ຕາມແຫຼ່ງຂ່າວຂອງຕ່າງປະເທດລາຍງານວ່າ ມີຜູ້ເສຍຊີວິດຢ່າງໜ້ອຍ 2 ຄົນ ແລະ ສູນຫາຍອີກ 2 ຄົນ
ຫຼັງຈາກເກີດອຸບັດຕິເຫດເຮືອຂ້າມຟາກ ທີ່ໃຫ້ບໍລິການລະຫວ່າງເກາະ ອັບປາງລົງໃນໝູ່ເກາະວານູອາຕູ
ເມື່ອເວລາ 10 ໂມງເຊົ້າ ຕາມເວລາທ້ອງຖິ່ນ ໃນມື້ນີ້ (11 ກໍລະກົດ) ໂດຍໃນຂະນະທີ່ຜູ້ລອດຊີວິດຕ້ອງໄດ້
ລອຍຄໍກາງມະຫາສະໝຸດປາຊີຟິກ ທີ່ເຕັມໄປດ້ວຍສະຫຼາມ ເປັນເວລາຫຼາຍກ່ວາ 6 ຊົ່ວໂມງ.
ທ່ານ ແຈັກເກີລິນ ເດີ ໄຊອົງ ຜູ້ອຳນວຍການສຳນັກງານກາແດງ ແຫ່ງວານູອາຕູ ໄດ້ລະບຸວ່າ ເຮືອຂ້າມ
ຟາກລຳດັ່ງກ່າວ ບັນທຸກຜູ້ໂດຍສານຈຳນວນ 30 ຄົນ ລວມເຖິງລູກເຮືອອີກ 13 ຊີວິດ ໃນຂະນະທີ່ເກີດ
ເຫດອັບປາງລົງໃນມະຫາສະໝຸດປາຊີຟິກ ຫຼັງເດີນທາງອອກຈາກເກາະມາເລຄູລາ ເຊິ່ງເປັນເກາະໃຫຍ່
ອັນດັບທີ 2 ຂອງວານູອາຕູ ແລະ ມີຈຸດໝາຍປາຍທາງຢູ່ທີ່ນະຄອນຫຼວງ ພອດ ວິລາ ຂອງປະເທດ.
ຜູ້ອຳນວຍການສຳນັກງານກາແດງວານູອາຕູ ເປີດເຜີຍເພີ່ມເຕີມອີກວ່າ ເຮືອຂ້າມຟາກລຳດັ່ງກ່າວ
ອັບປາງຕັ້ງແຕ່ເວລາ 2 ໂມງເຊົ້າຕາມເວລາທ້ອງຖິ່ນ ແຕ່ທາງການຫາກໍໄດ້ຮັບຮູ້ການເກີດອຸບັດຕິເຫດ
ຄັ້ງນີ້ ໃນອີກ 6 ຊົ່ວໂມງຕໍ່ມາ ພ້ອມເປີດເຜີຍວ່າ ເຮືອຂ້າມຟາກລຳນີ້ ໄດ້ຈົມລົງຢ່າງຖາວອນແລ້ວທີ່ລະ
ດັບຄວາມເລິກ ປະມານ 240 ແມັດ ເມື່ອເວລາ 10 ໂມງຕາມເວລາທ້ອງຖິ່ນ.
ຜູ້ລອດຊີວິດຈຳນວນ 28 ຄົນ ແລະ ລູກເຮືອອີກ 11 ຄົນ ຕ້ອງລອຍຄໍຢູ່ ກາງມະຫາສະໝຸດປາຊີຟິກດົນ
ເຖິງ 6 ຊົ່ວໂມງ ກ່ວາຈະໄດ້ຮັບການຊ່ວຍເຫຼືອຢ່າງປອດໄພແລ້ວ ແລະ ພົບຮ່າງຂອງຜູ້ໂດຍສານທີ່ເສຍ
ຊີວິດ ເປັນເພດຍິງ 2 ຄົນ ໃນຂະນະທີ່ລູກເຮືອ 1 ຄົນ ແລະ ເດັກນ້ອຍອີກ 1 ຄົນ ຍັງຄົງສູນຫາຍ. ໂດຍ
ສາເຫດຂອງໂສກນາຕະກຳຄັ້ງນີ້ ຍັງຢູ່ລະຫວ່າງການສືບສວນ.
ເນື່ອງຈາກເຮືອຂ້າມຟາກ ຖືເປັນພາຫະນະສຳຄັນທີ່ໃຊ້ໃນການເດີນທາງຂອງປະຊາຊົນໃນປະເທດໝູ່
ເກາະ ຫຼາຍແຫ່ງທົ່ວມະຫາສະໝຸດປາຊີຟິກ ລວມເຖິງວານູອາຕູ ເຊິ່ງເປັນບ້ານຂອງເກາະດອນເລັກ
ນ້ອຍກ່ວາ 80 ແຫ່ງ.