ສຳນັກຂ່າວຕ່າງປະເທດ ລາຍງານໃນວັນທີ 26 ສິງຫານີ້ວ່າ ເກີດເຫດເຮືອບິນສູ້ຮົບ L39 ຂອງກອງທັບອາກາດຫວຽດນາມ ຕົກລົງກາງທົ່ງນາ ໃກ້ກັບສະຖາບັນເຝິກນັກບິນ ຢູ່ແຂວງຝູອຽນ (Phú Yên) ທາງພາກກາງຂອງປະເທດ ສົ່ງຜົນໃຫ້ນັກບິນເຝິກຫັດ ເສຍຊີວິດ 1 ຄົນ ຊຶ່ງນັບເປັນອຸບັດເຫດທາງການບິນທະຫານ ຄັ້ງທີ 3 ຂອງຫວຽດນາມ ນັບຕັ້ງແຕ່ເດືອນມິຖຸນາຜ່ານມານີ້.
ເມື່ອເດືອນມິຖຸນາ 2016 ເຮືອບິນສູ້ຮົບ ພ້ອມດ້ວຍນັກບິນ 2 ຄົນ ໄດ້ຕົກລົງລະຫວ່າງເຝິກຊ້ອມ ຢູ່ນອກຊາຍຝັ່ງ ແຂວງເຫງະອານ ທາງພາກເໜືອຂອງຫວຽດນາມ ແລະ ມີນັກບິນພຽງຄົນດຽວ ທີ່ສາມາດຊ່ວຍເຫລືອໄວ້ໄດ້, ຈາກນັ້ນ ອີກບໍ່ພໍເທົ່າໃດວັນຕໍ່ມາ ເຮືອບິນທະຫານ ທີ່ອອກປະຕິບັດການຄົ້ນຫາ ນັກບິນອີກຄົນໜຶ່ງທີ່ຍັງຄົງສູນຫາຍ ໄດ້ຂາດການຕິດຕໍ່ ແລະ ພົບໃນພາຍຫລັງວ່າ ເຮືອບິນໄດ້ຕົກ ແລະ ມີລູກເຮືອເສຍຊີວິດຍົກລຳ 9 ຄົນ.
ຕິດຕາມເຮົາທາງFacebook ກົດຖືກໃຈເລີຍ!