ໃນຕອນບ່າຍຂອງວັນທີ 6 ກັນຍານີ້, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ບັນດາປະມຸກລັດ ແລະ ຫົວໜ້າລັດຖະບານຂອງບັນດາປະເທດສະມາຊິກອາຊຽນ ໄດ້ລົງນາມໃນຖະແຫລງ ການອາຊຽນວ່າດ້ວຍອາຊຽນເປັນໜຶ່ງດຽວໃນການຕອບໂຕ້ໄພພິບັດ: ອາຊຽນເປັນໜຶ່ງດຽວໃນການຕອບໂຕ້ໄພພິບັດ ພາຍໃນພາກພື້ນ ແລະ ນອກພາກພື້ນ. ຖະແຫລງການນີ້ ແມ່ນເພື່ອເປັນເຄື່ອງມືສຳຄັນສຳລັບອາຊຽນ ເພື່ອໃຫ້ການຊ່ວຍເຫລືອເຊິ່ງກັນ ແລະ ກັນ ໃນວິກິດການສຸກເສີນໄພພິບັດ. ພ້ອມດຽວກັນນີ້ ຍັງເປັນເຄື່ອງມືສຳຄັນໃຫ້ອາຊຽນ ໃນການຊ່ວຍເຫລືອຕໍ່ບັນດາປະເທດພາຍນອກອາຊຽນ ທີ່ປະສົບໄພພິບັດ ໂດຍຍຶດຖືຫລັກການອາຊຽນ ເປັນແນກາງ ໃນວຽກງານດັ່ງກ່າວ.
ຖະແຫລງການນີ້ ເປັນເອກະສານດຽວທີ່ບັນດາຜູ້ນຳອາຊຽນໄດ້ລົງນາມໃນໄລຍະກອງປະຊຸມສຸດຍອດອາຊຽນຄັ້ງທີ 28 ແລະ 29.