ສຳນັກຂ່າວຕ່າງປະເທດ ລາຍງານໃນວັນທີ 3 ຕຸລານີ້ວ່າ ປະຊາຊົນຊາວຈີນ ໄດ້ພາກັນເດີນທາງກັບຄືນບ້ານເກີດ ໃນໄລຍະວັນພັກຍາວ 7 ມື້ ເພື່ອສະເຫລີມສະຫລອງວັນຊາດ ສາທາລະນະລັດ ປະຊາຊົນຈີນ 1 ຕຸລາ ຄົບຮອບ 67 ປີ ເຮັດໃຫ້ພາກການທ່ອງທ່ຽວ ມີບັນຍາກາດຄຶກຄື້ນ ໂດຍສະເພາະຢູ່ອຸທິຍານທໍລະນີແຫ່ງຊາດ ເມືອງຊື່ສຸຍ ແຂວງກຸ້ຍໂຈວ ທາງພາກຕາເວັນຕົກສຽງໃຕ້ຂອງປະເທດ ມີນັກທ່ອງທ່ຽວເດີນທາງເຂົ້າຢ້ຽມຊົມ ຫລາຍກວ່າ 100,000 ຄົນ ເພີ່ມສູງຂຶ້ນກວ່າໄລຍະປົກກະຕິເຖິງ 42.5%, ສ່ວນຢູ່ເມືອງໜານຈິງ ແຂວງຈຽງຊູ ທາງພາກຕາເວັນອອກຂອງປະເທດ ສະພາບການສັນຈອນແອອັດຢ່າງໜັກ ເນື່ອງຈາກມີລົດອອກມາແລ່ນ ຕາມຖະໜົນສາຍຕ່າງໆເກືອບ 120,000 ຄັນ ຫລາຍກວ່າມື້ທຳມະດາເຖິງ 2 ເທົ່າຕົວ.
ທັງນີ້ ວັນຊາດຈີນ ຊຶ່ງກົງກັບວັນທີ 1 ຕຸລາຂອງທຸກໆປີ ລັດຖະບານຈີນໄດ້ກຳນົດໃຫ້ເປັນວັນພັກລັດຖະການ ຕໍ່ເນື່ອງກັນ 7 ມື້ ນັບຕັ້ງແຕ່ວັນທີ 1-7 ຕຸລາ ເພື່ອເປີດໂອກາດໃຫ້ປະຊາຊົນ ທີ່ເຮັດວຽກຢູ່ຕາມຕົວເມືອງໃຫຍ່ຕ່າງໆ ໄດ້ເດີນທາງກັບໄປຢ້ຽມຢາມຄອບຄົວ ທັງເປັນການກະຕຸ້ນການທ່ອງທ່ຽວພາຍໃນປະເທດອີກດ້ວຍ.
ຕິດຕາມເຮົາທາງFacebook ກົດຖືກໃຈເລີຍ!