ຂປລ. ​ໃນ​ຕອນ​ຄ່ຳ​ຂອງ​ວັນ​ທີ 3 ຕຸລານີ້, ສະຖານທູດ​ເຢຍລະ​ມັນປະຈຳ​ລາວ ​ໄດ້​ຈັດ​ງານ​ລ້ຽງສະ​ເຫລີ​ມສະຫລອງ ວັນຊາດ​ເຢຍລະ​ມັນຄົບຮອບ 26 ປີ (3/10/1990-3/10/2016) ​ຢູ່ນະຄອນ​ຫລວງ​ວຽງຈັນ, ໂດຍ​ມີ ທ່ານ ສົມ​ມາດ ພົນ​ເສນາ ລັດຖະມົນຕີ ​ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ, ບັນດາ​ຮອງ​ລັດຖະມົນຕີ, ທູ​ຕາ​ນຸທູດ ​ແລະ ອົງການ​ຈັດ​ຕັ້ງ​ສາກົນ, ​ພ້ອມ​​ແຂກ​ຖືກເຊີນ​ເຂົ້າ​ຮ່ວມ.

​ໃນໂອກາດ​ດັ່ງກ່າວ, ທ່ານ Michael Rrau ​ເອກອັກຄະ​ລັດຖະທູດວິສາມັນ ​ຜູ້​ມີ​ອຳນາດ​ເຕັມ ​ແຫ່ງ ສາທາລະນະ​ລັດ ສະຫະພັນ​ເຢຍລະ​ມັນ ປະຈຳ​ລາວ​ ກ່າວ​ວ່າ: ການຈັດ​ງານ​ສະ​ເຫລີ​ມສະຫລອງ​ໃນ​ຄັ້ງ​ນີ້, ​​​ເປັນ​ການ​ລະນຶກ​ເຖິງ ​ຜົນສຳ​ເລັດ​ອັນ​ໃຫຍ່​ຫລວງ ທີ່​ມີ​ຄວາມໝາຍຄວາມ​ສຳຄັນ ໃນ​ປະຫວັດ​ສາດຂອງ​ເຢຍລະ​ມັນ ​ແລະ ​ເປັນນິ​ມິດໝາຍທີ່​ດີ​ ໃຫ້​ແກ່​ການ​ສ້າງສາ​ພັດ​ທະ​ນາ​ປະ​ເທດ​ຊາດ ​ໃຫ້ຈະ​ເລີ​ນຮຸ່ງ​ເຮືອງກ້າວໜ້າ​​ໃນ​ອະນາຄົດ ທັງ​ເປັນ​ການ​ເສີມ​ຂະ​ຫຍາ​ຍ​ສາ​ຍ​ພົວພັນ​ການ​ທູດ ​ລະຫວ່າງ ​ສອງ​ປະ​ເທດ ລາວ-​ເຢຍລະ​ມັນ ​ໃຫ້​ແໜ້ນ​ແຟ້ນຍິ່ງ​ໆຂຶ້ນ.

​ໄລຍະ​ຜ່ານ​ມາ, ປະ​ເທດ​ເຢຍລະ​ມັນ ໄດ້​ໃຫ້ການ​ຊ່ວຍ​ເຫລືອ​​ແກ່ ສປປ ລາວ ​ໃນ​ຫລາຍໆ​ດ້ານ ​ເປັນ​ຕົ້ນວຽກງານດ້ານ​ການ​ພັດທະນາ ​​ພື້ນຖານໂຄງ​ຫລ່າ​ງ​​, ​ເສດຖະກິດ, ການ​ສຶກສາ, ສາທາລະນະສຸກ, ວຽກງານການ​ຫລຸດຜ່ອນຄວາມທຸກ​ຍາກ, ການ​ອະນຸລັກທຳ​ມະ​ຊາດ ​ແລະ ອື່ນໆ. ​ເຊິ່ງ​ເປັນ​ການປະກອບສ່ວນອັນ​ສຳຄັນ ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ ​ການ​ຮ່ວມ​ມືຮອບດ້ານລະຫວ່າງ ລາວ-​ເຢຍລະ​ມັນ ​ໃຫ້​ໄດ້​ຮັບ​ການ​ພັດທະນາ ​ແລະ ​ແຕກ​ດອກ​ອອກ​ຜົນງອກ​ງາມຍິ່ງໆຂຶ້ນ.

ແຫລ່ງຂ່າວ:

ຕິດຕາມເຮົາທາງFacebook ກົດຖືກໃຈເລີຍ!