ສຳນັກຂ່າວຕ່າງປະເທດ ລາຍງານໃນວັນທີ 2 ກັນຍານີ້ວ່າ ກຳປັ່ນສູ້ຮົບ USS Coronado, LCS 4 ທີ່ກອງທັບເຮືອສະຫະລັດອາເມຣິກາ ສົ່ງອອກໄປປະຈຳການ ໃນເຂດອາຊີ-ປາຊີຟິກ ໄດ້ປະສົບກັບບັນຫາກ່ຽວກັບເຄື່ອງຈັກ ຈຳເປັນຕ້ອງໄດ້ກັບຄືນເຂົ້າຮັບການສ້ອມແປງ ຢູ່ຖານທັບເຮືອລັດຮາວາຍ.
ທ່ານ ພົນເອກ ຈົນ ຣິຊາດສັນ ຜູ້ບັນຊາການກອງທັບເຮືອ ສະຫະລັດອາເມຣິກາ ໄດ້ກ່າວວ່າ ບັນຫາທີ່ເກີດຂຶ້ນ ແມ່ນຍ້ອນຄວາມບົກພ່ອງດ້ານບຸກຄະລາກອນ, ອີກສ່ວນໜຶ່ງແມ່ນເກີດຈາກ ການອອກແບບ ແລະ ດ້ານວິສະວະກຳ ຊຶ່ງບັນຫາຕ່າງໆເຫລົ່ານີ້ ໄດ້ຮັບການເອົາໃຈໃສ່ຈາກພວກເຮົາ ທັງເລື່ອງຂອງບຸກຄະລາກອນ ແລະ ເລື່ອງຂອງຂະບວນການ.
ທັງນີ້ ຕາມແຜນການແລ້ວ ກຳປັ່ນສູ້ຮົບລຳດັ່ງກ່າວ ມີກຳນົດເດີນທາງໄປປະຈຳການ ຢູ່ຖານທັບເຮືອສິງກະໂປ ໃນທ້າຍປີ 2016 ນີ້ ຊຶ່ງລະຫວ່າງການເດີນທາງ ຈະມີການເຂົ້າຮ່ວມເຝິກຊ້ອມທາງເຮືອ ກັບກອງທັບເຮືອອົດສະຕຣາລີ ແລະ ຈະແວ່ຢ້ຽມຢາມເມືອງທ່າຕ່າງໆຈຳນວນໜຶ່ງ ໃນຂະນະດຽວກັນ ກໍຈະມີກຳປັ່ນສູ້ຮົບ LCS ອີກລຳໜຶ່ງ ເດີນທາງໄປປະຈຳການຢູ່ ຖານທັບເຮືອສິງກະໂປ ຕາມແຜນການສົ່ງກຳປັ່ນສູ້ຮົບລຸ້ນດັ່ງກ່າວ ຈຳນວນ 2 ລຳ ເຂົ້າມາປະຈຳການຢູ່ເຂດ ອາຊີ-ປາຊີຟິກ.
ຕິດຕາມເຮົາທາງFacebook ກົດຖືກໃຈເລີຍ!