ສຳນັກຂ່າວຣອຍເຕີ ລາຍງານໃນວັນທີ 29 ກັນຍາຜ່ານມານີ້ວ່າ ຈີນໄດ້ສະແດງຄວາມບໍ່ພໍໃຈຫລາຍຄັ້ງ ຕໍ່ສະຫະລັດອາເມຣິກາ ແລະ ເກົາຫລີໃຕ້ ໃນການຕັດສິນໃຈຕິດຕັ້ງລະບົບປ້ອງກັນຂີປະນາວຸດ THAAD ໃສ່ດິນແດນຂອງເກົາຫລີໃຕ້ ເພື່ອຕອບໂຕ້ໄພຄຸກຄາມດ້ານຂີປະນາວຸດຈາກເກົາຫລີເໜືອ ໂດຍທ່ານ ຢາງ ຢູຈຸນ ໂຄສົກກະຊວງປ້ອງກັນປະເທດຈີນ ໄດ້ກ່າວວ່າ ການຄັດຄ້ານລະບົບ THAAD ຂອງຈີນນັ້ນຊັດເຈນ ໂດຍພວກເຮົາໃຫ້ຄວາມສຳຄັນຢ່າງໃກ້ຊິດ ແລະ ພິຈາລະນາໃຊ້ມາດຕະການທີ່ຈຳເປັນ ເພື່ອປົກປ້ອງຄວາມໝັ້ນຄົງທາງຍຸດທະສາດຂອງປະເທດ ແລະ ສະຖຽນລະພາບທາງຍຸດທະສາດຂອງພາກພື້ນ.
ທັງນີ້ ລັດຖະບານຈີນ ມີຄວາມວິຕົກກັງວົນວ່າ ລະບົບ THAAD ນີ້ ຈະສາມາດເຝົ້າຕິດຕາມ ສັກກະຍະພາບທາງທະຫານຂອງຈີນໄດ້ ແລະ ເຫັນວ່າ ການຕິດຕັ້ງລະບົບດັ່ງກ່າວຢູ່ເກົາຫລີໃຕ້ ບໍ່ໄດ້ເຮັດໃຫ້ອຸນຫະພູມຄວາມເຄັ່ງຕຶງຢູ່ແຫລມເກົາຫລີ ຫລຸດລົງແຕ່ຢ່າງໃດເລີຍ, ຊຶ່ງຣັດເຊຍເອງ ກໍໄດ້ສະແດງການຕໍ່ຕ້ານໃນລັກສະນະດຽວກັນ.
ຕິດຕາມເຮົາທາງFacebook ກົດຖືກໃຈເລີຍ!