ຂປລ. ຄະນະສະເພາະກິດຂັ້ນຕ່າງໆ ສາມາດຢຶດໄມ້ເປັນຂອງລັດ ຈຳນວນທັງໝົດ 55.421 ແມັດກ້ອນ ໃນນີ້ ໄດ້ຂາຍອອກແລ້ວ ຈຳນວນ 7.300 ກວ່າແມັດກ້ອນ, ໄມ້ຍັງບໍ່ທັນຂາຍ ມີຈຳນວນ 48 ພັນກວ່າແມັດກ້ອນ, ໄມ້ທີ່ຄ້າງສະໜາມ ຍົກມາຈາກປີກ່ອນ ມີຈຳນວນທັງໝົດ 104.230 ກວ່າແມັດກ້ອນ ທັງນີ້ ກໍຍ້ອນການຈັດຕັ້ງປະຕິບັດ ຄຳສັ່ງເລກທີ 15/ນຍ ຢ່າງເປັນເອກະພາບສູງ ໃນຂອບເຂດທົ່ວປະເທດ.
ທ່ານ ຈະເລີນ ເຢຍປາວເຮີ ໄດ້ກ່າວເມື່ອບໍ່ດົນນີ້ວ່າ: ຈຳນວນໄມ້ທີ່ຍັງບໍ່ທັນໄດ້ຂາຍ 48.000 ກວ່າແມັດກ້ອນ ກອງປະຊຸມເຫັນດີ ໃຫ້ປະມູນຂາຍທົ່ວປະເທດ ໂດຍເລີ່ມຈາກແຂວງອັດຕະປື ແລະ ແຂວງຊຽງຂວາງກ່ອນ, ສຳລັບໄມ້ຈຳນວນ 28.700 ກວ່າແມັດກ້ອນ ທີ່ຕັດຢູ່ແຂວງໄຊສົມບູນນັ້ນ ໃຫ້ດຳເນີນການກວດກາຕົວຈິງ ມີຈຳນວນເທົ່າໃດທີ່ຕັດຖືກເຂດອະນຸຍາດ ແລະ ຈຳນວນທີ່ບໍ່ຖືກເຂດອະນຸຍາດ ແລ້ວຢຶດເປັນຂອງລັດ ຍ້ອນເປັນໄມ້ທີ່ຕັດບໍ່ຖືກຕາມຂໍ້ກຳນົດຂອງກົດໝາຍວ່າດ້ວຍໄມ້ (ຕັດບໍ່ຖືກເຂດກຳນົດ), ພ້ອມນີ້ ໂກຕ້າໄມ້ທີ່ກະຊວງ, ແຂວງ ແລະ ເມືອງ ໄດ້ອະນຸມັດ ໃນສົກປີ 2015-2016 ທີ່ບໍ່ທັນຈັດຕັ້ງປະຕິບັດ ຫລື ປະຕິບັດບໍ່ທັນສຳເລັດນັ້ນ ໃຫ້ລົບລ້າງຢ່າງຂາດຕົວເຊັ່ນດຽວກັນ ບໍ່ອະນຸຍາດໃຫ້ກະຊວງ ຫລື ທ້ອງຖິ່ນທົ່ວປະເທດ ອອກອະນຸຍາດຂຸດຄົ້ນໄມ້ ເພື່ອແລກປ່ຽນ ໂຄງການກໍ່ສ້າງພື້ນຖານໂຄງລ່າງທຸກປະເພດຢ່າງເດັດຂາດ ພ້ອມໃຫ້ກວດກາກ່ຽວກັບບັນດາໂຄງການກໍ່ສ້າງພື້ນຖານໂຄງລ່າງ ລຽບຊາຍແດນ ທີ່ໄດ້ຕົກລົງເອົາໄມ້ແລກປ່ຽນ ກ່ອນຄຳສັ່ງເລກທີ 15/ນຍ ແລ້ວລາຍງານ ໃຫ້ລັດຖະບານ ພິຈາລະນາຕົກລົງແກ້ໄຂ.
ປັດຈຸບັນ ໄມ້ທີ່ຍັງຄ້າງສະໜາມ ໃນຂອບເຂດທົ່ວປະເທດ ມີທັງໝົດຈຳນວນ 270.400 ກວ່າແມັດກ້ອນ, ໃນນີ້ໄມ້ທີ່ໄດ້ ເສຍພາສີອາກອນ ຄົບຖ້ວນແລ້ວ ມີຈຳນວນເກືອບ 80.000 ແມັດກ້ອນ, ເປັນເງິນຈຳນວນ 43.297.663.243 ກີບ ແລະ 3.616.000 ກວ່າໂດລາສະຫະລັດ, ໄມ້ທີ່ຄ້າງມອບພັນທະພາສີ–ອາກອນ ມີຈຳນວນ 191.000 ກວ່າແມັດກ້ອນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!