ສຳນັກຂ່າວຕ່າງປະເທດລາຍງານຈາກເມືອງ ຄິສຊິມມີ ລັດຟໍຣິດາ ປະເທດສະຫະລັດອາເມລິກາ ເມື່ອວັນທີ 8 ກັນຍານີ້ ວ່າ ຈະຫຼວດ “ແອຕລາສ ໄຟ” ຂອງພັນທະມິດການສົ່ງຈະຫຼວດແຫ່ງສະຫະລັດ (ຢູແອລເອ) ທີ່ເປັນຄວາມຮ່ວມມືລະຫວ່າງບໍລິສັດລັອກຮີດ-ມາຣຕິນ ກັບບໍລິສັດໂບອິ້ງ ໄດ້ປ່ອຍຂຶ້ນຈາກຖານຈະຫຼວດຂອງຖານທັບອາກາດສະຫະລັດ ເທິງແຫຼມຄານາເວີຣັລ ແຄມຊາຍຝັ່ງລັດຟໍຣິດາ ທາງຕະເວັນຕົກສຽງໃຕ້ຂອງສະຫະລັດ ເມື່ອເວລາ 19.05 ໂມງ ຕາມເວລາທ້ອງຖິ່ນ ( 06.05 ໂມງ ວັນສຸກຕາມເວລາໃນປະເທດເຮົາ) ເພື່ອນຳສົ່ງຍານສຳຫຼວດ “ໂອຊີຣິສ-ເຣັກຊ໌” ( OSIRIS-REx ) ຂອງອົງການບໍລິຫານການບິນ ແລະ ອາວະກາດແຫ່ງຊາດຂອງສະຫະລັດ (ນາຊາ) ເພື່ອປະຕິບັດພາລະກິດໄລ່ຕາມດາວເຄາະນ້ອຍ “ເບນນູ” ແລະ ເກັບຕົວຢ່າງຈາກດາວມາສຶກສາຕໍ່ໄປ ເຊິ່ງອາ່ດຊ່ວຍໃຫ້ມະນຸດເຂົ້າໃຈການກໍ່ຕົວຂອງໂລກ ແລະ ການຖືກຳເນີດຂອງຊັບພະຍາກອນໃນໂລກຫຼາຍຂຶ້ນ

ນາຊາໄດ້ກຳນົດໃຫ້ຍານໂອຊີຣິສ – ເຣັກຊ໌ ເດີນທາງຕາມດາວເບນນູໃຫ້ທັນພາຍໃນເວລາ 2 ປີນັບຈາກນີ້ ຫຼື ພາຍໃນເດືອນ ສິງຫາ 2018 ໂດຍດາວເຄາະນ້ອຍດວງນີ້ເປັນໜຶ່ງໃນດາວເຄາະນ້ອຍຈາກປະມານ 500,000 ດວງ ທີ່ໂຄຈອນຢູ່ໃນລະບົບສຸລິຍະ ແຕ່ການທີ່ດາວດວງນີ້ໂຄຈອນຢູ່ໃກ້ໂລກຫຼາຍທີ່ສູດໃນວົງໂຄຈອນຂອງໂລກຮອບດວງອາທິດ ແລະ ມີສີດຳ ເຊິ່ງບົ່ງບອກວ່າພາຍໃຕ້ພື້ນຜິວດາວອຸດົມໄປດ້ວຍແຮ່ທາດໂດຍສະເພາະຄາຣ໌ບອນ ນາຊາຈິ່ງຕັດສິນໃຈເລືອກດາວເຄສະນ້ອຍດວງນີ້ ເປັນເປົ້າໝາຍຫຼ້າສຸດຂອງການຄົ້ນຄ້ວາວິໄຈ

ຍານໂຊິຣິສ-ເຣັກຊ໌ ມີນ້ຳໜັກ 1,500 ກິໂລກຣາມ ມູນຄ່າ 800 ລ້ານໂດລາ ເປັນໜຶ່ງໃນຍານສຳຫຼວດຂອງໂຄງການສຳຫຼວດດາວເຄາະນ້ອຍແບບເດີນທາງໄປກັບຂອງນາຊາ ໂດຍໄດ້ຮັບການສະໜັບສະໜູນຈາກລັດຖະບານສະຫະລັດ ແລະ ຄວາມຮ່ວມມືຈາກມະຫາວິທະຍາໄລແອຣິໂຊນາ ເຊິ່ງດາວເຄາະນ້ອຍເບນນູໄດ້ຮັບການຄົ້ນພົບເມື່ອປີ 1999 ມີຂະໜາດເສັ້ນສູນກາງປະມານ 500 ແມັດ ນ້ຳໜັກປະມານ 60 ລ້ານຕັນ ແລະ ເຄື່ອນທີ່ດ້ວຍຄວາມໄວ 100,000 ກິໂລແມັດຕໍ່ຊົ່ວໂມງ