ສຳນັກຂ່າວຕ່າງປະເທດ ລາຍງານໃນວັນທີ 3 ຕຸລານີ້ວ່າ ລົດໄຟແຂວນ (suspension railway) ຂະບວນທຳອິດຂອງຈີນ ໄດ້ດຳເນີນການທົດລອງນຳໃຊ້ ໃນໄລຍະທາງ 300 ແມັດ ເມື່ອວັນທີ 30 ກັນຍາ 2016 ຜ່ານມາ ທີ່ເມືອງເສິນຕູ ເມືອງເອກຂອງແຂວງເສສວນ ທາງພາກຕາເວັນຕົກສຽງໃຕ້ຂອງຈີນ ໂດຍຜົນການທົດສອບ ເປັນໜ້າເພິ່ງພໍໃຈສຳລັບຄະນະຜູ້ອອກແບບ.
ທ່ານ ໄຈ໋ ຫວ່ານໝິງ ຫົວໜ້າຄະນະອອກແບບໂຄງການລົດໄຟແຂວນ ໄດ້ເປີດເຜີຍວ່າ ລົດໄຟດັ່ງກ່າວນີ້ ສາມາດແລ່ນໄດ້ດ້ວຍຄວາມໄວ 60 ກິໂລແມັດຕໍ່ຊົ່ວໂມງ, ບັນຈຸຜູ້ໂດຍສານໄດ້ຫລາຍເຖິງ 120 ຄົນ ຕໍ່ຕູ້ໂດຍສານໜຶ່ງ ແລະ ມີຕົ້ນທຶນການສ້າງລາງລົດໄຟ ປະຢັດກວ່າລາງລົດໄຟໃຕ້ດິນຫລາຍກວ່າ 1/5 ເຖິງ 1/8, ໃຊ້ພະລັງງານຈາກໝໍ້ໄຟ ຊຶ່ງເປັນມິດຕໍ່ສິ່ງແວດລ້ອມອີກດ້ວຍ. ນອກຈາກນີ້ ຄະນະອອກແບບ ຍັງຈະສືບຕໍ່ທຳການທົດສອບຕື່ມອີກຫລາຍປະການ ກ່ອນທີ່ຈະນຳອອກໃຫ້ບໍລິການຢ່າງເປັນທາງການ.
ທັງນີ້ ລົດໄຟແຂວນ ເປັນລົດໄຟແບບລາງດ່ຽວ ຊຶ່ງຕູ້ໂດຍສານຖືກແຂວນໄວ້ດ້ານລຸ່ມຂອງລາງ, ລົດໄຟແບບນີ້ ຖືກສ້າງຂຶ້ນລຸ້ນທຳອິດ ທີ່ເມືອງ Wuppertal ປະເທດເຢຍລະມັນ ແລະ ໄດ້ຖືກນຳໃຊ້ບໍລິການຢູ່ເຢຍລະມັນ ໃນປີ 1901 ຈົນເຖິງປັດຈຸບັນ.
/
ຕິດຕາມເຮົາທາງFacebook ກົດຖືກໃຈເລີຍ!