ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ນັບແຕ່ວັນທີ 7-8 ກັນຍານີ້, ຮ່ອງຄວາມກົດດັນອາກາດຕ່ຳຈະພັດຜ່ານເຂດພາກເໜືອ ຫາ ພາກກາງຂອງລາວ, ສົມທົບກັບກະແສລົມມໍລະສຸມຕາເວັນ ຕົກສ່ຽງໃຕ້ມີກຳລັງປານກາງພັດປົກຄຸມເຂດພາກກາງຫາພາກໃຕ້, ຊຶ່ງຈະເຮັດໃຫ້ຝົນສືບຕໍ່ຕົກໃນລະດັບຄ່ອຍຢູ່ທົ່ວໄປ ແລະ ຕົກປານກາງ ຫາ ໜັກພ້ອມມີລົມພັດແຮງຢູ່ບາງທ້ອງຖິ່ນຂອງແຂວງພາກກາງ ແລະ ພາກໃຕ້. ພາກເໜືອດ້ານຕາເວັນອອກ: ຈະມີຝົນຕົກໃນລະດັບຄ່ອຍຢູ່ທົ່ວໄປ ແລະ ຕົກປານກາງຢູ່ບາງທ້ອງຖິ່ນແຂວງຊຽງຂວາງ. ອຸນຫະພູມຕ່ຳສຸດ 19-21 ອົງສາ ແລະ ສູງສຸດ 28-30 ອົງ ສາ. ພາກເໜືອດ້ານຕາເວັນຕົກ: ຈະມີຝົນຕົກໃນລະດັບຄ່ອຍຢູ່ທົ່ວໄປ ແລະ ຕົກປານກາງຢູ່ບາງທ້ອງ ຖິ່ນແຂວງຫລວງພະບາງ ແລະ ໄຊຍະບູລີ. ສຳລັບ ນະຄອນຫລວງວຽງຈັນ: ຈະມີຝົນຕົກໃນລະດັບຄ່ອຍຢູ່ທົ່ວໄປ ແລະ ຕົກປານກາງຢູ່ບາງບໍລິເວນ, ສ່ວນພາກກາງ: ຈະມີຝົນຕົກໃນລະດັບຄ່ອຍເປັນບໍລິເວນກວ້າງ ແລະ ຕົກປານກາງຫາໜັກຢູ່ບາງທ້ອງຖິ່ນແຂວງບໍລິຄຳໄຊ, ຄຳມ່ວນ ແລະ ສະຫວັນນະເຂດ. ພາກໃຕ້: ຈະມີຝົນຕົກໃນລະດັບຄ່ອຍເປັນບໍລິເວນກວ້າງ ແລະ ຕົກປານກາງຫາໜັກຢູ່ບາງທ້ອງຖິ່ນ ແຂວງສາລະວັນ, ເຊກອງ ແລະ ອັດຕະປື ຕື່ມອີກ.

ຂ່າວຈາກ: ໜັງສືພິມລາວພັດທະນາ