ສຳນັກຂ່າວຕ່າງປະເທດ ລາຍງານໃນວັນທີ 22 ສິງຫານີ້ວ່າ ນັກຮຽນມັດທະຍົມປາຍກຳປູເຈຍ ຈຳນວນ 93,752 ຄົນ ໃນທົ່ວປະເທດ ໄດ້ເລີ່ມຕົ້ນການສອບເສັງຈົບຊັ້ນ ໂດຍທາງກະຊວງສຶກສາທິການກຳປູເຈຍ ໄດ້ລະບຸວ່າ ການສອບເສັງຄັ້ງນີ້ ໄດ້ຈັດຕັ້ງກຳມະການຄວບຄຸມຫ້ອງສອບເສັງ ປະມານ 13,000 ຄົນ ລວມທັງເຈົ້າໜ້າທີ່ຕໍ່ຕ້ານການສໍ້ໂກງ ແລະ ອາສາສະໝັກອີກ ປະມານ 6,000 ຄົນ ກະຈາຍລົງພື້ນທີ່ສູນສອບເສັງຕ່າງໆ ຊຶ່ງມີທັງໝົດ 157 ແຫ່ງ ໃນຂອບເຂດທົ່ວປະເທດ ເພື່ອກວດກາການສອບເສັງຄັ້ງນີ້ ຕາມນະໂຍບາຍປະຕິຮູບການສຶກສາ ຂອງລັດຖະບານກຳປູເຈຍ.

ລັດຖະມົນຕີກະຊວງສຶກສາທິການກຳປູເຈຍ ໄດ້ລະບຸວ່າ ປີນີ້ເປັນປີທີ 3 ທີ່ພວກເຮົາໄດ້ດຳເນີນການປະຕິຮູບ ລະດັບມັດທະຍົມສຶກສາ ຊຶ່ງການສອບເສັງປີນີ້ ແມ່ນດີຂຶ້ນກວ່າປີຜ່ານມາ ໂດຍໃນປີທຳອິດນັ້ນ ພວກເຮົາພົບວ່າ ມີນັກຮຽນລັກລອບເອົາ ເຈ້ຍກ່າຍເຂົ້າຫ້ອງສອບເສັງ ເປັນຈຳນວນຫລວງຫລາຍ, ສ່ວນໃນປີທີ 2 ກໍຍັງພົບເຫັນເຊັ່ນດຽວກັນ, ແຕ່ໃນປີທີ 3 ຄືໃນປີນີ້ ຈາກການລາຍງານພົບວ່າ ຢູ່ໂຮງຮຽນມັດທະຍົມພຣະສຸວັດ ເຈົ້າໜ້າທີ່ພວກເຮົາ ບໍ່ພົບມີນັກຮຽນຄົນໃດ ລັກລອບເອົາເຈ້ຍກ່າຍເຂົ້າຫ້ອງເສັງຈັກຄົນ ຊຶ່ງພວກເຮົາສັງເຫດເຫັນວ່າ ນັກຮຽນໄດ້ມີການກຽມພ້ອມເປັນຢ່າງດີ ສຳລັບການສອບເສັງ ແລະ ພວກເຂົາມີຄວາມໝັ້ນໃຈ.

ຕິດຕາມເຮົາທາງFacebook ກົດຖືກໃຈເລີຍ!