ພິ­ທີ​ມອບ​ໃບ​ກຽດ​ຕິ​ຄຸນໃຫ້​ແກ່​ນັກ­ກີ­ລາ​ເຍົາ­ວະ​ຊົນ​ທີມ​ຊາດ​ລາວ ຫຼັງ​ຈາກ​ສ້າງ​ຜົນ­ງານ​ໂດດ​ເດັ່ນໃນ​ການ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ບານ­ເຕະ​ລາຍ­ການ​ຕ່າງໆທີ່​ຕ່າງ­ປະ­ເທດ ໂດຍ​ສະ­ເພາະນັກ­ກີ­ລາ​ຮຸ່ນ​ອາ­ຍຸ​ບໍ່​ເກີນ 10 ປີ 13 ປີ ແລະ 14 ປີ ຈັດຂຶ້ນ​ວັນ​ທີ 19 ສິງ­ຫາ 2016 ທີ່​ສູນ​ເຝິກ​ກີ­ລາ​ບານ­ເຕະ​ແຫ່ງ​ຊາດ ບ້ານ​ຫ້ວຍ​ຫົງ ເມືອງ​ຈັນ­ທະ​ບູ​ລີ ໂດຍ​ມີ​ທ່ານ ສົມ​ພູ ພົງ­ສາ ຜູ້​ຊ່ວຍ​ລັດ­ຖະ­ມົນ­ຕີກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ ໄຊ​ບັນ­ດິດ ຣາ​ຊະ​ພົນ ເລ­ຂາ­ທິ­ການ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ພ້ອມ​ດ້ວຍ​ຄະ­ນະ​ສະ­ຫະ­ພັນ​ບານ­ເຕະ ຄູ​ເຝິກ ແລະ ນັກ­ກີ­ລາ ເຂົ້າ​ຮ່ວມ.

ສຳ­ລັບ​ຜົນ­ງານ​ຂອງ​ນັກ­ກີ­ລາ​ທັງ 3 ປະ­ເພດ ປະ­ກອບ​ມີ: ນັກ­ກີ­ລາ​ບານ­ເຕະສະ­ໂມ­ສອນ​ຊ້າງ​ນ້ອຍ ເອ​ຟ​ຊີ ຮຸ່ນ​ອາ­ຍຸ​ບໍ່​ເກີນ 10 ປີ ເປັນ​ຕົວ​ແທນ​ທີມ​ຊາດ​ລາວ ເຂົ້າ​ຮ່ວມ​ການ​ແຂ່ງ­ຂັນ​ບານ­ເຕະ​ເຍົາ­ວະ​ຊົນມິດ­ຕະ­ພາບ ແລະ ແລກ­ປ່ຽນ​ວັດ­ທະ­ນະ­ທຳ ຮຸ່ນ​ອາ­ຍຸ​ບໍ່​ເກີນ 10 ປີ ຫຼື I-League Summer Football Festival 2016 ທີ່ ສ.ເກົາ­ຫຼີ ລະ­ຫວ່າງ​ວັນ​ທີ 28-31 ກໍ­ລະ­ກົດ 2016 ການ​ແຂ່ງ­ຂັນ​ຄັ້ງ​ນີ້ ແມ່ນ​ມີ​ທີມ​ເຂົ້າ​ຮ່ວມ 5 ສະ­ໂມ­ສອນ ໃນ​ນັ້ນ ສະ­ໂມ­ສອນ​ຊ້າງ​ນ້ອຍ ເອ​ຟ​ຊີ ລົງ​ແຂ່ງ­ຂັນ​ທັງ​ໝົດ 4 ນັດ ຊະ­ນະ​ລວດ ສາ­ມາດ​ຍາດ​ໄດ້​ຫຼຽນ​ຄຳ​ມາ​ຄອງ.

ສ່ວນ​ທີມ​ຊາດ​ລາວ ຢູ-13 ເຂົ້າ​ຮ່ວມ​ລາຍ­ການ​ແຂ່ງ­ຂັນ​ບານ­ເຕະ​ເພື່ອ​ມິດ­ຕະ­ພາບລະ­ຫວ່າງ​ເຍົາ­ວະ​ຊົນ​ອາ​ຊຽນ-ຈີນ ຫຼື 2016 ‘Soong Ching Ling Cup’ China-ASEAN Youth Football Friendly Matches ໃນ​ລະ­ຫວ່າງ​ວັນ​ທີ 28 ກໍ­ລະ­ກົດ ຫາ 4 ສິງ­ຫາ 2016 ທີ່​ນະ­ຄອນ­ຫຼວງ​ປັກ​ກິ່ງ ສປ.ຈີນ ເຊິ່ງ​ມີ 10 ທີມ​ເຂົ້າ​ຮ່ວມ ທີມ​ຊາດ​ລາວ ຢູ-13 ສາ­ມາດ​ຍາດ​ໄດ້​ອັນ​ດັບ​ທີ 1.

ຂະ­ນະ​ທີ່​ນັກ­ກີ­ລາ​ບານ­ເຕະທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 14 ປີ ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ ໃນ​ການ​ແຂ່ງ­ຂັນ​ເທ​ສະ­ການ​ບານ­ເຕະ​ເຍົາ­ວະ​ຊົນ​ອາ­ຊີ ຮຸ່ນ​ອາ­ຍຸ 14 ປີ ຫຼື AFC U-14 Regional Festival Of Football 2016 ທີ່​ປະ­ເທດ​ບຣູ​ໄນ ໃນ​ລະ­ຫວ່າງ​ວັນ​ທີ 24-31 ກໍ­ລະ­ກົດ 2016 ເຊິ່ງ​ນັກ­ກີ­ລາ​ລາວ ສາ­ມາດ​ຍາດ​ໄດ້​ອັນ​ດັບ​ທີ 1 ຂອງ​ກຸ່ມ.

ຂ່າວຈາກ: ນັກສືພິມວຽງຈັນໃໝ່

ຕິດຕາມເຮາທາງFacebook ກົດຖືກໃຈເລີຍ!