ຂປລ. ໃນວັນທີ 25 ສິງຫານີ້ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ວຽງໄຊ ວານເດສ໌ ຮອງປະທານສະມາຄົມ ມິດຕະພາບກູບາ-ລາວ, ທັງເປັນນັກສິນລະປິນທີ່ມີຊື່ສຽງຂອງກູບາ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ແລກປ່ຽນວັດທະນະທຳເຊິ່ງກັນ ແລະ ກັນ ລະຫວ່າງ ລາວ-ກູບາ.
ໃນໂອກາດນີ້, ທ່ານຮອງລັດຖະມົນຕີ ກໍໄດ້ສະແດງຄວາມຍິນດີ ຕ້ອນຮັບຊົມເຊີຍຕໍ່ ທ່ານ ນາງ ວຽງໄຊ ວານເດສ໌ ພ້ອມດ້ວຍຄະນະໃນຄັ້ງນີ້, ເຊິ່ງເປັນການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍຮ່ວມມື ການແລກປ່ຽນວັດທະນະທໍາເຊິ່ງກັນ ແລະ ກັນ ລະຫວ່າງ ລາວ-ກູບາ, ກູບາ-ລາວ ໃຫ້ນັບມື້ແຕກດອກອອກຜົນ ງອກງາມຍິ່ງຂຶ້ນ. ເຊິ່ງໄດ້ນໍາເອົາການສະແດງສິລະປະຂອງກູບາ ແລະ ການສະແດງຟ້ອນ, ຮ້ອງເພງທີ່ເປັນເອກະລັກ ວັດທະນະທໍາຂອງຊາດລາວ ທີ່ສະແດງໃຫ້ເຫັນວ່າ ສີລະປະສາມາດເຂົ້າເຖິງທຸກກຸ່ມຄົນໂດຍບໍ່ມີພົມແດນ, ເຮັດໃຫ້ນັກສີລະປິນ ລາວ-ກູບາ ໄດ້ຮຽນຮູ້ເຂົ້າໃຈ ແລະ ມີຄວາມເບີກບານມ່ວນຊື່ນ.
ໃນໂອກາດດັ່ງກ່າວ, ທ່ານ ນາງ ວຽງໄຊ ວານເດສ໌ ໄດ້ສະແດງຄວາມຂອບໃຈຕໍ່ ທ່ານ ບົວເງິນ ຊາພູວົງ ທີ່ໄດ້ສະຫລະເວລາໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກໃນຄັ້ງນີ້. ເພື່ອສະເຫລີມສະຫລອງວັນຄ້າຍວັນເກີດຂອງ ທ່ານ ຟີແດນ ກາສໂຕຣ ອະດີດປະທານປະເທດ ສາທາລະນະລັດກູບາ ຄົບຮອບ 60 ປີ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!