ຕອນບ່າຍວັນທີ 7 ກໍລະກົດ 2014 ນີ້ ທີ່ດ່ານສາກົນປາກຊັນ ແຂວງບໍລິຄຳໄຊ ໄດ້ມີການມອບ
ຜູ້ຕ້ອງຫາຄົນໄທ ຈຳນວນ 2 ຄົນກັບຄືນປະເທດ, ໂດຍປະຕິບັດຕາມກອງປະຊຸມຄະນະກຳມະ
ການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນລາວ – ໄທ ແຂວງບໍລິຄຳໄຊ – ຈັງ
ຫວັດບຶງການ ຄັ້ງທີ I ໃນວັນທີ 28 ກັນຍາ 2012 ທີ່ຈັງຫວັດບຶງການປະເທດໄທ ແລະ ອີງຕາມ
ຄຳສັ່ງປ່ອຍຕົວຂອງກອງບັນຊາການ ປກສ ແຂວງບໍລິຄຳໄຊ ສະບັບເລກທີ 2188/ປກສ ລົງວັນ
ທີ 4 ກໍລະກົດ 2014. ດັ່ງນັ້ນ, ເຈົ້າໜ້າທີ່ຕຳຫຼວດກວດຄົນເຂົ້າອອກເມືອງ ດ່ານສາກົນປາກຊັນ
ຈຶ່ງໄດ້ມອບຕ້ອງຫາທັງສອງຄົນ ໃຫ້ກັບເຈົ້າໜ້າທີ່ຝ່າຍໄທຄື: 1. ທ້າວ ໄພໂລດ ເກັ່ງທັນຍາກອນ
ອາຍຸ 30 ປີ ອາຊີບກຳມະກອນເຊື້ອຊາດ ແລະ ສັນຊາດໄທ ຢູ່ບ້ານລານຕະແບບ ອຳເພີແມ່ວົງ
ຈັງຫວັດນະຄອນປະຖົມ, ຖືກກັກຕົວໃນວັນທີ 9 ພຶດສະພາ 2014 ໃນຂໍ້ຫາລັກເຂົ້າເມືອງຜິດກົດ
ໝາຍ, 2. ທ້າວ ວິສຸດ ອະໄພພັກ ອາຍຸ 46 ປີ ອາຊີບ ກຳມະກອນເຊື້ອຊາດ ແລະ ສັນຊາດໄທ ຢູ່ບ້ານ
ລາດຍາວ ອຳເພີລາດຍາວ ຈັງຫວັດນະຄອນສະຫວັນ ຖືໜັງສືຜ່ານແດນເລກທີ 0354306 ຖືກ
ກັກຕົວໃນວັນທີ 9 ພຶດສະພາ 2014 ໃນຂໍ້ຫາ ລັກສ້າງຄອບຄົວກັບພົນລະເມືອງລາວ ຊຶ່ງພວກ
ກ່ຽວທັງສອງໄດ້ຜ່ານການສືບສວນສອບສວນ ດຳເນີນຄະດີຕາມກົດໝາຍຂອງ ສປປ ລາວ
ເປັນທີ່ຮຽບຮ້ອຍແລ້ວ ດັ່ງນັ້ນຈຶ່ງມອບໃຫ້ເຈົ້າໜ້າທີ່ຝ່າຍໄທນຳໄປສຶກສາອົບຮົມ ແລະ ບໍ່ໃຫ້
ພວກກ່ຽວກະທຳຜິດຊ້ຳອີກ.
ກ່າວມອບໂດຍ ທ່ານ ພັນຕີ ສີຂັນໄຊ ໄຊມຸນຕີ ຫົວໜ້າດ່ານຕຳຫຼວດກວດຄົນເຂົ້າອອກເມືອງ
ດ່ານສາກົນປາກຊັນ, ກ່າວຮັບໂດຍທ່ານຮ້ອຍຕຳຫຼວດໂທ ສູນທອນ ຫົວໜ້າດ່ານຕຳຫຼວດ
ກວດຄົນເຂົ້າອອກເມືອງດ່ານສາກົນບຶງການ ໂດຍມີເຈົ້າໜ້າທີ່ຂອງທັງສອງຝ່າຍເຂົ້າຮ່ວມ
ເປັນສັກຂີພິຍານ.
ແຫຼ່ງຂ່າວ: ໜັງສືພິມເສດຖະກິດ – ສັງຄົມ