ຂປລ. ສະຖາບັນວິຈິດສິນແຫ່ງຊາດ ຈັດພິທີມອບ-ຮັບ ໃບປະກາດສະນິຍະບັດ ໃຫ້ແກ່ນັກສຶກສາທີ່ສຳເລັດການສຶກສາ ລະດັບອານຸປະລິນຍາຕີ ຮຸ່ນທີ 6 ແລະ ລະດັບປະລິນຍາຕີ ຮຸ່ນທີ 10 ໃນສົກສຶກສາ 2015-2016 ເຊິ່ງຈັດຂຶ້ນໃນວັນທີ 30 ກັນຍານີ້ ທີ່ສະຖາບັນວິຈິດສິນແຫ່ງຊາດ ໃຫ້ກຽດເຂົ້າຮ່ວມໂດຍ ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຕາງໜ້າຈາກສະຖາບັນການສຶກສາຕ່າງໆ ແລະ ພໍ່-ແມ່ ຜູ້ປົກຄອງເຂົ້າຮ່ວມ.
ທ່ານ ໄມສິງ ຈັນບຸດດີ ຫົວໜ້າສະຖາບັນວິຈິດສິນແຫ່ງຊາດ ຜ່ານບົດສະຫລຸບການຈັດຕັ້ງປະຕິບັດວຽກງານໂດຍຫຍໍ້, ໂດຍມີບາງຕອນກ່າວວ່າ:ໃນ 1 ປີຜ່ານມາ ໃນສົກຮຽນ 2015-2016 ໄດ້ມີນັກສຶກສາສຳເລັດການສຶກສາທັງໝົດ 44 ຄົນ ໃນລະດັບອານຸປະລິນຍາ 18 ຄົນ, ຍິງ 2 ຄົນ, ຈາກສາຂາພາກວິຊາຈິດຕະກຳ, ພາກວິຊາພາບພິມ, ພາກວິຊາສີລະປະພື້ນເມືອງ ແລະ ປະຕິສັງຂອນ, ພາກວິຊາອອກແບບນິເທດສິນ, ພາກວິຊາປະຕິມະກຳປະກອບມີ 3 ສາຂາ ຄື: ສາຂາຄວັດແກະສະຫລັກໄມ້, ສາຂາປັ້ນ-ຫລໍ່, ສາຂາວິຊາປັ້ນດິນເຜົາ. ສຳລັບລະດັບປະລິນຍາຕີ ມີ 26 ຄົນ, ຍິງ 5 ຄົນ ຈາກສາຂາພາກວິຊາຈິດຕະກຳ, ພາກວິຊາປະຕິມະກຳ ແລະ ພາກວິຊາສິລະປະພື້ນເມືອງ ເຊິ່ງບັນດານັກສຶກສາທີ່ຈົບໄປ ຈະໄດ້ປະກອບອາຊີບຕ່າງໆ ເພື່ອປະກອບສ່ວນເຂົ້າໃນການ ພັດທະນາ ເສດຖະກິດສັງຄົມ ແລະ ວັດທະນະທຳຂອງຊາດ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!