ພະແນກສຶກສາທິການ ແລະ ກິລານະຄອນຫລວງວຽງຈັນຮ່ວມກັບມູນນິທິສົ່ງເສີມການສຶກສາ, ໄດ້ຈັດພິທີມອບທຶນການສຶກສາເພື່ອສົ່ງເສີມນັກຮຽນເກັ່ງ, ຊ່ວຍເຫລືອນັກຮຽນຜູ້ດ້ອຍໂອກາດ ແລະ ຍ້ອງຍໍຄູ-ອາຈານຜູ້ສອນດີເດັ່ນ ໄລຍະທີ I ປະຈໍາສົກຮຽນ 2016-2017 ລວມມູນຄ່າຫລາຍກວ່າ 160 ລ້ານກີບ ປະກອບມີ: ອັດຕາກິນໃຫ້ນັກຮຽນຢູ່ຫໍພັກທີ່ມາຈາກແຂວງພາກກາງ ແລະ ພາກໃຕ້ມາຮຽນຢູ່ໂຮງຮຽນ ມສ ວຽງຈັນ ໃນຊັ້ນ ມ6 ຈໍານວນ 29 ຄົນ ແລະ ມ7 28 ຄົນ ລວມມູນຄ່າ 130 ກວ່າລ້ານກີບຕໍ່ປີ. ນອກນັ້ນ, ຍັງມອບທຶນ
ການສຶກສາໃຫ້ນັກຮຽນເກັ່ງທົ່ວນະຄອນຫລວງວຽງຈັນຈໍານວນ 20 ທຶນ ແລະ ເຄື່ອງນຸ່ງ, ອຸປະກອນການຮຽນໃຫ້ນັກຮຽນຜູ້ດ້ອຍໂອກາດໃນຊັ້ນປະຖົມຢູ່ 4 ຕົວເມືອງ, ເມືອງລະ 20 ຄົນ ຄື: ເມືອງຈັນທະບູລີ, ສີໂຄດຕະບອງ, ໄຊເສດຖາ ແລະ ສີສັດຕະນາກ, ພ້ອມທັງມອບໃບຍ້ອງຍໍໃຫ້ຄູ-ອາຈານສອນດີເດັ່ນທົ່ວນະຄອນຫລວງວຽງຈັນຈໍານວນ 20 ທ່ານ.
ພິທີດັ່ງກ່າວ, ໄດ້ຈັດຂຶ້ນໃນວັນທີ 3 ຕຸລານີ້ທີ່ໂຮງຮຽນ ມສ ວຽງຈັນ, ໂດຍມີທ່ານ ລີຕູ້ ບົວປາວ ຮອງລັດຖະມົນຕີກະຊວງສຶກສາທິການ ແລະ ກິລາ, ມີຫົວໜ້າພະແນກສຶກສາທິການ ແລະ ກິລານະຄອນຫລວງວຽງຈັນ ແລະ ຄະນະປະທານມູນນິທິສົ່ງເສີມການສຶກສາ, ພ້ອມດ້ວຍຄູ-ອາຈານ, ຜູ້ປົກຄອງນັກຮຽນເຂົ້າຮ່ວມຢ່າງພ້ອມພຽງ.
ທີ່ມາ: ໜັງສືພິມລາວພັດທະນາ