ສຳນັກຂ່າວຕ່າງປະເທດ ລາຍງານໃນວັນທີ 7 ກັນຍານີ້ວ່າ ກອງທຶນເພື່ອເດັກ ແຫ່ງ ສະຫະປະຊາຊາດ (UNICEF) ໄດ້ອອກມາເປີດເຜີຍວ່າ ມີເດັກນ້ອຍເກືອບ 50 ລ້ານຄົນໃນທົ່ວໂລກ ທີ່ຕ້ອງພັດພາກຈາກຖິ່ນຖານບ້ານເກີດ ເນື່ອງຈາກໄພສົງຄາມ ແລະ ຄວາມຂັດແຍ່ງພາຍໃນປະເທດ ໂດຍທ່ານ ແອນໂທນີ ເລກ ຜູ້ອຳນວຍການ UNICEF ໄດ້ອອກມາຖະແຫລງໃນມື້ນີ້ (7 ກັນຍາ) ວ່າ ພາບຂອງເດັກນ້ອຍບາງຄົນເຊັ່ນ ໄອລັນ ກຸຣະດີ ທີ່ຖືກຄື້ນທະເລຊັດມາຄ້າງຢູ່ຫາດຊາຍ ຫລັງຈາກທີ່ເຮືອຜູ້ອົບພະຍົບຫລົ້ມ ຫລື ໃບໜ້າທີ່ເປື້ອນເລືອດຂອງ ອອມຣັນ ດັກນິສ ທີ່ຖືກພາຂຶ້ນລົດໂຮງໝໍ ຫລັງຈາກທີ່ເຮືອນຂອງເຂົາຖືກທຳລາຍ ໄດ້ສ້າງຄວາມຕົກຕະລຶງ ໃຫ້ແກ່ຄົນໃນທົ່ວໂລກ, ພ້ອມນັ້ນ ທ່ານ ຍັງໄດ້ລະບຸອີກວ່າ ເດັກນ້ອຍແຕ່ລະຄົນ ບໍ່ວ່າຈະເປັນຍິງ ຫລື ຊາຍ ລ້ວນແຕ່ເປັນຕົວແທນເດັກນ້ອຍທົ່ວໂລກ ທີ່ກຳລັງຕົກຢູ່ໃນອັນຕະລາຍ ແລະ ກະຕຸ້ນໃຫ້ພວກເຮົາ ມີຄວາມເມດຕາສົງສານຕໍ່ເດັກນ້ອຍທຸກຄົນ ທີ່ກຳລັງປະເຊີນກັບຊາຕາກຳອັນດຽວກັນ.
ທັງນີ້ ອົງການ UNICEF ໄດ້ຮຽກຮ້ອງໃຫ້ລັດຖະບານທົ່ວໂລກ ຢຸຕິການກັກຂັງເດັກນ້ອຍ ທີ່ຕ້ອງການອົບພະຍົບ ຫລື ຂໍສະຖານະລີ້ໄພ ໂດຍບໍ່ຄວນແຍກຄົນໃນຄອບຄົວອອກຈາກກັນ ແລະ ອະນຸຍາດໃຫ້ຜູ້ລີ້ໄພເດັກ ສາມາດເຂົ້າເຖິງການບໍລິການສາທາລະນະສຸກ ຕະຫລອດຈົນສົ່ງເສີມນະໂຍບາຍ ຢຸຕິຄວາມຄຽດຊັງບາດໝາງ ແລະ ແບ່ງແຍກກີດກັນທາງເຊື້ອຊາດ.
ຕິດຕາມເຮົາທາງFacebook ກົດຖືກໃຈເລີຍ!