ກົມການບິນ ພົນລະເຮືອນ ແລະ ບັນດາຂະແໜງການທີ່ຂຶ້ນກັບ ໄດ້ເລັ່ງເອົາໃຈໃສ່ຝຶກອົບຮົມພະນັກງານ ເພີ່ມອຸປະກອນຕ່າງໆ, ພ້ອມທັງປັບປຸງບັນດາພື້ນຖານໂຄງລ່າງທີ່ເຫັນວ່າຈຳເປັນ ແລະ ເລັ່ງໃສ່ປົວແປງຖະໜົນຫົນທາງບໍລິເວນສະໜາມບິນ. ອັນສຳຄັນແມ່ນການຮັກສາຄວສາມປອດໄພ ເພື່ອຮອງຮັບກອງປະຊຸມສຸດຍອດອາຊຽນ ຄັ້ງທີ 28-29 ທີ່ ສປປ ລາວ ຈະເປັນເຈົ້າພາບໃນຕົ້ນເດືອນຫນ້ານີ້.
ສະຫນາມບິນສາກົນວັດໄຕ ນະຄອນຫຼວງວຽງຈັນ ຖືເປັນປະຕູດ່ານຕ້ອນຮັບແຂກສຳຄັນ ເມື່ອມີກອງປະຊຸມໃຫຍ່ລະດັບຕ່າງໆ. ດັ່ງນັ້ນການຮັກສາຄວາມປອດໄພ ແລະ ກຽມພ້ອມສິ່ງອໍານວຍຄວາມສະດວກຮອງຮັບເປັນສິ່ງສຳຄັນທີ່ສຸດ. ຫລ້າສຸດທ່ານ ວັນເພັງ ຈັນທະພອນ ຫົວໜ້າກົມການບິນ ພົນລະເຮືອນ ກະຊວງໂຍທາທິການ ແລະ ຂົນສົ່ງ ກ່າວກັບທີມຂ່າວເສດຖະກິດ-ການຄ້າວ່າ: ວຽກງານກົມການບິນ ພົນລະເຮືອນ ເປັນວຽກງານໜຶ່ງທີ່ສຳຄັນ ເພື່ອຮັບໃຊ້ກອງປະຊຸມສຸດຍອດອາຊຽນທີ່ ສປປ ລາວເປັນເຈົ້າພາບ, ໂດຍສະແມ່ນການກຽມສະຖານທີ່ຈອດຍົນພິເສດຂອງບັນດາປະມຸກລັດ ຫຼື ຜູ້ແທນຂອງບາງປະເທດທີ່ຈະນຳໃຊ້ເຮືອບິນສ່ວນຕົວ, ກະກຽມຄຸ້ມຄອງການບິນພົນລະເຮືອນ, ການຈໍລະຈອນທາງອາກາດ ແລະ ສະໜາມບິນ, ປະສານ ແລະ ອຳນວຍຄວາມສະດວກໃຫ້ແກ່ຍົນພິເສດຂອງບັນດາຄະນະຜູ້ແທນແຕ່ລະປະເທດ, ປັບປຸງຫ້ອງຮັບຮອງ ແລະ ຖະໜົນຫົນທາງຕາມບໍລິເວນສະໜາມບິນໃຫ້ມີຄວາມສະອາດ ແລະ ງາມຕາ.
ປັດຈຸບັນຄວາມພ້ອມດ້ານສະໜາມບິນເຮົາແມ່ນສາມາດຮອງຮັບເຮືອບິນຂະໜາດໂບອິ້ງ 747 ແລະ ເຮືອບິນຂະໜາດຕ່າງໆຈຳນວນ 44 ລຳ, ໃນນັ້ນມີ B 747 ຈຳນວນ 8 ລຳ, B757 ຈຳນວນ 16 ລຳ, B 737 ຈຳນວນ 18 ລຳ ແລະ ATR 2 ລຳ.
ຂ່າວຈາກ: ເສດຖະກິດ-ການຄ້າ