເຊື່ອມຕໍ່ 6 ປະເທດ ລາວ, ຫວຽດນາມ, ຈີນ, ກາຊັກສະຖານ, ຣັດເຊຍ ແລະ ເອສໂຕນີ

ວັນທີ 11-12 ມິຖຸນາ 2026 ຄະນະຜູ້ແທນ ກະຊວງໂຍທາທິການ ແລະ ຂົນສົ່ງ ນຳໂດຍ ທ່ານ ງາມປະສົງ ເມືອງມະນີ ຮອງລັດຖະມົນຕີ ກະຊວງໂຍທາທິການ...

ຄວ້າແຊ້ມໂລກກັບບ້ານ ທັບນາຄານ້ອຍ (W.I.G NAGA) U-10 ຕົວແທນໜຶ່ງດຽວຈາກ ສປປ ລາວ ຄວ້າແຊ້ມລະດັບໂລກ

WIG NAGA U10 ປີ ເອົາຊະນະ VALENCIA FC ຈາກປະເທດສະເປນ 2-1 ປະຕູຄວ້າແຊ້ມໃນການແຂ່ງຂັນລາຍການ MIC Football 7 ທີ່ເມືອງຄາຕາໂລເນຍ,...