ສຳນັກຂ່າວຣອຍເຕີ ລາຍງານໃນວັນທີ 29 ກັນຍາຜ່ານມານີ້ວ່າ ລັດຖະບານກຳປູເຈຍ ໄດ້ຕົກລົງອະນຸມັດຂຶ້ນຄ່າແຮງງານຂັ້ນຕ່ຳ ໃນພາກອຸດສາຫະກຳຕັດຫຍິບ ຈາກ 140 ໂດລາ ມາເປັນ 153 ໂດລາສະຫະລັດຯຕໍ່ເດືອນ (ປະມານ 1,237,000 ກີບ) ຊຶ່ງຈະມີຜົນບັງຄັບໃຊ້ ນັບຕັ້ງແຕ່ວັນທີ 1 ມັງກອນ 2017 ໂດຍການຕັດສິນໃຈດັ່ງກ່າວນີ້ ມີຂຶ້ນພາຍຫລັງທີ່ມີການຢຸດງານປະທ້ວງຢ່າງຕໍ່ເນື່ອງ ເພື່ອຂໍຂຶ້ນຄ່າແຮງງານຂັ້ນຕ່ຳ ຂອງກຳມະກອນຕັດຫຍິບຢູ່ຕາມໂຮງງານແຫ່ງຕ່າງໆ ຊຶ່ງຕົວແທນຂອງຝ່າຍລັດຖະບານ, ຜູ້ປະກອບການ ແລະ ສະຫະພັນກຳມະບານ ໄດ້ມີການເຈລະຈາຫາລືກັນຢູ່ຫລາຍເດືອນ.

ທັງນີ້ ອຸດສາຫະກຳຕັດຫຍິບ ໄດ້ສ້າງວຽກເຮັດງານທຳໃຊ້ແກ່ຊາວກຳປູເຈຍເຖິງ 600,000 ຄົນ ແລະ ສ້າງລາຍຮັບເຂົ້າປະເທດໄດ້ເຖິງ 6​ ຕື້ໂດລາຕໍ່ປີ ຊຶ່ງການປັບຂຶ້ນຄ່າແຮງງານຂັ້ນຕ່ຳຄັ້ງນີ້ ກະຊວງແຮງງານກຳປູເຈຍລະບຸວ່າ ຈະຊ່ວຍຍົກມາດຕະຖານຄວາມເປັນຢູ່ຂອງກຳມະກອນຕັດຫຍິບ ແລະ ກະຕຸ້ນການຜະລິດອີກດ້ວຍ.

 
ຕິດຕາມເຮົາທາງFacebook ກົດຖືກໃຈເລີຍ!