ສຳນັກຂ່າວໄຊນາໄດລີ ລາຍງານໃນວັນທີ 3 ຕຸລາຜ່ານມານີ້ວ່າ ທີ່ບ້ານຢາງຈີ່ ເມືອງກວາງໂຈວ ແຂວງກວາງຕຸ້ງ ລັດຖະບານທ້ອງຖິ່ນຂອງຈີນ ໄດ້ເປັນເຈົ້າພາບຈັດງານລ້ຽງຕ້ອນຮັບຢ່າງຍິ່ງໃຫຍ່ ໃນວັນອາທິດທີ 2 ຕຸລາ 2016 ຜ່ານມານີ້ ໃຫ້ແກ່ປະຊາຊົນຈຳນວນ 15,000 ຄົນ ຫລື 1,496 ຄົວເຮືອນ ໃນໂອກາດຕ້ອນຮັບການຍົກຍ້າຍເຂົ້າມາດຳລົງຊີວິດ ໃນອາຄານທີ່ພັກອາໄສ ຊຶ່ງລັດຖະບານຈັດສ້າງໃຫ້.
ລາຍງານຂ່າວໄດ້ລະບຸວ່າ ເຈົ້າໜ້າທີ່ຂອງລັດຫລາຍກວ່າ 600 ຄົນ ໄດ້ຕັ້ງໃຈຈັດງານດັ່ງກ່າວນີ້ຂຶ້ນ ພ້ອມທັງໄດ້ຈ້າງພໍ່ຄົວແມ່ຄົວ ຈຳນວນຫລວງຫລາຍ ເພື່ອມາເຮັດອາຫານຈັດລ້ຽງໃນງານດັ່ງກ່າວນີ້ໂດຍສະເພາະ.
ທັງນີ້ ລັດຖະບານຈີນ ພາຍໃຕ້ການນຳພາຂອງພັກກອມມູນິດ ໄດ້ດຳເນີນການປະຕິຮູບລະບົບເສດຖະກິດ ຕາມແນວທາງສ້າງສັງຄົມິນຍົມ ຕາມສີສັນຂອງຈີນ ຢ່າງມີຜົນສຳເລັດໃນຫລາຍດ້ານ, ໃນນັ້ນ ການຮັບປະກັນດ້ານທີ່ຢູ່ອາໄສ ເພື່ອເຮັດໃຫ້ຊາວຈີນມີເຮືອນຢູ່ຖາວອນ ແລະ ຊີວິດການເປັນຢູ່ທີ່ດີຂຶ້ນ, ການຈັດສ້າງອາຄານທີ່ພັກອາໄສໃຫ້ແກ່ປະຊາຊົນ ຈຶ່ງເປັນອີກນະໂຍບາຍໜຶ່ງ ທີ່ເປັນຈຸດເດັ່ນຂອງລະບອບສັງຄົມນິຍົມ ອັນເປັນຄວາມມຸ່ງມາດປາຖະໜາຂອງປະຊາຊົນຊາວຈີນ.
ຕິດຕາມເຮົາທາງFacebook ກົດຖືກໃຈເລີຍ!