ສຳນັກຂ່າວຕ່າງປະເທດ ລາຍງານໃນວັນທີ 4 ກັນຍາຜ່ານມານີ້ວ່າ ກອງປະຊຸມເຈລະຈາສັນຕິພາບມຽນມາ ໄດ້ອັດລົງຢ່າງເປັນທາງການ ໃນວັນເສົາທີ 3 ກັນຍາ 2016 ທີ່ນະຄອນຫລວງເນປີດໍ ຊຶ່ງເປັນຄວາມພະຍາຍາມຂອງລັດຖະບານມຽນມາ ພາຍໃຕ້ການນຳຂອງ ທ່ານ ນາງ ອອງຊານຊູຈີ ທີ່ຈະຢຸຕິຄວາມບໍ່ສະຫງົບ ຈາກການຄວາມຂັດແຍ່ງພາຍໃນ ລະຫວ່າງຊົນຊາດຊົນເຜົ່າຕ່າງໆ ທີ່ເກີດຂຶ້ນຍາວນານເກືອບເວລາ 70 ປີແລ້ວ. ແນວໃດກໍຕາມ ການເຈລະຈາກັນຊຶ່ງກິນເວລາ 4 ມື້ ຊຶ່ງໄດ້ເປີດໂອກາດໃຫ້ ບັນດາຕົວແທນຈາກກຸ່ມຊົນຊາດຊົນເຜົ່າຕ່າງ ໄດ້ນຳສະເໜີຂໍ້ຂ້ອງໃຈ ແລະ ຄວາມປາຖະໜາທາງການເມືອງຂອງຕົນ ຕໍ່ກັບລັດຖະບານມຽນມາຄັ້ງນີ້ ຍັງຄົງບໍ່ສາມາດບັນລຸທາງອອກຮ່ວມກັນໄດ້ເທື່ອ.
ທັງນີ້ ຍັງຄົງມີກຸ່ມຕິດອາວຸດຊົນເຜົ່າສ່ວນນ້ອຍອີກ 3 ກຸ່ມ ທີ່ຍັງຕໍ່ສູ້ກັບກອງທັບຂອງລັດຖະບານ ປະຕິເສດເຂົ້າຮ່ວມການເຈລະຈາ ແລະ ພ້ອມກັນນັ້ນ ກຸ່ມຕິດອາວຸດບາງກຸ່ມ ທີ່ເຂົ້າຮ່ວມການເຈລະຈາ ໄດ້ຍ່າງອອກຈາກທີ່ປະຊຸມ ເຮັດໃຫ້ບໍ່ສາມາດບັນລຸຂໍ້ຕົກລົງໃດໆໄດ້ເທື່ອ ຊຶ່ງຄະນະຜູ້ແທນດັ່ງກ່າວນີ້ ຈະສືບຕໍ່ເປີດການເຈລະຈາກັນຄືນໃໝ່ ທີ່ຈະຈັດຂຶ້ນໃນອີກ 6 ເດືອນຂ້າງໜ້າ.
ຕິດຕາມເຮົາທາງFacebook ກົດຖືກໃຈເລີຍ!