ລັດຖະບານລາວ ແລະ ລັດຖະບານໄທ ໄດ້ລົງນາມໃນບົດບັນທຶກຄວາມເຂົ້າໃຈວ່າດ້ວຍການພັດທະນາແຫຼ່ງພະລັງງານຢູ່ລາວທັງນີ້ ກໍເພື່ອເປັນການຂະຫຍາຍຂອບການຮ່ວມມືທີ່ເປັນພື້ນຖານໃຫ້ກັບການພັດທະນາໂຄງການຜະລິດໄຟຟ້າຢູ່ ສປປ ລາວ ເພື່ອສົ່ງອອກໄປຍັງປະເທດໄທໃຫ້ເພີ່ມຂຶ້ນເປັນ 9 ພັນເມກາວັດ ຈາກ MOU ສະບັບເດີມທີ່ກຳນົດກອບການຮ່ວມມືໄວ້ທີ່ 7 ພັນເມກາວັດ.
ໃນວັນທີ 6 ກັນຍາ 2016 ທີ່ສໍານັກງານນາຍົກລັດຖະມົນຕີທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ໃຫ້ການຕ້ອນຮັບການເຂົ້າຢ້ຽມ ພົບປະຂອງທ່ານ ພົນເອກ ປຣະຢຸດ ຈັນໂອຊາ ນາຍົກລັດຖະມົນຕີແຫ່ງລາຊະອານາຈັກໄທ ເນື່ອງໃນໂອກາດທີ່ເດີນທາງມາຮ່ວມກອງປະຊຸມສຸດຍອດອາຊຽນຄັ້ງທີ 28, 29 ແລະກອງປະຊຸມອື່ນໆ ທີ່ປິ່ນອ້ອມໃນລະຫວ່າງວັນທີ 6-8 ກັນຍາ 2016 ທີ່ນະຄອນຫຼວງວຽງຈັນ.
ໂອກາດນີ້ ທ່ານ ທອງລຸນ ສີສຸລິດ ກໍໄດ້ສະແດງຄວາມຊົມເຊີຍ ແລະຕີລາຄາສູງທີ່ພະນະທ່ານນາຍົກລັດຖະມົນຕີ ພົນເອກ ປຣະຍຸດ ຈັນໂອຊາ ໄດ້ນໍາຄະນະຜູ້ແທນໄທເດີນທາງມາເຂົ້າຮ່ວມກອງປະຊຸມສຸດຍອດອາຊຽນຄັ້ງນີ້ ພ້ອມທັງສະແດງຄວາມຂອບໃຈຕໍ່ລັດຖະບານໄທ ສຳລັບການສະໜັບສະໜູນຊ່ວຍເຫຼືອແກ່ ສປປ ລາວ ດ້ວຍດີມາໂດຍຕະຫຼອດ ໂດຍສະເພາະໃນການພັດທະນາພື້ນຖານໂຄງລ່າງ ແລະການເປັນປະທານອາຊຽນຂອງລາວລວມເຖິງການປະກອບສ່ວນ ແລະສະໜັບສະໜູນຕໍ່ກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 49 ແລະກອງປະຊຸມອື່ນໆທີ່ກ່ຽວຂ້ອງໃນເດືອນກໍລະກົດທີ່ຜ່ານມາໃຫ້ມີຜົນສໍາເລັດຢ່າງຈົບງາມ.
ພ້ອມນີ້ ທັງສອງຝ່າຍຍັງຈະໄດ້ພ້ອມກັນສືບຕໍ່ຊຸກຍູ້ພາກສ່ວນກ່ຽວຂ້ອງຂອງທັງສອງຝ່າຍເພື່ອເພີ່ມທະວີການຄ້າ ແລະການລົງທຶນຂອງໄທຢູ່ລາວ ໃຫ້ນັບມື້ຫຼາຍຂຶ້ນກວ່າເກົ່າ ນັບທາງດ້ານປະລິມານ ແລະດ້ານຄຸນນະພາບຕາມທ່າແຮງ ແລະຄວາມອາດສາມາດຕົວຈິງຂອງສອງປະເທດ, ເອົາໃຈໃສ່ປຶກສາຫາລື ຮ່ວມກັນເພື່ອແກ້ໄຂອຸປະສັກກີດຂວາງ ຕໍ່ການຄ້າຊາຍແດນ ແລະການຂົນສົ່ງສິນຄ້າຜ່ານແດນຂອງທັງສອງປະເທດ, ການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ກໍໄດ້ເອົາໃຈໃສ່ຈັດຕັ້ງຜັນຂະຫຍາຍການພົບປະຂອງສອງນາຍົກໃນເດືອນກໍລະກົດ 2016 ທີ່ຜ່ານມາ ນອກຈາກນັ້ນ ກໍຍັງຈະໄດ້ສືບຕໍ່ຮ່ວມມືກັນຢ່າງໃກ້ຊິດໃນການຕິດຕາມບັນຫາກຸ່ມຄົນທີ່ບໍ່ຫວັງດີຕໍ່ສາຍພົວພັນລາວ-ໄທ, ການຄ້າຂາຍຢາເສບຕິດ, ການຄ້າຂອງເຖື່ອນ ແລະບັນຫາອື່ນໆ.
ໃນເວລາຕໍ່ມາ ກໍໄດ້ມີພິທີລົງນາມໃນບົດບັນທຶກຄວາມເຂົ້າໃຈ (MOU) ວ່າດ້ວຍການພັດທະນາແຫຼ່ງພະລັງງານຢູ່ ສປປ ລາວ ຮ່ວມກັນລະຫວ່າງລັດຖະບານແຫ່ງ ສປປ ລາວ ທີ່ຕາງໜ້າໂດຍທ່ານ ຄຳມະນີ ອິນທິຣາດ ລັດຖະມົນຕີກະຊວງພະລັງງານ ແລະບໍ່ແຮ່ ແລະລັດຖະບານແຫ່ງລາຊະອານາຈັກໄທທີ່ຕາງໜ້າໂດຍ ທ່ານ ພົນເອກ ອະນັນຕະພອນການຈະນະຣັດລັດຖະມົນຕີ ກະຊວງພະລັງງານ ໂດຍມີທ່ານນາຍົກລັດຖະມົນຕີ ຂອງທັງສອງປະເທດເຂົ້າຮ່ວມເປັນສັກຂີພິຍານ ຊຶ່ງ MOU ສະບັບດັ່ງກ່າວນີ້ ເປັນການຂະຫຍາຍກອບການຮ່ວມມືທີ່ເປັນພື້ນຖານໃຫ້ກັບການພັດທະນາໂຄງການຜະລິດໄຟຟ້າຢູ່ ສປປ ລາວ ເພື່ອສົ່ງອອກໄປຍັງປະເທດໄທໃຫ້ເພີ່ມຂຶ້ນເປັນ 9 ພັນເມກາວັດຈາກ MOU ສະບັບເດີມທີ່ກຳນົດກອບການຮ່ວມມືໄວ້ທີ່ 7 ພັນເມກາວັດ.
ຂ່າວຈາກ: ເສດຖະກິດ-ສັງຄົມ