ຊຳຊຸງ ຮີບແກ້ໄຂກ່ອນສວາຍ… ປະກາດລະງັບການຂາຍ ກາແລັກຊີ່ ໂນດ 7 ແລ້ວ ພ້ອມກັບເກັບຄືນໂທລະສັບມືຖືເຮືອທຸງຂອງບໍລິສັດ ຫຼັງຈາກເປີດໂຕແລະວາງຈຳໜ່າຍໃນ 10 ປະເທດທົ່ວໂລກ ພາຍໃນບໍ່ຮອດ 2 ອາທິດ ແຕ່ຍອດຂາຍທະລຸ 2.5 ລ້ານໜ່ວຍແລ້ວ.
ແຫຼ່ງຂ່າວຈາກຕ່າງປະເທດລາຍງານວ່າ ເມື່ອວັນທີ 2 ກັນຍາ 2016 ວານນີ້ ບໍລິສັດຊຳຊຸງແຫ່ງປະເທດເກົາຫຼີໃຕ້ ໄດ້ປະກາດເກັບຄືນໂທລະສັບສະມາດໂຟນຊຳຊຸງ ກາແລັກຊີ່ ໂນດ 7 ຈາກ 10 ປະເທດທົ່ວໂລກ ພາຍຫຼັງມີລາຍງານວ່າໂທລະສັບສະມາດໂຟນລຸ້ນດັ່ງກ່າວນີ້ເກີດລະເບີດແລະໄຟໄໝ້ ເຖິງ 35 ກໍລະນີ ໃນຂະນະທີ່ສາກແບັດເຕີຣີ່.
ທ່ານ ໂຄ ດອງ ຈິນ ຫົວໜ້າສາຍງານທຸລະກິດຂອງບໍລິສັດຊຳຊຸງ ໄດ້ຖະແຫຼງຂ່າວຕໍ່ສື່ມວນຊົນທີ່ນະຄອນຫຼວງເຊອູນ ໃນວັນສຸກ ທີ 2 ກັນຍາ ວານນີ້ວ່າ ບໍລິສັດຊຳຊຸງມີຄວາມເສຍໃຈທີ່ທາງບໍລິສັດຕ້ອງເກັບຄືນ ກາແລັກຊີ ໂນດ7 ທີ່ໄດ້ວາງຈຳໜ່າຍໃນ 10 ປະເທດທົ່ວໂລກ ລວມທັງໃນສະຫະລັດແລະເກົາຫຼີເອງ.
ຜູ້ຊ່ຽວຊານຊີ້ວ່າ ການປະກາດເກັບຄືນກາແລັກຊີໂນດ7 ຂອງຊຳຊຸງຖືເປັນຄວາມເສຍຫາຍຢ່າງໃຫຍ່ຫຼວງຕໍ່ຊຳຊຸງ ໃນຂະນະທີ່ທາງຊຳຊຸງຍັງຫວັງວ່າຈະສາມາດກັບມາຈຳໜ່າຍກາແລັກຊີໂນດ 7 ໄດ້ຢ່າງແຂງແຮງໃນທ້າຍປີ ເພື່ອແຂ່ງຂັນກັບໂທລະສັບຈາກຄ້າຍແອັບເປີນທີ່ຈະເປີດໂຕໃນອາທິດໜ້ານີ້.
ໃນຂະນະທີ່ພະນັກງານປະຈຳສູນຊຳຊຸງໂຊກໄຊ (ລາວ) ໄດ້ບອກວ່າ ໄດ້ຮູ້ຂ່າວກ່ຽວກັບເລື່ອງນີ້ແລ້ວ ແຕ່ກໍຍັງບໍ່ຮູ້ວ່າທາງອຳນວຍການສູນເພິ່ນຈະຕັດສິນໃຈຈັ່ງໃດ ເພາະໄລຍະທີ່ຜ່ານມາສ່ວນຫຼາຍກໍບໍ່ໄດ້ມີບັນຫາ ຖ້າມີບັນຫາໃດກໍເຂົ້າມາສູນເພື່ອໃຫ້ທາງສູນ ທຳການແກ້ໄຂໃຫ້ ແລະຢືນຢັນວ່າຍັງບໍ່ມີລູກຄ້າຄົນໃດ ນຳເອົາມືຖືຂອງຕົນເຂົ້າມາສົ່ງຄືນ ຍ້ອນຄຳປະກາດຂອງບໍລິສັດແມ່ຢູ່ເກົາຫຼີເທື່ອ.
ຕິດຕາມເຮົາທາງFacebook ກົດຖືກໃຈເລີຍ!