ອາທິດຜ່ານມານີ້ ທີ່ຫ້ອງປະຊຸມ ຫ້ອງວ່າການປົກຄອງເມືອງໄຊ ໄດ້ເປີດກອງປະຊຸມປືກສາຫາລື ຜ່ານແຜນແມ່ບົດ ພັດທະນາທ່ອງທ່ຽວ ແຕ່ປີ 2017-2030 ໂດຍມີ ທ່ານ ພອນສະຫວັນ ພັນທະວິຈິດ ຄະນະປະຈຳພັກແຂວງ, ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ, ມີທ່ານ ສີວັນຄຳ ອີນທະບູບຜາ, ຮອງເຈົ້າເມືອງໆໄຊ, ພ້ອມທັງຫົວໜ້າຫ້ອງການ ທີ່ກ່ຽວຂ້ອງເຂົ້າຮ່ວມ.
ກອງປະຊຸມ ໄດ້ຜ່ານແຜນແມ່ບົດ ແຕ່ປີ 2017-2030 ເຊີ່ງລວມມີ ໂຄງການສົມທົບການພັດທະນາ ສ້າງສິ່ງອຳນວຍຄວາມສະດວກ ແລະ ເສັ້ນທາງເຂົ້າຫາຖໍ້າຈອມອອງ ເພື່ອສ້າງເງື່ອນໄຂອຳນວຍຄວາມສະດວກ ໃຫ້ພາກທຸລະກິດເຂົ້າມາສຳປະທານ ພັດທະນາການບໍລິການໃນອະນາຄົດ, ສ້າງຈຸດພັກລົດ ແລະ ສິ່ງອໍານວຍຄວາມສະດວກ ທາງແຍກຫຼັກ 24 ບ້ານນ້າບໍຕາໄກ ຫາ ຖໍ້າຈອມອອງ. ສໍາຫຼວດເກັບກໍາຂໍ້ມູນບັນດາຖໍ້າຕ່າງໆ ບໍລິເວນຖໍ້າຈອມອອງ ແລະ ຂຶ້ນສະຖິຕິແຫຼ່ງທ່ອງທ່ຽວ. ສ້າງແຜນທີວົງຈອນຖ້ຳ, ສໍາຫຼວດເສັ້ນທາງຍ່າງປ່າບ້ານຈອມອອງ ເຊື່ອມຕໍ່ຖໍ້າມົກແຝກ ເມືອງນາໝໍ້.
ຜ່ານມາໄດ້ມີການຝຶກອົບຮົມການແປຮູບ ຜະລິດຕະພັນກະສິກຳ ແລະ ການຊອກຕະຫຼາດຈຳໜ່າຍເຂດຫ້ວຍອຸ່ນ ເພື່ອການທ່ອງທ່ຽວ, ໂຄງການສ້າງບ້ານນ້ຳແຫງ, ບ້ານຈອມອອງ ເປັນບ້ານພັກຄ້າງແຮມຂອງນັກທ່ອງທ່ຽວ ສ້າງໃຫ້ມີເຮືອນພັກ, ຮ້ານອາຫານ, ໂຮມສະເຕ ແລະ ຜະລິດຕະພັນທ່ອງທ່ຽວຕ່າງໆ. ຊອກຫາກິດຈະກຳບໍລິການທ່ອງທ່ຽວ ໃຫ້ແກ່ 13 ບ້ານທາງຜ່ານສູ່ຖ້ຳຈອມອອງ. ສໍາຫຼວດ, ເກັບກໍາຂໍ້ມູນບັນດາທ່າແຮງດ້ານການຜະລິດ ເຄື່ຶອງຫັດຖະກໍາຂອງຊາວບ້ານ ຢູ່ບັນດາບ້ານ 13 ບ້ານວົງຈອນການທ່ອງທ່ຽວຖໍ້າຈອມອອງ. ຝຶກອົບຮົມຍົກລະດັບສືມື ດ້ານການຜະລິດເຄື່ອງທີ່ລະນຶກ ທີ່ເປັນເອກະລັກຂອງທ້ອງຖິ່ນ ເພື່ອສະໜອງໃຫ້ ແກ່ນັກທ່ອງທ່ຽວ. ສໍາຫຼວດ, ເກັບກໍາຂໍ້ມູນຢູ່ບ້ານນໍ້າແຫງ, ບ້ານຈອມອອງ ເພື່ອສ້າງເປັນສະຖານທີ່ພັກແຮມໂຮມສະເຕ ກັບຊາວບ້ານ ແລະ ຊຸກຍູ້ໃຫ້ມີການສ້າງຮ້ານອາຫານ ເພື່ອບໍລິການໃຫ້ແກ່ນັກທ່ອງທ່ຽວ, ໂຄງການກໍ່ສ້າງບຸກຄະລາກອນຂອງລັດ ແລະ ພາກທຸລະກິດການບໍລິການຕ່າງໆ ໃຫ້ເຂັ້ມແຂງ, ຊຸກຍູ້ສົ່ງເສີມຄຸ້ມຄອງທຸລະກິດບໍລິການຕ່າງໆ ໃຫ້ມີລະບຽບແບບແຜນ ທີ່ຖືກຕ້ອງຕາມ ລະບຽບກົດໝາຍ, ມີຄຸນນະພາບມາດຖານສາກົນ, ມີຄວາມສະຫງົບ, ປອດໄພ, ຝຶກອົບຮົມຍົກລະດັບຄວາມຮູ້, ຄວາມສາມາດ ໃຫ້ພະນັກງານບໍລິການຂອງລັດ ແລະ ພາກທຸລະກິດ ໃຫ້ມີຄວາມຮູ້, ຄວາມເຂົ້າໃຈທີ່ເລິກເຊິ່ງ ກ່ຽວກັບການບໍລິການດ້ານການທ່ອງທ່ຽວ. ກອງປະຊຸມເຜີຍແຜ່ລະບຽບຫຼັກການ ດໍາເນີນທຸລະກິດບໍລິການຕ່າງໆ ໃຫ້ມີຄວາມຖືກຕ້ອງຕາມລະບຽບກົດໝາຍ, ໄດ້ລະດັບມາດຕະຖານສາກົນ ພ້ອມກັບຄວາມສະຫງົບ ແລະ ປອດໄພ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!